កូនខ្មែរនឹងមានសមត្ថភាព សាងសង់ហេដ្ឋារចនាសម្ព័ន្ធស្ពានថ្នល់ មិនចាំពឹងក្រុមហ៊ុនបរទេស
Connect with us
Helistar Cambodia - Helicopter Charter Services

ព័ត៌មានជាតិ

កូនខ្មែរនឹងមានសមត្ថភាព សាងសង់ហេដ្ឋារចនាសម្ព័ន្ធស្ពានថ្នល់ មិនចាំពឹងក្រុមហ៊ុនបរទេស

Published

on

ភ្នំពេញ ៖ រដ្ឋមន្ត្រីក្រសួងសាធារណការ និងដឹកជញ្ជូន អះអាងថា តេជោសែនសាធារណការ និងដឹកជញ្ជូន​អាចផ្តល់ការបណ្តុះបណ្តាលកូនខ្មែរឱ្យមានសមត្ថភាពអាចសាងសង់​ហេដ្ឋារចនាសម្ព័ន្ធ​ស្ពានថ្នល់ដោយខ្លួនឯងដោយមិនចាំបាច់ពឹងក្រុមហ៊ុនបរទេស។

លោក ស៊ុន ចាន់ថុល ទេសរដ្ឋមន្ត្រី រដ្ឋមន្ត្រីក្រសួងសាធារណការ និងដឹកជញ្ជូន នៅថ្ងៃទី២១ ខែកុម្ភៈ បានអញ្ជើញជាអធិបតីក្នុងកម្មវិធីតម្រង់ទិសជំនាញសិក្សា និងការងាររបស់វិទ្យាស្ថានតេជោសែន សាធារណការ និងដឹកជញ្ចូន ដោយមានការចូលរួមពីថ្នាក់ដឹកនាំក្រសួង លោកគ្រូ អ្នកគ្រូ សិស្សានុសិស្សាថ្នាក់ទី១២ មកពីវិទ្យាល័យនានាក្នុងរាជធានីភ្នំពេញ និងសាធារណជនសរុបទាំងអស់ប្រមាណ ៤៥០នាក់ ដោយបានធ្វើការអង្គុយរក្សាគំលាត និងអនុវត្តតាមគោលការណ៍ណែនាំរបស់ក្រសួងសុខាភិបាល។

កម្មវិធីនេះរៀបចំឡើង នៅទីស្តីការក្រសួង ក្នុងគោលបំណង ដើម្បីផ្សព្វផ្សាយ ក៏ដូចជាបង្ហាញ ឱ្យបានដឹងអំពីមុខជំនាញ និងកម្មវិធីសិក្សារបស់វិទ្យាស្ថានតេជោ សែន សាធារណការ និងដឹកជញ្ជូន ដែលផ្តល់ជូនសម្រាប់ឆ្នាំសិក្សាថ្មីរបស់ខ្លួន និងឱកាសការងារផ្សេងៗនៅក្នុងក្រសួង បន្ទាប់ពីបានបញ្ចប់ការសិក្សានៅក្នុងវិទ្យាស្ថាននេះ។

ថ្លែងទៅកាន់អង្គពិធីនាឱកាសនោះ លោក ស៊ុន ចាន់ថុល ទេសរដ្ឋមន្ត្រី បានគូសបញ្ជាក់អំពីសារសំខាន់នៃវិទ្យាស្ថាន តេជោសែន សាធារណការ និងដឹកជញ្ជូន នៃក្រសួងសាធារណការ និងដឹកជញ្ជូន ដែលអាចផ្តល់ការបណ្តុះបណ្តាលកូនខ្មែរឱ្យមានសមត្ថភាពអាចសាងសង់ហេដ្ឋារចនាសម្ព័ន្ធស្ពានថ្នល់ដោយខ្លួនឯងដោយមិនចាំបាច់ពឹងផ្អែកលើក្រុមហ៊ុនសាងសង់របស់បរទេស។

លោកទេសរដ្ឋមន្ត្រីបានសម្ដែងនូវការប្ដេជ្ញាចិត្តយ៉ាងមុតមាំថា នឹងជួយជំរុញសិស្សនិស្សិតដែលបានបញ្ចប់ការសិក្សា​​នៅក្នុងវិទ្យាស្ថាននេះឱ្យបានចុះទៅតាមការដ្ឋានសាងសង់នានាដោយផ្ទាល់ ដើម្បីដកស្រង់បទពិសោធន៍ជាក់ស្តែង និងជួយរកការងារធ្វើនៅក្នុងវិស័យនេះដោយហេតុថាក្រសួងមានគម្រោងអភិវឌ្ឍហេដ្ឋារចនាសម្ព័ន្ធជាច្រើន ដែលទាមទារសមត្ថភាព និងធនធានមនុស្សប្រកបដោយគុណភាពខ្ពស់យ៉ាងពិតប្រាកដ។

ជាមួយគ្នានោះ លោកទេសរដ្ឋមន្ត្រីបានផ្តាំផ្ញើដល់សិស្សានុសិស្សទាំងអស់ថា ត្រូវចេះគ្រប់គ្រងជោគវាសនារបស់ខ្លួនដោយខ្លួនឯង កុំឱ្យអ្នកដទៃគេមកគ្រប់គ្រងជំនួសខ្លួន ត្រូវកំណត់គោលដៅជីវិតរបស់ខ្លួនឱ្យបានច្បាស់លាស់ដើម្បីអភិវឌ្ឍសមត្ថភាពរបស់ខ្លួនឱ្យមានកម្រិតវិជ្ជាជីវៈប្រកបដោយសក្កានុពល ដែលអាចចូលរួមចំណែកក្នុងការកសាងហេដ្ឋារចនាសម្ព័ន្ធរបស់យើងឱ្យកាន់តែមាន ការរីកចម្រើនថែមទៀត។

ដើម្បីប្រែក្លាយជាវិទ្យាស្ថានមួយដែលមានស្តង់ដា និងសមត្ថភាពខ្ពស់ ក្នុងការផ្តល់ជំនាញឯកទេស ប្រកបដោយគុណភាព វិទ្យាស្ថានតេជោ សែន សាធារណការ និងដឹកជញ្ជូន បានសហការ​ជាមួយ​វិទ្យាស្ថានបច្ចេកវិទ្យាកម្ពុជា ដើម្បីផ្លាស់ប្ដូរបទពិសោធន៍ ចំណេះដឹង ជំនាញឯកទេស និងធនធានមនុស្សទៅវិញទៅមកក្នុងគោលដៅរួមគ្នាជំរុញលើកកម្ពស់ការអភិវឌ្ឍធនធានមនុស្សនិងធ្វើការចែក រំលែកចំណេះដឹងប្រកបដោយចីរភាពដល់សិស្សនិស្សិតនិងបញ្ញវន្តខ្មែរ។

វិទ្យាស្ថានតេជោ សែន សាធារណការ និងដឹកជញ្ជូនថ្មីនេះ បានប្រកាសជ្រើសរើស និស្សិតជំនាន់ទី១ ដោយផ្តល់ជាអាហារូបករណ៍ក្នុងតម្លៃសិក្សា ៦០០ ដុល្លារអាមេរិកក្នុងមួយឆ្នាំ (បញ្ចុះថ្លៃ សិក្សាជូន៥០%សម្រាប់លើកទឹកចិត្តសិស្សនារី) ចំនួន ៥០នាក់ប៉ុណ្ណោះ ដោយត្រូវឆ្លងកាត់ប្រឡងតេស្តសមត្ថភាពជាមុនសិន។ លក្ខខណ្ឌក្នុងការដាក់ពាក្យ គឺបេក្ខជនបេក្ខនារីត្រូវមានសញ្ញាប័ត្រមធ្យមសិក្សាទុតិយភូមិ ឬសញ្ញាប័ត្រសមមូល (មានតម្លៃស្មើ)។

ការបង្កើតឱ្យមានវិទ្យាស្ថានតេជោ សែន សាធារណការ និងដឹកជញ្ជូន គឺជាការ បើកទំព័រប្រវត្តិសាស្ត្រ ថ្មីមួយទៀតរបស់ក្រសួងសាធារណការ និងដឹកជញ្ជូនក្រោមគំនិតផ្តួចផ្តើមរបស់លោកទេសរដ្ឋមន្ត្រី ស៊ុន ចាន់ថុល ដែលបានគិតគូរពីចក្ខុវិស័យដ៏វែងឆ្ងាយក្នុងការជំរុញការអភិវឌ្ឍធនធាន មនុស្សដើម្បីឆ្លើយតបទៅនឹងការរីកចម្រើនលើវិស័យសាធារណការ និងដឹកជញ្ជូនក្នុងសម័យសន្តិភាព និងការអភិវឌ្ឍក្រោមការដឹកនាំប្រកបដោយគតិបណ្ឌិតរបស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា។

វិទ្យាស្ថាននេះមានអគារចំនួន ១ខ្នង មានកម្ពស់ ៤ជាន់ បណ្តោយប្រវែង៧៤,៥ម៉ែត្រ និងទទឹងប្រវែង១៧ ម៉ែត្រ ក្រោមជំនួយពីក្រុមហ៊ុនសាជីវកម្មស្ពាន និងថ្នល់ចិន (CRBC) ក្នុងនោះ ៖ មានបន្ទប់សិក្សាចំនួន ២៤ បន្ទប់ ការិយាល័យរដ្ឋបាលចំនួន៣បន្ទប់ និងមន្ទីរពិសោធន៍ចំនួន១បន្ទប់ ដែលបានបំពាក់ និងត្រៀមបំពាក់សម្ភារសិក្សា និងឧបករណ៍បច្ចេកទេសទំនើបៗផងដែរ៕

អត្ថបទ៖ រ៉ាវុទ្ធ

India in Cambodia (Embassy of India, Phnom Penh)
Helistar Cambodia - Helicopter Charter Services
Sokimex Investment Group

ចុច Like Facebook កម្ពុជាថ្មី

ព័ត៌មានអន្ដរជាតិ10 mins ago

ចាប់អារម្មណ៍ទេ! សណ្ឋាគារអវកាសដំបូងបំផុតរបស់ពិភពលោក ប្រកាសថ្ងៃទទួលភ្ញៀវ

ជីវិតកម្សាន្ដ44 mins ago

អាងជឺលីណា​ ជោលី​ លក់​ផ្ទាំង​គំនូរ​ Churchill បាន​តម្លៃ​កំណត់​ត្រា​៧លាន​ផោន​

ព័ត៌មានអន្ដរជាតិ45 mins ago

អាមេរិក​ និងអឺរ៉ុប សម្រេច​ដាក់​ទណ្ឌកម្ម​រុស្ស៊ី​ជុំ​វិញ​ការ​បំពុល និងដាក់​គុក​មេដឹក​នាំ​ប្រឆាំង

ព័ត៌មានជាតិ9 hours ago

វ៉ាក់សាំង​កូ​វីដ​-១៩ ជំហាន​ទី​១ ពី​មជ្ឈមណ្ឌល​កូ​វ៉ា​ក់ ដែលជា​ជំនួយ​របស់ WHO បានផ្តល់​មក​ប្រទេស​កម្ពុជា​ហើយ នៅ​រាត្រី​នេះ

ព័ត៌មានជាតិ10 hours ago

ក្មេង​ទំនើង​២​នាក់​ ខឹង​គូ​សត្រូវ​យក​ដុំ​ថ្ម​គប់​មក​លើ​ខ្លួន​ នាំ​បក្សពួក​ពួនស្ទាក់​កាប់​

Sokha Hotels

ព័ត៌មានពេញនិយម

Helistar Cambodia - Helicopter Charter Services