៤ថ្ងៃក្នុងឱកាសបុណ្យចូលឆ្នាំខ្មែរ ខេត្តកំពង់ឆ្នាំងទទួលបានភ្ញៀវទេសចរជាង៣៤ម៉ឺននាក់

ក្នុងព្រឹត្តិការណ៍សង្ក្រាន្តឆ្នាំថ្មីប្រពៃណីជាតិខ្មែររយៈពេល៤ថ្ងៃ នៅក្នុងខេត្តកំពង់ឆ្នាំងមានប្រជាពលរដ្ឋភ្ញៀវទេសចរជាតិ និងអន្តរជាតិមកលេងកម្សាន្ដេជាង៣៤ម៉ឺននាក់។ នេះបើយោងតាមរបាយការណ៍របស់មន្ទីរទេសចរណ៍ខេត្តកំពង់ឆ្នាំង។

តាមរបាយការណ៍របស់មន្ទីរទេសចរណ៍ខេត្តបានបញ្ជាក់ឲ្យដឹងថា ចូលឆ្នាំខ្មែររយៈពេល៤ថ្ងៃ គឺថ្ងៃទី១៣ ដល់ថ្ងៃទី១៦ មេសា ឆ្នាំ២០២៤ នៃព្រឹត្តិការណ៍កំពង់ឆ្នាំងសង្ក្រាន្តឆ្នាំថ្មីនេះ ភ្ញៀវទេសចរ និងបងប្អូនប្រជាពលរដ្ឋដើរលេងកម្សាន្តក្នុងខេត្តកំពង់ឆ្នាំងចំនួន៣៤០.៤៧១នាក់ ក្នុងនោះ ភ្ញៀវទេសចរបរទេសចំនួន ១៨២ នាក់ ។

សូមបញ្ជាក់ផងដែរថា ព្រឹត្តិការណ៍សង្ក្រាន្តឆ្នាំ២០២៤នេះប្រារព្ធធ្វើឡើងរយៈពេល៤ថ្ងៃ នៃបុណ្យចូលឆ្នាំថ្មីប្រពៃណីជាតិ ខ្មែរ មានការរៀបចំកម្មវិធីជាច្រើនរួមមាន កម្មវិធីតាំងបង្ហាញវត្ថុសិល្បៈនានា និងកម្មវិធីលេងកម្សាន្ដល្បែងប្រជាប្រិយប្រពៃណីខ្មែរ នៅមុខសាលាខេត្តកំពង់ឆ្នាំង នៅតាមបណ្ដាវត្តនានាក្នុងខេត្ត និងនៅតាមសាលាឃុំសង្កាត់ និងសាលាក្រុងស្រុកទាំង៨ និងនៅតាមរមណីយដ្ឋាននានាក្នុងខេត្តផងដែរ៕

អត្ថបទ៖ ឈៀងថារិទ្ធ