ព័ត៌មានជាតិ

ក្នុង ១ ថ្ងៃ រាជធានីភ្នំពេញ មានតម្រូវការឈាមកើនឡើងដល់ ៣៥០ ប្លោក ស្មើនឹង ៧៥% នៅទូទាំងប្រទេស

បានផុស

២ years មុន

នៅ

ថ្ងៃព្រហស្បតិ៍ ១៨ មេសា ២០២៤

ដោយ

មន្ត្រីជាន់ខ្ពស់ នៃមជ្ឈមណ្ឌលជាតិផ្តល់ឈាម បានឱ្យដឹងថា ក្នុង ១ ថ្ងៃ នៅរាជធានីភ្នំពេញ មានត្រូវការឈាមប្រមាណពី ៣០០ ទៅ ៣៥០ ប្លោក មានការកើនឡើង ខណៈពីមុនមានត្រឹមតែ ២០០ ទៅ ២៥០ ប្លោក ប៉ុណ្ណោះ ក្នុង ១ ថ្ងៃ។

លោកស្រីវេជ្ជបណ្ឌិត មើក សាមាន អនុប្រធានមជ្ឈមណ្ឌលជាតិផ្តល់ឈាម បានមានប្រសាសន៍នៅព្រឹកថ្ងៃទី ១៨ មេសា នេះថា ការផ្គត់ផ្គង់ឈាមនៅរាជធានីភ្នំពេញមានប្រមាណ ៧៥% បើប្រៀបទូទាំងប្រទេស។ ចំណែកខេត្តទាំង ២៤ មានតម្រូវការឈាមត្រឹម ២៥% ប៉ុណ្ណោះ។

លោកស្រីវេជ្ជបណ្ឌិត បានបន្តថា «តម្រូវការឈាមប្រចាំថ្ងៃក្នុងរង្វង់ ៣០០ ទៅ ៣៥០ ប្លោក ក្នុងរាជធានី ហើយមជ្ឈមណ្ឌលក៏បានត្រៀមរួចហើយដែរ មិនខ្វះទេ ពីព្រោះមជ្ឈមណ្ឌលជាតិផ្តល់ឈាម បានប្រមូលឈាមពីយុវជនផ្តល់ឈាមស្ម័គ្រចិត្ត និងធ្វើតេស្តរួចបញ្ជូនស្តុកក្នុងទូពេទ្យរដ្ឋទាំងអស់ក្នុងរាជធានីភ្នំពេញ»។

លោកស្រីវេជ្ជបណ្ឌិត បានបន្តទៀតថា ជាក់ស្តែងនៅត្រីមាសទី ១ ឆ្នាំ ២០២៤ នេះ មជ្ឈមណ្ឌលជាតិទទួលបានអំណោយឈាមចំនួន ២៨ ១៩៩ ប្លោក កើនឡើងចំនួន ៤ ៩០៦ ប្លោក បើប្រៀបធៀបទៅនឹង ៣ ខែដូចគ្នា ឆ្នាំ ២០២៣ កន្លងទៅ មានត្រឹមតែ ២៣ ២៩៣ ប្លោក ប៉ុណ្ណោះ។

លោកស្រីវេជ្ជបណ្ឌិត បានបន្ថែមថា ប្លោកឈាមដែលទទួលបានមកពីការបរិច្ចាគឈាមទាំងនោះត្រូវបានយកទៅជួយសង្គ្រោះដល់ជនរងគ្រោះ និងអ្នកជំងឺដែលត្រូវការឈាមជាចាំបាច់ ដោយសារ ប្រទេសយើងធ្វើការវះកាត់ធំៗ តាមបច្ចេកទេសថ្មី ទំនើបច្រើនដូចជា ជំងឺមហារីក ជំងឺខ្សោយតម្រងនោម ជំងឺក្រពះ ពោះវៀន ថ្លើម សួត ខួរក្បាល បេះដូង ស្បូន ហូរឈាម គ្រោះថ្នាក់ចរាចរណ៍ ។ល។

លោកស្រីវេជ្ជបណ្ឌិត បានអំពាវនាវដល់ប្រជាពលរដ្ឋចូលរួមបរិច្ចាគឈាមឱ្យបានគ្រប់ៗ គ្នា ព្រោះថាការផ្តល់ឈាមពិតជាមានសារៈសំខាន់ណាស់ក្នុងការជួយសង្គ្រោះជនរងគ្រោះ និងអ្នកជំងឺដែលត្រូវការឈាម ដើម្បីព្យាបាលជំងឺ ហើយឈាមមានតែនៅក្នុងខ្លួនមនុស្សតែប៉ុណ្ណោះ មិនមានរោងចក្រណាអាចផលិតបានទេ។ រីឯមជ្ឈមណ្ឌលជាតិផ្តល់ឈាម ជាកន្លែងផលិតផលឈាមបញ្ជូនឈាមទៅស្តុក ដើម្បីសង្គ្រោះជីវិតអ្នកជំងឺ។

គួរបញ្ជាក់ថា ឆ្នាំ ២០២៣ ការផ្គត់ផ្គង់ឈាមទូទាំងប្រទេសបាន ១៤ ម៉ឺនប្លោក ក្នុងនោះមានអ្នកស្ម័គ្រចិត្តមាន ២០% ខណៈឆ្នាំ ២០២៤ នេះ មជ្ឈមណ្ឌលជាតិផ្តល់ឈាម មានតម្រូវការឈាមប្រមាណជាង ១៤ ម៉ឺនប្លោក មានកំណើនប្រមាណ ២០%៕

អត្ថបទ ៖ សំអឿន