ព័ត៌មានជាតិ
ក្រោយផ្ទុះរឿងអាស្រូវក្នុងអង្គភាពនគរបាលទេសចរណ៍ប្រចាំខេត្តសៀមរាប ថ្នាក់ដឹកនាំសាម៉ីជ្រើសរើសអ្នកថ្មីជំនួស
នៅព្រឹកថ្ងៃទី២៦ ខែមេសា ឆ្នាំ២០២៤ នៅសាលប្រជុំសាលាខេត្តសៀមរាប លោកវរសេនីយ៍ទោ ប៊ឹក បូភក្រ ត្រូវបានថ្នាក់ដឹកនាំសាម៉ីនៃអង្គភាពនគរបាលទេសចរណ៍ ប្រកាសឲ្យចូលកាន់មុខតំណែង បន្ទាប់ពីប្រធានអង្គភាពចាស់លោក ទី សុខឡែន ត្រូវបានដកចេញដោយសារការដឹកនាំមានរឿងអាស្រូវច្រើន។
លោក សំកុល សុចិត្រា អភិបាលរងខេត្ត ក៏បានជំរុញដល់ប្រធានថ្មីនៃអង្គភាពនគរបាលទេសចរណ៍ ត្រូវខិតខំធ្វើកិច្ចសហការជាមួយអង្គរភាពនានាដើម្បីថែរក្សាបាននូវសន្តិសុខសណ្តាប់ធ្នាប់ជូនភ្ញៀវទេសចរជាតិ អន្តរជាតិ ក៏ដូចជាថ្នាក់ដឹកនាំគ្រប់ជាន់ថ្នាក់។ ជាមួយគ្នានេះក៏ត្រូវខិតខំយកចិត្តទុកដាក់អនុវត្តឲ្យខានតែបាននូវរាល់បទបញ្ជា ផែនការណែនាំក៏ដូចជាផែនការការពារផ្សេងៗដែលថ្នាក់ដឹកនាំជាតិ ក៏ដូចជាថ្នាក់ដឹកនាំគណៈបញ្ជាការឯកភាពខេត្តបានដាក់ជូន។
លោកឧត្តមសេនីយ៍ឯក ប៊ុន ដា ប្រធាននាយកដ្ឋានកណ្តាលសណ្តាប់ធ្នាប់សាធារណៈ ដែលអញ្ជើញជាអធិបតីក្នុងពិធីប្រកាសនេះ បានមានប្រសាសន៍ថា នេះជាលើកទី៥ ហើយដែលអង្គភាពនគរបាលទេសចរណ៍ ប្រចាំខេត្តសៀមរាប បានធ្វើការតែងតាំងប្រធានអង្គភាពថ្មី ខណៈប្រធានអង្គភាពមុននេះ (លោក ទី សុខឡែន) កាន់តួនាទីបានត្រឹមរយៈពេល៨ខែប៉ុណ្ណោះ។ លោកថា ក្នុងពេល៨ខែ ការគ្រប់គ្រងអង្គភាពមួយ គឺក្តាប់មិនបានគ្រប់សភាពការណ៍ការងារនោះទេ ប៉ុន្តែដោយសារការដឹកនាំមានភាពមិនប្រក្រតីខ្លះទើបសម្រេចផ្លាស់ប្តូរចេញ។
លោកឧត្តមសេនីយ៍ ប៊ុន ដា រំពឹងថា ថ្នាក់ដឹកនាំអង្គភាពថ្មីនឹងពង្រឹងការងារ មានសាមគ្គីផ្ទៃក្នុងអង្គភាពល្អ ក៏ដូចជាសហការល្អជាមួយស្ថាប័នពាក់ព័ន្ធនានានៅក្នុងខេត្តសៀមរាប រក្សាបាននូវក្រមសីលធម៌ល្អ សំដៅលើកកម្ពស់តម្លៃកងកម្លាំងនគរបាលជាតិ ក៏ដូចជាលើកតម្លៃប្រជាទេសជាតិ ជាពិសេសខេត្តសៀមរាបដែលជាតំបន់ទេសចរណ៍ដ៏មានសក្តានុពលរបស់កម្ពុជា។
សូមរម្លឹកថា កាលពីពេលថ្មីៗនេះ លោកវរសេនីយ៍ទោ ទី សុខឡែន អត្តលេខ៦៨៤៣៩ ប្រធានអង្គភាពនគរបាល ទេសចរណ៍ប្រចាំខេត្តសៀមរាប ត្រូវបានមន្ត្រីក្រោមឱវាទ ធ្វើការស្នើសុំទៅអគ្គស្នងការនគរបាលជាតិ ដើម្បីសុំដកចេញពីតំណែង ដោយសារទង្វើររបស់លោកវរសេនីយ៍ទោ ទី សុខឡែន មិនយល់ពីតួនាទីភារកិច្ចរបស់ខ្លួន ធ្វើអោយមាន ការរិះគន់ពីស្ថានប័នពាក់ព័ន្ធ ភ្ញៀវទេសចរណ៍ និងមហាជន បណ្តាលអោយអាប់ឱនកិត្តិយសអង្គភាព ដែលពីមុនធ្លាប់មានការកោតសរសើរពីថ្នាក់ដឹកនាំគ្រប់ស្ថាប័ន និងថ្នាក់ដឹកនាំ ធ្វើអោយមន្ត្រីនៅក្នុងអង្គភាពបែកបាក់សាមគ្គីភាពផ្ទៃក្នុង និងអស់សេចក្តីទុកចិត្តគ្រប់ៗគ្នា ។
បន្ទាប់ពីមានការស្នើសុំនេះ អគ្គស្នងការនគរបាលជាតិ បានសម្រេចដកតួនាទីរបស់លោក ទី សុខឡែន ពីប្រធានអង្គភាពនគរបាលទេសចរណ៍ប្រចាំខេត្តសៀមរាប ដោយតែងតាំងលោក ប៊ឹក បូភក្រ ជំនួសវិញតែម្តង។
មហាជនសង្ឃឹមថា លោកវរសេនីយ៍ទោ ប៊ឹក បូភក្រ ដែលជាប្រធានអង្គភាពថ្មី នឹងអាចដឹកនាំកងកម្លាំងមួយនេះឲ្យបានល្អប្រសើរឡើងវិញ ចៀសវាង ទំនាស់ផ្ទៃក្នុង, បើកល្បែងស៊ីសងក្នុងអង្គភាព,កឹបកេងរបបសាំងរបស់របស់ថ្នាក់លើផ្តល់ឲ្យមន្ត្រីសម្រាប់បំពេញការងារ ជាដើម៕
អត្ថបទ៖ ជុន កុសល
-
ព័ត៌មានជាតិ៥ ថ្ងៃ ago
ស្ថានភាពធាតុអាកាសនៅកម្ពុជា ចាប់ថ្ងៃទី២ ដល់ថ្ងៃទី៤ ខែឧសភា ឆ្នាំ២០២៤
-
ព័ត៌មានជាតិ៦ ថ្ងៃ ago
ក្នុងករណីក្ដៅខ្លាំងលើស៤០អង្សារ សម្ដេចធិបតី ណែនាំឱ្យគណៈគ្រប់គ្រងសាលាផ្អាកការសិក្សាបន្ទាន់
-
សេដ្ឋកិច្ច១ ថ្ងៃ ago
ធនាគារ SinoPac ទិញយកគ្រឹះស្ថានមីក្រូហិរញ្ញវត្ថុអម្រឹតក្នុងទឹកប្រាក់ជាង៥០០លានដុល្លារ
-
ជីវិតកម្សាន្ដ២ ថ្ងៃ ago
ក្រោយលែងលះ តារាហុងកុង Roger សល់ទ្រព្យ ១១ លានដុល្លារ ខណៈអតីតភរិយាចុះចេញតែខ្លួន
-
ព័ត៌មានជាតិ៥ ថ្ងៃ ago
ប្រភពមន្រ្តីព្រលាន៖ មានភ្ញៀវជិះពេញ សម្ពោធជើងហោះហើររបស់ Air Asia Cambodia ទៅសៀមរាប
-
ព័ត៌មានអន្ដរជាតិ៦ ថ្ងៃ ago
ផ្ទុះរោងចក្រឈើនៅវៀតណាម ផ្តាច់ជីវិតមនុស្ស ៦នាក់
-
ព័ត៌មានជាតិ៥ ថ្ងៃ ago
សម្ដេចតេជោ ចោទសួរទៅកាន់វិទ្យុមួយថា តើល្ងង់មែនទេ ដែលវាយប្រហារភរិយាសម្ដេចធិបតី?
-
ជីវិតកម្សាន្ដ៥ ថ្ងៃ ago
តារាចម្រៀងហុងកុង Steven Cheung ធ្លាក់ខ្លួនខ្លាំង សូម្បីលុយបង់ភ្លើងក៏គ្មានផង