ដំណើរការបោះឆ្នោតជ្រើសរើសក្រុមប្រឹក្សាខេត្តក្រុងស្រុកនៅខេត្តកោះកុង ប្រព្រឹត្តទៅដោយរលូន

ទិដ្ឋភាព នៃដំណើរការបោះឆ្នោតជ្រើសរើសក្រុមប្រឹក្សាខេត្តក្រុងស្រុកនៅខេត្តកោះកុង បានរៀបចំប្រព្រឹត្តទៅដោយភាពល្អប្រសើរ គ្មានឧបសគ្គអ្វីមករំខាននោះទេ ដោយក្រុមការងារលេខាធិការដ្ឋានរៀបចំបោះឆ្នោតកំពុងផ្ទៀងផ្ទាត់លទ្ធផលបឋម។

លោក សេង ណេង ប្រធានលេខាធិការដ្ឋានរៀបចំបោះឆ្នោតខេត្តកោះកុង ថ្លែងនៅថ្ងៃទី២៦ ឧសភា នេះថា គ្មានបញ្ហាអ្វីនោះទេចំពោះដំណើរការបោះឆ្នោតជ្រើសរើសក្រុមប្រឹក្សាខេត្តក្រុងស្រុក អាណត្តិទី៤ នៅខេត្តកោះកុង ដោយប្រព្រឹត្តក្រោមបរិយាកាសសន្តិសុខសណ្តាប់ធ្នាប់បានយ៉ាងល្អប្រសើរបំផុត។

លោក ប្រធានលេខាធិការដ្ឋានរៀបចំបោះឆ្នោតខេត្តកោះកុង អះអាងថា អង្គបោះឆ្នោតទាំង ១៦៧ រូប បានអញ្ជើញមកបោះឆ្នោតគ្រប់ៗគ្នាគ្មាននរណាម្នាក់អវត្តមានឡើយ។ ជាក់ស្តែងដំណើរការបោះឆ្នោតជ្រើសរើសក្រុមប្រឹក្សាខេត្តក្រុងស្រុក បានផ្តើមតាំងពី ម៉ោង ៧ ដល់ម៉ោងជិត ១០ព្រឹក ទើបអស់អង្គបោះឆ្នោត និងរាប់សន្លឹកបោះឆ្នោត។ រីឯលទ្ធផលបឋមនៃការបោះឆ្នោត ក្រុមការងារកំពុងអនុវត្តនីតិវិធីពិនិត្យផ្ទៀងផ្ទាត់លម្អិត។

ខេត្តកោះកុង មានការិយាល័យចំនួន៧ និងគណបក្សនយោបាយចំនួន៣ចូលរួមប្រកួតប្រជែង អាណត្តិទី៤ ក្នុងនោះ ទី១គណបក្សប្រជាជនកម្ពុជា ទី២ គណបក្សឆន្ទៈខ្មែរ និងទី៣គណបក្សកម្លាំងជាតិ៕