ព័ត៌មានជាតិ

អភិបាលខេត្តកោះកុង ហាមមន្ត្រី ដាច់ខាតមិនត្រូវគេចវេះការធ្វើតេស្តរកសារធាតុញៀន

បានផុស

១០ ខែ មុន

នៅ

ថ្ងៃសុក្រ ៣១ ឧសភា ២០២៤

ដោយ

លោកស្រីអភិបាលខេត្តកោះកុង បានហាមប្រាមមន្ត្រីក្រោមឱវាទ ដាច់ខាតមិនត្រូវគេចវេះចំពោះការធ្វើតេស្តរហ័សរកសារធាតុញៀន ករណីមន្ត្រីរូបណាមិនចូលរួមក្នុងការធ្វើតេស្ត នោះនឹងចាត់ការតាមច្បាប់ជាធរមាន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការព្រមានរបស់លោកស្រី មិថុនា ភូថង អភិបាលខេត្តកោះកុង យ៉ាងដូច្នេះ នៅថ្ងៃទី ៣១ ខែឧសភា ឆ្នាំ ២០២៤ ធ្វើឡើងស្របពេលមានថ្នាក់ដឹកនាំ និងមន្ត្រីរាជការខេត្តសរុបចំនួន ១២៤ នាក់ បានចូលធ្វើតេស្តរកសារធាតុញៀន។

លោកស្រីអភិបាលខេត្តកោះកុង ពន្យល់ដែរថា ការធ្វើតេស្តរហ័សរកសារធាតុញៀននេះ គឺឆ្លើយតបនឹងការអនុវត្តគោលការណ៍ដឹកនាំ“សម្អាតផ្ទះយើង”របស់ សម្តេចធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា។

លោកស្រី មិថុនា ភូថង ក៏រំលេចទៀតថា ប្រសិនបើថ្ងៃនេះ អំឡុងពេលធ្វើតេស្ត នៅមានមន្ត្រីរូបណាមានជាប់បំពេញបេសកកម្មផ្លូវការខានពុំបាន ទៅក្រៅខេត្ត ឬតាមស្រុក មន្ត្រីរូបនោះ ត្រូវស្នើសុំធ្វើតេស្តរហ័សរកសារធាតុញៀនតាមទឹកមូត្រ ជាមួយរដ្ឋបាលក្រុងស្រុក ដែលជាជម្រើសមួយទៀត។

ទន្ទឹមនោះ លោកស្រីអភិបាលខេត្តកោះកុង ក៏ស្នើដល់ក្រុមការងារបច្ចេកទេស ត្រូវកត់ត្រាឱ្យបានច្បាស់លាស់ចំពោះមន្ត្រីដែលកំពុងសម្រាកព្យាបាលជំងឺ មិនអាចមកធ្វើតេស្តបាន ដើម្បីទុកពេលវេលាសមស្របណាមួយសម្រាប់ឱ្យពួកគាត់បានមកធ្វើតេស្តរហ័ស ស្របតាមបទបញ្ជា និងសេចក្ដីណែនាំរបស់ថ្នាក់លើ។

លោកស្រីអភិបាលខេត្ត ជឿជាក់ថា ការធ្វើតេស្តរហ័សរកសារធាតុញៀនតាមទឹកមូត្រដល់ថ្នាក់ដឹកនាំ និងក្រុមមន្ត្រីរាជការរដ្ឋបាលខេត្តនៅពេលនេះ ចាំបាច់ធ្វើយ៉ាងណាឱ្យមានតម្លាភាព និងមានប្រសិទ្ធភាព ពិសេសក៏សូមស្នើដល់ថ្នាក់ដឹកនាំ មន្ត្រីរាជការ និងមន្ត្រីជាប់កិច្ចសន្យាទាំងអស់ ចូលរួមសហការឱ្យបានល្អប្រសើរក្នុងពេលដំណើរការធ្វើតេស្តនេះផងដែរ៕

អត្ថបទ ៖ សិរីវឌ្ឍនៈ