នគរបាលខេត្តស្វាយរៀង បង្ក្រាបករណីឆបោកក្រោមរូបភាពដាក់ប្រាក់វិនិយោគ

កម្លាំងការិយាល័យប្រឆាំងបទល្មើសបច្ចេកវិទ្យា នៃស្នងការនគរបាលខេត្តស្វាយរៀង បានស្រាវជ្រាវឃាត់ខ្លួនជនសង្ស័យចំនួន២នាក់ ពាក់ព័ន្ធករណីឆបោកប្រាក់ក្រោមរូបភាពដាក់ប្រាក់វិនិយោគដែលផ្តល់ប្រាក់ចំណេញច្រើនត្រលប់មកវិញ។ ការឃាត់ខ្លួននេះបានធ្វើឡើងកាលពីថ្ងៃទី៦ ខែមីថុនា ឆ្នាំ២០២៤ បន្ទាប់ពីជនសង្ស័យបានធ្វើសកម្មភាពជាច្រើនករណី។

តាមរបាយការណ៍របស់អគ្គស្នងការដ្ឋាននគរបាលជាតិ​ បានឲ្យដឹងថា ជនសង្ស័យជាសហចារីដែលប្រើប្រាស់គណនីធនាគាររបស់ខ្លួនផ្ទាល់ជាមធ្យោបាយ សម្រាប់ទទួលប្រាក់ឆបោកពីអ្នកវិនិយោគផ្សេងៗ រួចផ្ទេរប្រាក់ទាំងនោះទៅឱ្យបក្ខពួករបស់ខ្លួនតាមរយៈគណនីធនាគារជាច្រើន។ បក្ខពួករបស់ជនសង្ស័យប្រើប្រាស់បណ្តាញសង្គម ដោយនិយាយលួង​លោមជនរងគ្រោះឱ្យជឿជាក់ ព្រមដាក់ប្រាក់វិនិយោគ។

ជនសង្ស័យត្រូវបានកម្លាំងការិយាល័យជំនាញ បានកសាងសំណុំរឿងបញ្ជូនទៅកាន់សាលាដំបូងខេត្ត ដើម្បីចាត់ការតាមផ្លូវច្បាប់ ព្រមទាំងបានចេញដីកាឃុំខ្លួនរួចហើយ។ ជាមួយគ្នានេះ ការិយាល័យប្រឆាំងបទល្មើសបច្ចេកវិទ្យា ក៏បានក្រើនរម្លឹកដល់ប្រជាពលរដ្ឋទាំងអស់ឱ្យមានការប្រុងប្រយ័ត្នខ្ពស់ ក្នុងការជឿទុកចិត្តលើជនមិនស្គាល់អត្តសញ្ញាណច្បាស់លាស់ តាមរយ:បណ្តាញសង្គមក្នុងការវិនិយោគ និងការផ្ទេរប្រាក់ណាមួយដែលមិនមានប្រភពច្បាស់លាស់៕