មន្ត្រីជំនាញជំរុញឲ្យម្ចាស់ក្បាលដីនៅស្រុកប្រាសាទបាគង មកផ្ទៀងផ្ទាត់ទិន្នន័យឲ្យច្បាស់មុនមន្ត្រីចេញប័ណ្ណកម្មសិទ្ធឱ្យ

មន្ត្រីជំនាញ នៃមន្ត្រីរៀបចំដែនដីខេត្តសៀមរាប បានជំរុញដល់ប្រជាពលរដ្ឋជាម្ចាស់ក្បាលដីទាំង៣ភូមិ ក្នុងឃុំកណ្តែក ស្រុកប្រាសាទបាគង ខេត្តសៀមរាប អញ្ជើញមកពិនិត្យ និងផ្ទៀងផ្ទាត់ទិន្នន័យក្បាលដី ព្រំប្រទល់ឱ្យបានត្រឹមត្រូវមុនពេលដែលប្លង់ដី ត្រូវបានមន្ត្រីជំនាញចេញប្លង់កម្មសិទ្ធជូន។

ក្នុងពិធីធ្វើការបិទផ្សាយជាសាធារណៈ នូវឯកសារនៃការវិនិច្ឆ័យរួមមានប្លង់សុរិយោដី និងបញ្ជីឈ្មោះអ្នកកាន់កាប់ដី ក្នុងភូមិចំនួន៣ គឺមានភូមិគោកធ្លក ភូមិត្រពាំងទឹម និងភូមិឃុនមោឃ ក្នុងឃុំកណ្តែក នាថ្ងៃទី១២ ខែមិថុនា ឆ្នាំ២០២៤នេះ លោក ស៊ុន សុជាតិ អនុប្រធានមន្ទីររៀបចំដែនដីខេត្តសៀមរាប បានណែនាំដល់ម្ចាស់ក្បាលដី ពិនិត្យឲ្យត្រឹមត្រូវចំពោះទិន្នន័យក្បាលដីរបស់ខ្លយនដែលមានក្នុងឯកសារ នៃការវិនិច្ឆ័យ ដើម្បីបញ្ជាក់ពីភាពត្រឹមត្រូវ ឬខុសឆ្គងដែលត្រូវកែតម្រូវ ឬជំទាស់លើទិន្នន័យទាំងនោះ។ ការបិទផ្សាយនេះរយៈពេល១៥ថ្ងៃ ចាប់ពីថ្ងៃទី១២ ដល់ទី២៦ ខែមិថុនា ក្នុងបរិវេនវត្តអរញ្ញរង្សី ហៅវត្តល្អក់។ ក្នុងរយៈពេលនេះ គឺ ប្រជាពលរដ្ឋអាចប្តឹង ឬជំទាស់តវ៉ាមកក្រុមមន្ត្រីជំនាញ ដែលនៅប្រចាំការជាប្រចាំដោយមិនគិតពីថ្ងៃឈប់សម្រាក ប្រសិនបើក្នុងករណីរកឃើញថាមានកំហុសណាមួយលើទិន្ន័យក្បាលដីរបស់ខ្លួន សូមរាយការណ៍មកមន្ត្រីជំនាញ ដើម្បីធ្វើការកែសម្រួលអោយបានត្រឹមត្រូវឡើងវិញ។

លោក សូរ ប្លាតុង អភិបាលស្រុកប្រាសាទបាគង មានប្រសាសន៍ថា ការបិទផ្សាយជាសាធារណៈនូវឯកសារនៃការវិនិច្ឆ័យក្នុងការចុះបញ្ជីដីធ្លី ដែលមានលក្ខណៈជាប្រព័ន្ធ គឺពិតជាមានសារៈសំខាន់ណាស់ក្នុងដំណើរនៃការចេញប័ណ្ណកម្មសិទ្ធិដីធ្លីជូនប្រជាពលរដ្ឋបានត្រឹមត្រូវ និងដើម្បីអោយម្ចាស់ដី និងអ្នកកាន់កាប់ដីទាំងអស់មកចូលរួមពិនិត្យផ្ទៀងផ្ទាត់ និងធ្វើការកែតម្រូវក្នុងករណីពិនិត្យទៅឃើញថាមានកំហុសឆ្គងត្រូវ ដាក់ពាក្យចូលមកគណៈកម្មការរដ្ឋបាល បើពិនិត្យឃើញថា មានកំហុសឆ្គងឬមានបណ្តឹងតវ៉ា ក្នុងករណីដែលក្បាលដីណាមានវិវាទ។

លោកបន្តថា ការបិទផ្សាយនាពេលនេះដែរ ជាលទ្ធផល និងសក្ខីភាពដែលបញ្ជាក់ប្រាប់ ប្រជាពលរដ្ឋទាំងអស់ បានចុះបញ្ជីដីមានលក្ខណៈជាប្រព័ន្ធ ដើម្បីកាត់បន្ថយទំនាស់ ហើយមិនត្រឹមតែប៉ុណ្ណោះការចុះបញ្ជីដីធ្លីមានលក្ខណះជាប្រព័ន្ធនេះ គឺឈានទៅដល់ការផ្តល់ប័ណ្ណកម្មសិទ្ធិដែលត្រូវបានការពារដោយច្បាប់ និងធានាដោយរដ្ឋ ហើយក៏គ្មានបុគ្គលណាមួយត្រូវបានគេដកហូតកម្មសិទ្ធិរបស់ខ្លួនបានទេប្រសិនបើការដកហូតនេះមិនមែន ដើម្បីប្រយោជន៍សាធារណៈ។ ក្នុងនោះក៏សូមឲ្យអាជ្ញាធរឃុំភូមិ និងស្ថាប័នពាក់ព័ន្ធ រួមទាំង ពលរដ្ឋទាំងអស់ពេលត្រឡប់ទៅលំនៅដ្ឋានវិញ សូមបន្តធ្វើការផ្សព្វផ្សាយដល់ ប្រជាពលរដ្ឋឱ្យបានដឹងគ្រប់ៗគ្នា ព្រមទាំងអញ្ជើញមកពិនិត្យផ្ទៀងផ្ទាត់ទិន្នន័យដែលក្រុមការងារចុះបញ្ជីដីធ្លីមាន មានលក្ខណៈជាប្រព័ន្ធរបស់មន្ទីររៀបចំដែនដីនគរូបនីយកម្ម និងសំណង់ខេត្តសៀមរាប ដែលកំពុងតែបានអនុវត្តតាមនីតិវិធីអោយបានគ្រប់ៗគ្នាផងដែរ៕

អត្ថបទ៖ គឿនវេត