ទោះបីកម្ពុជាត្រូវបានដកចេញពីបញ្ជីប្រផេះនៃការលាងលុយកង្វក់ ប៉ុន្តែត្រូវពង្រឹងការបង្ក្រាប

ទោះបីជាកម្ពុជា ត្រូវបានដកចេញពីបញ្ជីពណ៌ប្រផេះរបស់ក្រុមការងារសកម្មភាពហិរញ្ញវត្ថុ (FATF) នៃបណ្តាប្រទេសលាងលុយកង្វក់ក៏ដោយ ប៉ុន្តែលោក ស ថេត អគ្គស្នងការនគរបាលជាតិ កំពុងជំរុញឱ្យក្រុមការងារបន្តពង្រឹងសមត្ថភាពរបស់ខ្លួន និងផ្តោតលើការងារប្រឆាំងការសម្អាតប្រាក់ហិរញ្ញប្បទានភេរវកម្មឱ្យកាន់តែមានប្រសិទ្ធភាព ។

ការជំរុញជាថ្មីនេះ ធ្វើឡើងនាឱកាសនាយឧត្តមសេនីយ៍ ស ថេត អញ្ជើញជាអធិបតី ពិធីប្រកាសផ្ទេរភារកិច្ច និងតែងតាំងមុខតំណែងនាយនគរបាលថ្នាក់ឧត្តមសេនីយ៍ ព្រមទាំងកិច្ចប្រជុំប្រចាំខែ និងផ្សព្វផ្សាយសភាពការណ៍ថ្មីៗ របស់អគ្គស្នងការដ្ឋាននគរបាលជាតិ កាលពីថ្ងៃទី​១៧ ខែមិថុនា ឆ្នាំ ២០២៤។

ក្នុងឱកាសនោះលោក ស ថេត​ បានថ្លែងដោយកត់សម្គាល់នូវសមិទ្ធផលសំខាន់ៗមួយចំនួន ដែលកងកម្លាំងនគរបាលសម្រេចបានដោយជោគជ័យ នាពេលកន្លងមក ក្នុងនោះ ការប្រឆាំងការសម្អាតប្រាក់ហិរញ្ញប្បទានភេរវកម្ម បង្ក្រាបបាន៥ករណី ​និងចាប់ខ្លួនមនុស្ស១៦នាក់ បញ្ជូនទៅតុលាការ។
យ៉ាងណាមិញ លោកក្រើនរំឭកថា៖« ការងារនេះកន្លងទៅទទួលបានការកោតសរសើរ និងអរគុណចំពោះមន្ដ្រីដែលបានខិតខំ ទោះបីការបណ្ដុះបណ្ដាលរយៈពេលខ្លី តែមានសមត្ថភាពខ្ពស់ រហូតដល់អង្គការឃ្លាំមើលការលាងលុយ និងឧក្រិដ្ឋកម្មហិរញ្ញវត្ថុអន្តរជាតិ(FATF) ដកកម្ពុជាចេញពីបញ្ជីប្រផេះ។ ដូចនេះសូមឱ្យក្រុមការងារបន្តធ្វើកិច្ចការងារនេះឱ្យមានប្រសិទ្ធភាពបន្ថែមទៀត»។

គួររំឭកថា អង្គការហ្វាត (FATF) ដែលមានមូលដ្ឋាននៅទីក្រុងប៉ារីស ​ប្រទេសបារាំង បានប្រកាសដកប្រទេសកម្ពុជាចេញពីបញ្ជីប្រផេះ​ នៃក្រុមប្រទេសដែលមានហានិភ័យខាងលាងលុយកខ្វក់​ កាលពីខែកុម្ភៈ ឆ្នាំ២០២៣។ អង្គការនេះ​ ធ្លាប់ដាក់កម្ពុជាឱ្យស្ថិតក្នុងបញ្ជីប្រផេះ​ នៃក្រុមប្រទេសដែលមានហានិភ័យខាងលាងលុយកខ្វក់អស់រយៈពេល៤ឆ្នាំជាប់ៗគ្នា ចាប់តាំងពីឆ្នាំ២០១៩ មក៕

អត្ថបទ៖ ឡាយ សាមាន