Connect with us

ព័ត៌មានជាតិ

ប្រមុខការទូត ថា កម្ពុជានឹងបន្តពង្រឹងកិច្ចសហប្រតិបត្តិការថែមទៀតជាមួយអង្គការសុខភាពពិភពលោក

បានផុស

នៅ

ប្រមុខការទូតកម្ពុជា លោក សុខ ចិន្តាសោភា បានបង្ហាញអំពីការប្តេជ្ញាចិត្តរបស់កម្ពុជាក្នុងការបន្តពង្រឹងកិច្ចសហប្រតិបត្តិការជាមួយអង្គការសុខភាពពិភពលោកឱ្យកាន់តែជិតស្និទ្ធ សំដៅលើកកម្ពស់សុខភាព និងសុខុមាលភាពរបស់ប្រជាជនកម្ពុជា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការលើកឡើងរបស់ប្រមុខការទូតកម្ពុជា ក្នុងឱកាសទទួលជួបជាមួយលោកវេជ្ជបណ្ឌិត សាយអា ម៉ាអ៊ូ ព្យូកាឡា នាយកអង្គការសុខភាពពិភពលោកប្រចាំតំបន់ប៉ាស៊ីហ្វិកខាងលិច ចូលជួបសម្តែងការគួរសម និងពិភាក្សាការងារ នៅទីស្តីការក្រសួង។ កាលពីថ្ងៃទី២១ ខែមិថុនា ឆ្នាំ២០២៤។

លោក សុខ ចិន្តាសោភា ឧបនាយករដ្ឋមន្ត្រី រដ្ឋមន្ត្រីការបរទេសកម្ពុជា បានអបអរសាទរវេជ្ជបណ្ឌិត ព្យូកាឡា ដែលបានជាប់ឆ្នោត និងត្រូវបានតែងតាំងជានាយកអង្គការសុខភាពពិភពលោកប្រចាំតំបន់ កាលពីខែមករា ឆ្នាំ២០២៤។ លោកឧបនាយករដ្ឋមន្រ្តី បានថ្លែងកោតសរសើរចំពោះកិច្ចខិតខំប្រឹងប្រែងរបស់អង្គការសុខភាពពិភពលោកក្នុងការលើកកម្ពស់សុខភាពសកល និងថ្លែងអំណរគុណដល់ការគាំទ្រជាបន្តបន្ទាប់ និងការរួមចំណែករបស់អង្គការនេះ ក្នុងការលើកកម្ពស់សុខភាពសាធារណៈនៅកម្ពុជា។

លោក សុខ ចិន្តាសោភា បានបញ្ជាក់សាជាថ្មីអំពីអាទិភាពចម្បងរបស់រាជរដ្ឋាភិបាលកម្ពុជាអាណត្តិនេះ ក្នុងការពង្រីកការផ្តល់សេវាសុខាភិបាលឆ្ពោះទៅការគ្របដណ្តប់សុខភាពជាសកល ដែលផ្តោតលើការពង្រីកការគ្របដណ្តប់នៃប្រព័ន្ធគាំពារសុខភាពសង្គម និងការពង្រឹងសមត្ថភាពថែទាំបឋមនៅមណ្ឌលសុខភាព និងមន្ទីរពេទ្យបង្អែកស្រុក ព្រមទាំងការលើកកម្ពស់គុណភាពសេវាថែទាំសុខភាព។ ក្នុងន័យនេះ លោកប្រមុខការទូតកម្ពុជា បានបង្ហាញអំពីការប្តេជ្ញាចិត្តរបស់កម្ពុជាក្នុងការបន្តពង្រឹងកិច្ចសហប្រតិបត្តិការជាមួយអង្គការសុខភាពពិភពលោកឱ្យកាន់តែជិតស្និទ្ធ សំដៅលើកកម្ពស់សុខភាព និងសុខុមាលភាពរបស់ប្រជាជនកម្ពុជា។

លោកវេជ្ជបណ្ឌិត ព្យូកាឡា ជម្រាបជូនលោកឧបនាយករដ្ឋមន្រ្តី អំពីការអនុម័តលើ WHO Fourteenth General Programme of Work (GPW14) ដែលជាទិសដៅយុទ្ធសាស្រ្តរបស់អង្គការសុខភាពពិភពលោក សម្រាប់ឆ្នាំ ២០២៥-២០២៨ នាមហាសន្និបាតសុខភាពពិភពលោក លើកទី៧៧ ដែលបានប្រព្រឹត្តទៅកាលពីពេលថ្មីៗនេះនៅទីក្រុងហ្សឺណែវ និងវឌ្ឍនភាពនៃសេចក្តីព្រាងចក្ខុវិស័យគាំទ្រសុខភាពគ្រួសារ សហគមន៍ និងសង្គមនៅក្នុងតំបន់ប៉ាស៊ីហ្វិកខាងលិច។

លោកវេជ្ជបណ្ឌិត ក៏បានជម្រាបជូនលោកឧបនាយករដ្ឋមន្រ្តី អំពីសេចក្តីព្រាងយុទ្ធសាស្ត្រសហប្រតិបត្តិការកម្ពុជា-អង្គការសុខភាពពិភពលោក ២០២៤-២០២៨ ដែលកំពុងស្ថិតក្នុងការពិនិត្យចុងក្រោយ។ លោកវេជ្ជបណ្ឌិត បានកោតសរសើរកម្ពុជាដែលបានរួមចំណែកក្នុងការពង្រឹងសុខភាពសកល ជាពិសេសសមិទ្ធផលដ៏សំខាន់ក្នុងអំឡុងពេលកូវីដ-១៩ និងបង្ហាញអំពីឆន្ទៈក្នុងការបន្តកិច្ចសហប្រតិបត្តិការ និងត្រៀមខ្លួនរួចជាស្រេចក្នុងការផ្តល់ការគាំទ្រកម្ពុជាឱ្យស្របតាមតម្រូវការ និងបរិបទនៅក្នុងប្រទេស៕

Helistar Cambodia - Helicopter Charter Services
Sokimex Investment Group

ចុច Like Facebook កម្ពុជាថ្មី

សន្តិសុខសង្គម១៤ នាទី មុន

ជនដៃដល់ក្នុងសំណុំរឿងចាក់សម្លាប់ក្នុងវង់ផឹកស៊ីត្រូវបានចាប់ខ្លួន

ព័ត៌មានជាតិ១៥ ម៉ោង មុន

វត្តតិក្ខប្បញ្ញោ រៀបចំពិធីសិតទៀនព្រះវស្សា និងបុណ្យផ្កាប្រាក់សាមគ្គី ដោយមានពុទ្ធបរិស័ទចូលរួមច្រើនកុះករ

ព័ត៌មានជាតិ១៥ ម៉ោង មុន

លោក ឃួង ស្រេង៖ រដ្ឋាភិបាលបានកំណត់យ៉ាងច្បាស់ពីតម្លៃដ៏សំខាន់របស់ព្រៃឈើដែលមិនអាចកាត់ផ្តាច់ចេញពីវិស័យអាទិភាពរបស់រដ្ឋ

សេដ្ឋកិច្ច១៥ ម៉ោង មុន

ក្រុមហ៊ុនខ្នាតយក្សផលិតរថយន្តអគ្គិសនី AION សម្ពោធរោងចក្រជាផ្លូវការនៅប្រទេសថៃ

ព័ត៌មានជាតិ១៥ ម៉ោង មុន

អាជ្ញាធរខេត្តកំពត បន្តដាំដើមត្នោត ៤,៥ ពាន់ដើម លើផ្លូវខ្សែក្រវ៉ាត់ព្រំដែន កម្ពុជា-វៀតណាម

Sokha Hotels

ព័ត៌មានពេញនិយម