អភិបាលភ្នំពេញ៖ រាជធានី គ្រប់គ្រងមុខសញ្ញា កូវីដ-១៩ ក្នុងព្រឹត្តិការណ៍២០កុម្ភៈ បានល្អ

ភ្នំពេញ៖ អភិបាលនៃគណៈអភិបាលរាជធានីភ្នំពេញ បានបញ្ជាក់ឱ្យដឹងថា គិតមកដល់ព្រឹកថ្ងៃទី០១ មិនា ឆ្នាំ២០២១នេះ ក្រុមការងារចម្រុះរដ្ឋបាលរាជធានីភ្នំពេញបានគ្រប់គ្រងមុខសញ្ញា កូវីដ-១៩ក្នុង ព្រឹត្តិការណ៍សហគមន៍ ២០កុម្ភៈ បានយ៉ាងល្អហើយ ខណៈដែល៧៨ទីតាំងត្រូវបាន និងកំពុងគ្រប់គ្រង ដោយបិទការចេញ ចូលដើម្បីសុវត្ថិភាពកុំឱ្យមានការឆ្លងរីករាលដាលជំងឺកូវីដ-១៩ក្នុងព្រឹត្តិការណ៍សហគមន៍២០កុម្ភៈនេះ។

លោក ឃួង ស្រេង អភិបាលនៃគណៈអភិបាលរាជធានីភ្នំពេញ បានមានប្រសាសន៍ថា ក្រោមការដឹកនាំរបស់សម្ដេចអគ្គមហាសេនាបតីតេជោហ៊ុនសែន អាជ្ញាធររាជធានី ជាមួយនឹងគណៈកម្មការប្រយុទ្ធប្រឆាំងជម្ងឺកូវីដ-១៩ បានអនុវត្តការងារនេះបានយ៉ាងល្អ ដោយមិនបានបិទរាជធានីភ្នំពេញទាំងមូល ធ្វើឱ្យប៉ះពាល់ដល់សេដ្ឋកិច្ច ប្រទេសនោះទេ គឺរដ្ឋបាលរាជធានីបានបិទតែទីតាំងដែលប្រឈមខ្លាំងតែប៉ុណ្ណោះ ហើយសេដ្ឋកិច្ចរនៅរក្សាដដែល។
លោកឃួង ស្រេងបន្តថា ការអនុវត្តការងារបានយ៉ាងល្អ និងជោគជ័យកន្លងមកនេះ គឺដោយសារតែកងកម្លាំង អាជ្ញាធរមានសមត្ថកិច្ចទាំងអស់របស់យើងបានបំពេញការងារដោយការយកចិត្តទុកដាក់ និងទទួលខុសត្រូវខ្ពស់ ទៅតាមការណែនាំរបស់សម្ដេចតេជោ។ តែអ្វីដែលជាកត្តាជោគជ័យបំផុតនោះគឺការចូលរួមពីសំណាក់បងប្អូនប្រជាពលរដ្ឋទាំងអស់នៅរាជធានីភ្នំពេញ ។

លោក ឃួន ស្រេង បានបញ្ជាក់ថា ជាក់ស្តែងនៅពេលឆ្លងរីករាលដាលជំងឺកូវីដ-១៩ ក្នុងព្រឹត្តិការណ៍សហគមន៍២០កុម្ភៈនេះ ខណៈ ដែលក្រុមការងារទៅយកមុខសញ្ញាដែលពាក់ព័ន្ធនឹងជំងឺកូវីដ-១៩នោះ ប្រជាពលរដ្ឋក្បែរខាង តែងបានផ្តល់ព័ត៌មានជុំវិញជនសង្ស័យទាំងនោះ ថាជនសង្ស័យនោះបានទៅទីនេះ ទីនោះ ដែលអាចឱ្យក្រុមការងារគ្រប់គ្រងមុខសញ្ញានេះបានល្អ និងជោគជ័យ ពោលគឺកាលពីថ្ងៃទី២៤ កុម្ភៈ អ្នកមានវិជ្ជមានកូវីដ-១៩នៅរាជធានីភ្នំពេញ ក្នុងព្រឹត្តិការណ៍សហគមន៍២០កុម្ភៈនេះ១ថ្ងៃមានរហូតដល់៦៥នាក់ តែសម្រាប់ថ្ងៃទី០១ មិនានេះ អ្នកមានវិជ្ជមានកូវីដ-១៩នៅរាជធានីភ្នំពេញ ក្នុងព្រឹត្តិការណ៍សហគមន៍២០កុម្ភៈនេះ បានថយចុះមកត្រឹមចំនួនត០៩នាក់ប៉ុណ្ណោះ។

​
ការលើកឡើងខាងលើនេះ របស់លោកឃួង ស្រេងបានធ្វើឡើងក្នុងពិធីសំណាល និងពិភាក្សាការងារ ជាមួយ អ្នកឧកញ៉ា គិត ម៉េង ប្រធានក្រុមហ៊ុន Royal group និង ជា ប្រធានក្រុមប្រឹក្សាធនាគារ Wing នាព្រឹកថ្ងៃទី០១មិនានេះ ខណៈអ្នកឧកញ៉ា គិត ម៉េង
ប្រគល់ថវិការ ១០០០០០ ដប់ម៉ឺនដុល្លាសហរដ្ឋអាមេរិកដល់មូលនិធិត្រីចក្រយានកម្ពុជា( ស៊ីក្លូ) នៅសាលារាជធានីភ្នំពេញ។
អ្នកឧកញ៉ា គិត ម៉េង បានបញ្ជាក់ថា មូលនិធិនេះជាគំនិតផ្តួចផ្តើមរបស់ប្រមុខរាជរដ្ឋាភិបាលកម្ពុជា សម្តេចតេជោ ហ៊ុន សែន នាយករដ្ឋមន្រ្តីនៃព្រះរាជាណាចក្រកម្ពុជា ដែលជាការរួមចំណែកដល់ជីវភាពអ្នកធាក់ស៊ីក្លូក្នុងរាជធានីភ្នំពេញដែលមានជីវភាព នៅមានកម្រិតឱ្យទទួលបានការហូបចុក និងការរស់នៅដោយសមរម្យ។
ក្នុងឱកាសនោះដែរ អ្នកឧកញ៉ា គិត ម៉េង បានកោតសរសើរ ចំពោះការដឹកនាំការងាររបស់រដ្ឋបាលរាជធានីភ្នំពេញ និង បណ្តាខណ្ឌទាំង១៤ ដែលបានជួយគិតគូរពីសុខភាព ពលរដ្ឋពាក់ព័ន្ធនឹងបញ្ហាកូវីត-១៩ និង ម៉្យាងទៀត ក៏ជួយសម្របសម្រួលដល់វិស័យ ឯកជនក្នុងការប្រកបរបររកស៊ីក្នុងរាជធានីភ្នំពេញ៕

អត្ថបទ៖ ស្រីរ័ត្ន

សូមអានអត្ថបទពាក់ព័ន្ធ៖
អ្នក​រត់​កង់បី​ ​មានលំនៅ នៅ​ច្បារអំពៅ ឆ្លងកូវីដ ១៩ បាន​ទៅចូលរួម​​កម្មវិធី​ឡើង​ផ្ទះនៅ​ត្បូងឃ្មុំ

ស្រ្តីខ្មែរ​អាយុ ២២ ឆ្នាំ​នៅ​រាជធានីភ្នំពេញ​ ឆ្លងកូវីដ-១៩