សមត្ថកិច្ចចាប់បានសាច់បង្កក លួចនាំចូលជាង ៤ តោន

សមត្ថកិច្ចបានចាប់បង្ក្រាប និងដុតកម្ទេចចោលនូវសាច់បង្កកចំនួន ៤ ៣២៩ តោន នៅពីរកន្លែងផ្សេងគ្នា ដែលក្នុងនោះរួមាន មឹក ចំនួន ១ ២១០ គីឡូក្រាម ពោះវៀនជ្រូក ១ ៩២៩ គីឡូក្រាម ដែលត្រូវបានបង្ក្រាប​ដោយ​មន្ត្រីការិយាល័យ​គយ និងរដ្ឋាករដូង នៃសាខាគយ និងរដ្ឋាករខេត្តស្វាយរៀង និងចុងស្លាបមាន់បង្កកជាង ២០០ គីឡូក្រាមនាំមកពីប្រទេសថៃ។

សមត្ថកិច្ចចាប់បានសាច់បង្កកនាំចូលខុសច្បាប់ នៅក្នុងភូមិសាស្ត្រឃុំអណ្តូងពោធិ ស្រុករមាសហែក ខេត្តស្វាយ​រៀង នាពេលដឹកជញ្ជូនតាមម៉ូតូសណ្តោងរ៉ឺម៉ក ៣ គ្រឿង លួចលាក់នាំចូល​ពីប្រទេសវៀតណាម តាមមាត់ច្រករបៀង។

ករណីមួយទៀតគឺ ចុងស្លាបមាន់ ២២៥ គីឡូក្រាម ត្រូវបានមន្ត្រីការិយាល័យគយនិងរដ្ឋាករដូង នៃសាខាគយនិងរដ្ឋាករខេត្តបាត់ដំបង បង្ក្រាប​និងដកហូតពីឈ្មួញដែលលួចលាក់បង្កប់ក្នុង​ទំនិញដទៃនាំចូលពីប្រទេសថៃ តាមផែស្ងួតដូង៕