សម្ដេចធិបតី៖ កម្ពុជានឹងទទួលបានទំហំវិនិយោគ និងធុរកិច្ចបារាំងកាន់តែច្រើន បន្ទាប់ពីវេទិកាធុរកិច្ច

សម្ដេចធិបតី ហ៊ុន ម៉ាណែត មានសុទិដ្ឋិនិយមថា បន្ទាប់ពីវេទិកាធុរកិច្ចកម្ពុជា-បារាំង កម្ពុជានឹងទទួលបានទំហំវិនិយោគ និងធុរកិច្ចបារាំងបន្ថែមទៀត ដោយជាមួយគ្នានេះ សម្ដេចធិបតី ក៏បានអញ្ជើញវិនិយោគិនបារាំង មកស្វែងយល់ពីឱកាសវិនិយោគ និងកាលានុវត្តភាពដ៏សម្បូរបែបនៅកម្ពុជាឱ្យកាន់តែច្រើន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

សម្តេចធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា ជឿជាក់ថា ធុរជនបារាំង នឹង​អាច​មើលឃើញពីកាលានុវត្តភាពដ៏ធំទូលាយនៅក្នុងទិដ្ឋភាពធុរកិច្ច និងការវិនិយោគ​របស់កម្ពុជា។ ក្នុងន័យនេះ សម្ដេចធិបតី ថ្លែងដូច្នេះថា៖ «ខ្ញុំសូមអញ្ជើញវិនិយោគិនបារាំងទាំងអស់មកស្វែងយល់ពីសក្តានុពលវិនិយោគដ៏ធំធេង ស្វែងរកកាលានុវត្តភាពដ៏សម្បូរបែប និងធ្វើការសម្រេចចិត្តជាយុទ្ធសាស្ត្រ ដើម្បីទាញយកប្រយោជន៍ពីទំនាក់ទំនងទ្វេភាគីដ៏ជិតស្និទ្ធរបស់យើង»។

សម្ដេចធិបតី បានបញ្ជាក់ពីការត្រៀមខ្លួនរួចជាស្រេចរបស់កម្ពុជាក្នុងការស្វាគមន៍ និងផ្ដល់ការគាំទ្រដល់វិនិយោគិនបារាំង ដែលជ្រើសរើស និងមានបំណងមកបណ្ដាក់ទុននៅកម្ពុជាដោយផ្ទាល់ និងចាប់ដៃគូជាមួយវិនិយោគក្នុងស្រុក។

ការថ្លែងដូច្នេះរបស់សម្ដេចធិបតី ក្នុងឱកាសអញ្ជើញជាអធិបតីបើកវេទិកាធុរកិច្ចកម្ពុជា-បារាំង លើកទី២ នៅសណ្ឋាគារ សូហ្វីតែលភ្នំពេញ នាព្រឹកថ្ងៃទី០៨ ខែកក្កដា ឆ្នាំ២០២៤នេះ។ តាមការថ្លែងរបស់សម្តេចធិបតី ហ៊ុន ម៉ាណែត វេទិកាធុរកិច្ចកម្ពុជា-បារាំង លើកទី១ ត្រូវបានចាប់ផ្ដើមនៅទីក្រុងប៉ារីស ក្នុងកំឡុងពេលនេះដំណើរទស្សនកិច្ចផ្លូវការរបស់សម្តេច ទៅកាន់ប្រទេសបារាំង កាលពីខែមករា ឆ្នាំ២០២៤កន្លងទៅ ដែលជាជំហានសំខាន់ដំបូងសម្រាប់ការរៀបចំវេទិកាធុរកិច្ចលើកទី២នាពេលនេះ នៅរាជធានីភ្នំពេញ។

សម្តេចធិបតី សង្ឃឹមថា កម្ពុជា-បារាំង នឹងបន្តធ្វើវេទិកាធុរកិច្ចនេះ ដើម្បីជំរុញទំនាក់ទំនងឱ្យ​កា​ន់តែស៊ី​ជម្រៅក្នុងចំណោម សហគមន៍ធុរកិច្ច និងបង្កើតកាលានុវត្តភាព ដែល​ផ្ដល់នូវផលប្រយោជន៍ឱ្យគ្នាទៅវិញទៅមកសម្រាប់អ្នកជំនាន់ក្រោយៗទៀត។ សម្ដេចធិបតី គូសបញ្ជាក់ដែរថា រាជរដ្ឋាភិបាលកម្ពុជា តែងតែប្រកាន់ខ្ជាប់នូវអភិក្រមគាំទ្រធុរកិច្ច ដោយផ្ដល់ការគាំទ្រ និងជំនួយដល់វិស័យឯកជននៅគ្រប់ដំណាក់កាលនៃប្រតិបត្តិការអាជីវកម្ម។

សម្ដេចនាយករដ្ឋមន្ត្រី បានចាត់ទុកថា បារាំងនៅតែជាដៃគូពាណិជ្ជកម្ម និងវិនិយោគធំជាងគេ​មួយនៅ​កម្ពុជាក្នុងចំណោមប្រទេសអឺរ៉ុប ដោយសម្ដេច បានបញ្ជាក់ថា ពាណិជ្ជកម្មទ្វេភាគីកម្ពុជា-បារាំង បានកើន​ឡើងជាលំដាប់ ក្នុងទំហំទឹកប្រាក់ ៥១៥,២១លានដុល្លារអាមេរិក ក្នុងឆ្នាំ២០​២​៣ និងចំនួនប្រមាណ២០៦,៤១លានដុល្លារអាមេរិក ក្នុងរយៈពេល៥ខែនៃឆ្នាំ ២០២៤។

សូមជម្រាបថា វេទិកាធុរកិច្ចកម្ពុជា-បារាំង បានរៀបចំឡើងដើម្បីលើកកម្ពស់ការវិនិយោគ និងពាណិជ្ជកម្ម ចាប់ពីថ្ងៃទី៨ ដល់ថ្ងៃទី១០ ខែកក្កដា ឆ្នាំ២០២៤ ដែលវេទិកាធុរកិច្ចនេះ ធ្វើឡើងក្រោមកិច្ចសហការរវាងសភាពាណិជ្ជកម្មកម្ពុជា និងសភាពាណិជ្ជកម្ម និងឧស្សាហកម្មបារាំងនៅកម្ពុជា។

ព្រឹត្តិការណ៍នេះមានការអញ្ជើញចូលរួមពីសមាជិកសហគមន៍ធុរកិច្ចបារាំងនៅកម្ពុជា ក៏ដូចជាតំណាងក្រុមហ៊ុនបារាំងនៅក្នុងតំបន់ ដែលមានបំណងស្វែងយល់ឱ្យកាន់តែ​ច្បាស់ពី​ទីផ្សារ​កម្ពុជា, តំណាងមកពីក្រុមហ៊ុនសំខាន់ៗជាច្រើននឹងដូចជាក្រុមហ៊ុន​សំណង់ និងហេដ្ឋារចនាសម្ព័ន្ធ, ឌីជីថល, សុខាភិបាល, ថាមពល, នគរូបនីយកម្ម, ទេសចរណ៍, ឡូជីស្លឹក, ដឹកជញ្ជូន, កសិកម្ម និងកសិអាហារ ក៏ដូចជាការអភិវឌ្ឍប្រកប​ដោយចីរភាព និងបរិស្ថាន៕

អត្ថបទ៖ ធឿន វ៉ាន់សុង