សម្តេច ទៀ បាញ់ រម្លឹកគ្រាប្រយុទ្ធជាមួយ ខ្មែរក្រហម រហូតយុទ្ធមិត្តបាត់បង់ជីវិតស្ទើរទាំងអស់ នៅតំបន់តស៊ូឃុំជ្រោយប្រស់ ខេត្តកោះកុង

សម្តេចពិជ័យសេនា ទៀ បាញ់ សមាជិកឧត្តមក្រុមប្រឹក្សាព្រះមហាក្សត្រ បានរម្លឹកពីអនុស្សាវរីយ៍របស់សម្តេចដោយមិនអាចបំភ្លេចកាលដែលសម្តេចធ្លាប់ឆ្លងកាត់តស៊ូបង្កើតកងទ័ពវាយបំបែករបប ប៉ុល ពត នៅតំបន់ឃុំជ្រោយប្រស់ ស្រុកកោះកុង។ សម្តេចពិជ័យសេនា ទៀ បាញ់ រម្លឹកអតីតកាលដ៏ជូរចត់ដូច្នេះ ធ្វើឡើងក្រោយពីសម្តេច និងភរិយា គឺលោកជំទាវ តៅ តឿន ព្រមទាំងក្រុមការងារពាក់ព័ន្ធអញ្ជើញយកប្រគេនទៀនវស្សាគ្រឿងឧបភោគបរិភោគ និងបច្ច័យមួយចំនួនប្រគេនជូនព្រះសង្ឃគង់ចាំព្រះវស្សាចំនួន២វត្ត ឃុំជ្រោយប្រស់ នៅស្រុកកោះកុង ខេត្តកោះកុង។

សម្តេចពិជ័យសេនា បានឱ្យដឹងនៅថ្ងៃទី១៦ ខែកក្កដា ឆ្នាំ២០២៤នេះថា សម្តេចមិនអាចបំភ្លេចបានឡើយចំពោះអនុស្សាវរីយ៍ដែលសម្តេច និងយុទ្ធមិត្តជាច្រើននាក់ ធ្លាប់បានពុះពារគ្រប់បែបយ៉ាងដើម្បីវាយរំដោះប្រទេសកម្ពុជាពីរបបប៉ុល ពត ដ៏សែនខ្មៅងងឹត ទំរាំប្រទេសមានសុខសន្តិភាព និងការអភិវឌ្ឍន៍មកដល់សព្វថ្ងៃ។

សម្តេចពិជ័យសេនា ទៀ បាញ់ បន្ថែមថា យុទ្ធមិត្តរួមដំណើរជាមួយសម្តេច បានស្លាប់ស្ទើរទាំងអស់ ព្រោះតែការបូជាសាច់ស្រស់ឈាមស្រស់បុព្វជាតិមាតុភូមិ។ យុទ្ធមិត្តដែលនៅសេសសល់មានតិចតួចណាស់ គ្រាតំបន់ឃុំជ្រោយប្រស់ ជាតំបន់សមរភូមិក្តៅមួយរវាងកងទ័ពរំដោះ និងកងទ័ពប៉ុល ពត។

សម្តេចពិជ័យសេនា លើកឡើងថា ងាកមើលស្ថានភាពបច្ចុប្បន្ន ភូមិសាស្រ្តឃុំជ្រោយប្រស់ ក្នុងស្រុកកោះកុង បានកែប្រែអភិវឌ្ឍន៍ហេដ្ឋារចនាសម្ព័ន្ធជាច្រើនដែលមិនធ្លាប់មាន ហើយនេះក៏ព្រោះតែប្រទេសជាតិមានសុខសន្តិភាពក្រោមការដឹកនាំរបស់សម្តេចតេជោ ហ៊ុន សែន អតីតនាយករដ្ឋមន្រ្តី និងរាជរដ្ឋាភិបាល អាណត្តិទី៧ សព្វថ្ងៃ។

ដូច្នេះសម្តេចពិជ័យសេនា ក៏ស្នើដល់គ្រប់ជនរួមជាតិរួមគ្នា ពិសេសពលរដ្ឋរស់នៅក្នុងស្រុកកោះកុង ត្រូវតែបន្តការពារសុខសន្តិភាពឲ្យបានគង់វង្ស ដោយមិនអាចក្រុម ឬបុគ្គលណាមួយមកបំផ្លាញសន្តិភាពដែលកំពុងបច្ចុប្បន្នបានឡើយ។  ពីព្រោះថា ប្រទេសកម្ពុជា កាលពីអតីតកាលពិតជាពិបាកខ្លាំងណាស់ហើយទំរាំមានការអភិវឌ្ឍន៍មកទល់ពេលនេះ។ ទន្ទឹមនោះ តំបន់ឃុំជ្រោយប្រស់ នឹងមានការកសាងអភិវឌ្ឍន៍ហេដ្ឋារចនាសម្ព័ន្ធថ្មីៗបន្ថែមទៀត បម្រើដល់វិស័យសេដ្ឋកិច្ចពាណិជ្ជកម្ម ទេសចរណ៍ និងសង្គមកិច្ចទៅអនាគត៕

អត្ថបទ៖ សិរីវឌ្ឍនៈ