សម្តេចតេជោ អះអាងថា កិច្ចសហការតំបន់ត្រីកោណបានជួយដល់ពលរដ្ឋរស់នៅព្រំដែនក្នុងទទួលសេវាសុខាភិបាល

ស្របពេលដែលកម្ពុជានៅមានភាពទន់ខ្សោយផ្នែកសុខាភិបាល នៅតាមព្រំដែនក្រោយបញ្ចប់សង្គ្រាម តាមរយៈកិច្ចសហប្រតិបត្តិការនៅតំបន់ត្រីកោណរួមមាន កម្ពុជា ឡាវ និង វៀតណាម នាពេលកន្លងទៅ បានជួយដល់ពលរដ្ឋរស់នៅតាមព្រំដែន ជាពិសេសពលរដ្ឋខ្មែរ ក្នុងការទទួលសេវាសុខាភិបាល។

សម្ដេចតេជោ​ ហ៊ុន សែន អតីតនាយករដ្ឋមន្រ្តី និងជាប្រធានព្រឹទ្ធសភា បានថ្លែងឡើងបែបនេះ តាមរយៈសារពិសេសពាក់ព័ន្ធទៅនឹងក្របខណ្ឌកិច្ចសហប្រតិបត្តិការអភិវឌ្ឍន៍តំបន់ត្រីកោណ កម្ពុជា-ឡាវ-វៀតណាម ( CLV DTA ) នាថ្ងៃទី២៣ ខែកក្កដា។
សម្តេចតេជោ ហ៊ុន សែន ថ្លែងថា ក្នុងពេលដែលមានស្ថានភាពទន់ខ្សោយនៅខាងកម្ពុជាក្រោយបញ្ចប់សង្គ្រាម សម្តេចតែងតែចរចាជាមួយប្រទេសជិតខាង មិនថាជាមួយវៀតណាម ថៃ​ និងឡាវ នោះទេ ដើម្បីឱ្យគេជួយអនុគ្រោះចំពោះកម្ពុជានៅក្នុងការផ្តល់វ៉ាក់សាំង និងជួយសង្គ្រោះទៅដល់អ្នកមានជម្ងឺធ្ងន់ ជាពិសេស​សម្រាប់ស្រ្តីមានផ្ទៃពោះ និងកុមារ។ សម្តេចថ្លែងថា៖«ព្រោះប៉ុស្តិ៍សុខភាពរបស់គេជាប់ជាមួយនឹងព្រំដែនទៅហើយ ឯចំពោះយើងប៉ុស្តិ៍សុខភាពគឺនៅឆ្ងាយណាស់។ ឧទាហរណ៍ ស្រ្តីមានផ្ទៃពោះត្រូវការឆ្លងទន្លេ បើមើលមកក្រោយក្នុងទឹកដីកម្ពុជា ប្រមាណ​១០គីឡូម៉ែត្រ ប៉ុន្តែបើឆ្លងដែនចូលទឹកដីឡាវ ឬវៀតណាម ឬថៃ គឺជិតជាងដែលអាចសង្គ្រោះជីវិតបាន»។

យ៉ាងណាមិញ សម្តេចបន្ថែមថា ភាពអនុគ្រោះបែបនេះ ពលរដ្ឋដែលរស់នៅតំបន់ត្រីកោណទាំងកម្ពុជា ឡាវ និងវៀតណាម ងាយស្រួលក្នុងការមកទទួលសេវាសុខាភិបាលទៅវិញទៅមក ពោលពលរដ្ឋវៀតណាម ឬឡាវ ពេលខ្លះក៏មកទទួលសេវាសុខាភិបាលនៅកម្ពុជាវិញដែរ៕