ភ្លៀងលាយឡំខ្យល់កន្ត្រាក់ បណ្តាលឱ្យបាក់ដើមឈើ និងប៉ះពាល់ផ្ទះពលរដ្ឋមួយចំនួន នៅស្រុកស្វាយលើ

តាមរបាយការណ៍របស់សមត្ថកិច្ច បានឱ្យដឹងថា នៅវេលាម៉ោង ១៦៖១០នាទី ថ្ងៃទី២៥ ខែកក្កដា ឆ្នាំ២០២៤ មានករណីភ្លៀងលាយឡំ និងខ្យល់កន្ត្រាក់ បណ្តាលឱ្យបាក់ដើមឈើ និងប៉ះពាល់ផ្ទះប្រជាពលរដ្ឋមួយចំនួន នៅក្នុងភូមិសាស្ត្រស្រុកស្វាយលើ។

ហេតុការណ៍គ្រោះធម្មជាតិនេះ បានបង្កឱ្យមានផលប៉ះពាល់ ទៅលើឃុំចំនួន៣ ដែលរួមមាន ទី១.ឃុំស្វាយលើ រលំបង្កោលភ្លើងចំនួន ៣ដើម របើកដំបូលផ្ទះចំនួន ៣ខ្នង រលំផ្ទះអស់ចំនួន ២ខ្នង និងរលំដើមឈើកាត់ទទឹងផ្លូវ ២កន្លែង។ ទី២.ឃុំបឹងមាលា ស្រុកស្វាយលើ បាក់មែកកាស្យាកាត់ផ្លូវមួយកន្លែងនៅភូមិត្រពាំងឬស្សី និងបាក់មែកឈើកាត់ផ្លូវ ២កន្លែង នៅភូមិសក្តា។ ព្រមទាំងមានទឹកហូរកាត់ផ្លូវត្រង់ចំណុចមណ្ឌលសុខភាព ឃុំបឹងមាលា របើកដំបូលផ្ទះប្រជាពលរដ្ឋ ១ខ្នង ខូចខាតស័ង្កសី ១២សន្លឹក ដែលមានម្ចាស់ផ្ទះ ឈ្មោះ សួរ សេត ភេទប្រុស អាយុ ៤២ឆ្នាំ មានសមាជិកគ្រួសារសរុប ៦នាក់ ស្រី ២នាក់ នៅភូមិបឹងមាលា។ ទី៣.ឃុំខ្នងភ្នំ មានដើមឈើ ១ដើម បានដួលសង្កត់លើផ្ទះ ១ខ្នង របស់ឈ្មោះ ខេន ខន ភេទប្រុស អាយុ ៤៣ឆ្នាំ មានសមាជិកក្នុងគ្រួសារ ៦នាក់ ស្រី ៤នាក់ រស់នៅភូមិថ្មី ឃុំខ្នងភ្នំ ស្រុកស្វាយលើ។

សមត្ថកិច្ច បានបញ្ជាក់ថា ករណីគ្រោះធម្មជាតិនេះមិនបណ្ដាលឱ្យមានគ្រោះថ្នាក់ដល់មនុស្សឡើយ៕

ដោយ៖ជុន កុសល