កម្ពុជា កូរ៉េ ផ្ដោតកិច្ចសហប្រតិបត្តិការ លើវិស័យអប់រំបច្ចេកទេស និងបណ្តុះបណ្តាលវិជ្ជាជីវៈ

បណ្ឌិត កុលផេង វឌ្ឍនា អនុរដ្ឋលេខាធិការ ក្រសួងអប់រំ យុវជន និងកីឡា បានជួបសម្ដែងការគួរសម និងពិភាក្សាការងារជាមួយ គណៈប្រតិភូកូរ៉េ ដែលដឹកនាំដោយ លោក Kim Young Saing មកពី វិទ្យាស្ថានស្រាវជ្រាវ និងបណ្តុះបណ្តាលវិជ្ជាជីវៈកូរ៉េ (KRIVET) នៃសាធារណរដ្ឋកូរ៉េ។ ជំនួបនេះផ្ដោតសំខាន់ទៅលើកិច្ចសហប្រតិបត្តិការលើវិស័យអប់រំបច្ចេកទេស និងបណ្តុះបណ្តាលវិជ្ជាជីវៈ រវាងសាធារណរដ្ឋកូរ៉េ និងព្រះរាជាណាចក្រកម្ពុជា។

បណ្ឌិតអនុរដ្ឋលេខាធិការ បានអរគុណយ៉ាងជ្រាលជ្រៅ ចំពោះគណៈប្រតិភូកូរ៉េ ដែលបានបន្តសហការជាមួយក្រសួងអប់រំ យុវជន និងកីឡា ក្នុងការបណ្តុះបណ្តាលជំនាញវិជ្ជាជីវៈដល់កម្ពុជា។ អនុរដ្ឋលេខាធិការ ក៏បានស្នើសុំឱ្យនាយកដ្ឋានជំនាញ សហការជាមួយវិទ្យាស្ថានស្រាវជ្រាវ និងបណ្តុះបណ្តាលវិជ្ជាជីវៈកូរ៉េ (KRIVET) ជំរុញកិច្ចសហប្រតិបត្តិការរវាង គ្រឹះស្ថានអប់រំបច្ចេកទេស និងបណ្ដុះបណ្ដាលវិជ្ជាជីវៈប្រទេសទាំងពីរឱ្យកាន់តែមានភាពប្រសើរថែមទៀតនាពេលអនាគត។

លោក Kim Young Saing បានធ្វើការគូសបញ្ជាក់ពីគោលបំណង នៃកិច្ចសហប្រតិបត្តិការនេះ ដែលមានដូចជា៖ ១. ការពង្រីកចំណេះដឹងទាក់ទងទៅនឹងវិស័យអប់រំបច្ចេកទេស និងបណ្តុះបណ្តាលវិជ្ជាជីវៈ ២. ការពង្រីកគំរូអាស៊ានលើការអប់រំបច្ចេកទេស និងបណ្តុះបណ្តាលវិជ្ជាជីវៈ (ASEAN TVET Model) ដែលសមស្របនឹងបរិបទ និងយុទ្ធសាស្រ្ដអភិវឌ្ឍន៍អាស៊ាន និង ៣. ការបង្កើតហេដ្ឋារចនាសម្ព័ន្ធសម្រាប់គ្រូបង្រៀនអប់រំបច្ចេកទេស និងបណ្តុះបណ្តាលវិជ្ជាជីវៈ និងកម្មវិធីផ្លាស់ប្ដូរការសិក្សា។

គួរបញ្ជាក់ថា ក្នុងឱកាសនោះ គណៈប្រតិភូកូរ៉េ បានធ្វើបទបង្ហាញទាក់ទងនឹងវឌ្ឍនភាពក្នុងវិស័យអប់រំបច្ចេកទេស និងបណ្ដុះបណ្ដាលវិជ្ជាជីវៈ ដែលរួមមាន៖ ១. ការអនុវត្តគំរូអាស៊ានលើការអប់រំបច្ចេកទេស និងបណ្តុះបណ្តាលវិជ្ជាជីវៈក្នុងគ្រឹះស្ថានអប់រំ នៃបណ្ដាប្រទេសជាសមាជិកអាស៊ាន ២. កម្មវិធីកសាងសមត្ថភាពគ្រូបង្រៀនការអប់រំបច្ចេកទេស និងបណ្តុះបណ្តាលវិជ្ជាជីវៈ ៣. ការពង្រឹងគុណវុឌ្ឍិធនធានមនុស្សក្នុងវិស័យអប់រំបច្ចេកទេស និងបណ្ដុះបណ្ដាលវិជ្ជាជីវៈ តាមរយៈអាហារូបករណ៍ និងកម្មវិធីផ្លាស់ប្ដូរសិស្ស-និស្សិត ៤. គំរូសាលាអប់រំបច្ចេកទេស និងបណ្តុះបណ្តាលវិជ្ជាជីវៈ MEISTER (New TVET Model MEISTER School) ៥. ការបន្តពង្រីកកិច្ចសហប្រតិបត្តិការក្នុងវិស័យអប់រំបច្ចេកទេស និងបណ្ដុះបណ្ដាលវិជ្ជាជីវៈជាមួយបណ្ដាប្រទេសជាសមាជិកអាស៊ាននាពេលអនាគត ៦. ការអប់រំបច្ចេកទេស និងបណ្តុះបណ្តាលវិជ្ជាជីវៈក្នុងបរិបទសាធារណរដ្ឋកូរ៉េ និងឧត្តមានុវត្តសម្រាប់ព្រះរាជាណាចក្រកម្ពុជា ៧. ការចុះអនុស្សរណៈ នៃការយោគយល់គ្នារវាង Kwangwoon AI High School និងវិទ្យាល័យចំណេះទូទៅ និងបច្ចេកទេស ហ៊ុន សែន ជម្ពូវ័ន៕