ភ្ញៀវទេសចរជិះឡូរីលើផ្លូវរថភ្លើងមានការថយចុះច្រើន

មានការត្អូញត្អែរយ៉ាងខ្លាំងពីសំណាក់សមាគមឡូរី ដែលធ្វើចរាចរណ៍អាស្រ័យទៅលើផ្លូវរថភ្លើងពីបាត់ដំបងទៅភ្នំពេញ ដោយសារតែចំនួនភ្ញៀវទេសចរជាតិ និងអន្តរជាតិមានការធ្លាក់ចុះខ្លាំង។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ស្ត្រីម្នាក់ដែលជាអ្នកមើលការខុសត្រូវ ទៅលើក្រុមអ្នកបើកបរឡូរី ដែលស្ថិតនៅចំណុចស្ថានីយ៍រថភ្លើង អូរស្រឡៅ ស្ថិតក្នុងឃុំអូរដំបង១ ស្រុកសង្កែ ខេត្តបាត់ដំបង បានរៀបរាប់ថា បច្ចុប្បន្នឡូរីសរុបមានប្រមាណជាង ៣០គ្រឿង ដែលត្រូវធ្វើការដឹកជញ្ជូនភ្ញៀវទៅតាមលេខរៀង វិលជុំ ចៀសវាងមានការច្រណែនគ្នា។

ស្ត្រីរូបនេះបានបន្តថា កាលដើមឡើយឡូរីដែលរត់លើផ្លូវរថភ្លើង គឺទិសដៅដែលភ្ញៀវទេសចរមកជិះកំសាន្ត ចាប់ពីស្ថានីយ៍អូរដំបង ទៅកាន់ស្ថានីយ៍អូស្រឡៅ ដោយកាលណោះ មិនទាន់មានផ្លូវហាយវេរឆ្លងកាត់ ដូច្នេះហើយអ្នកបើកបរឡូរី ក៏បានធ្វើដំណើរទៅមកដោយសុវត្ថិភាព។ លុះនៅប៉ុន្មានឆ្នាំក្រោយមកនេះ ផ្លូវហាយវ៉េដែលជាផ្លូវវាងក្រុង បានស្ថាបនារួចរាល់។ ដោយមានការឆ្លងកាត់ផ្លូវរថភ្លើងផងនោះធ្វើឲ្យសមាគមឡូរីលែងហ៊ានបើកបរដឹកនាំភ្ញៀវបន្តទៅទៀតដោយសារតែខ្លាចមានគ្រោះថ្នាក់នៅពេលដែល ឡូរី ឆ្លងកាត់ផ្លូវ ហាយវ៉េ ដូច្នេះហើយទើបឡូរីទាំងអស់ បាននាំគ្នាលើកទីតាំងមកឈរជើងនៅចំណុចស្ថានីយ៍អូស្រឡៅវិញម្ដង ដោយក្នុងទិសដៅទឹកភ្ញៀវទេសចរជាតិ និងអន្តរជាតិ ដែលចូលចិត្តជិះកំសាន្តគយគន់ទេសភាពចេញពីស្ថានីយ៍អូរស្រឡៅ ទៅកាន់ស្ថានីយ៍រាំងកេសី វិញម្តង។

ដោយឡែកសម្រាប់តម្លៃនៅក្នុងចម្ងាយ ៧គីឡូម៉ែត្រ បើភ្ញៀវទេសចរជាជនជាតិខ្មែរ គឺក្នុង១នាក់ ១០.០០០ រៀល តែសម្រាប់ភ្ញៀវអន្តរជាតិក្នុង ១នាក់ ២០.០០០ រៀល (ទាំងទៅទាំងមក) ។ ប៉ុន្តែប៉ុន្មានមួយឆ្នាំចុងក្រោយនេះ ភ្ញៀវទេសចរមានការថយចុះច្រើន ដែលគេសង្ស័យថា អាចមិនទាន់ដល់ថ្ងៃវិសមកាលរបស់ភ្ញៀវទេសចរបរទេសនោះឡើយ ម្យ៉ាងវិញទៀតបច្ចុប្បន្នក៏មានទីតាំងឡូរីមួយកន្លែងទៀត នៅជើងភ្នំបាណន់ តែនៅទីនោះគេក៏បានប្រើផ្លូវរថភ្លើងដែរ ក្នុងទិសដៅឯកទិស ដូច្នេះហើយទើបធ្វើឲ្យចំនួនភ្ញៀវទេសចរដែលចូលចិត្តជិះឡូរីតាមផ្លូវរថភ្លើងគឺមានការថយចុះ ដែលក្នុងមួយថ្ងៃការរត់វិលជុំរបស់ឡូរីសឹងតែមិនបានគ្រប់គ្នាផង៕

អត្ថបទ៖ សោ និយមរ័ត្ន