ឆមាសទី១ ឆ្នាំនេះ ខេត្តកែបនាំចេញម្រេច GI បានជាង ១១តោន ធៀបនឹងឆ្នាំមុនធ្លាក់ចុះតិចតូច

នៅក្នុងឆមាសទី១ ឆ្នាំ២០២៤ នេះ ខេត្តកែបបាននាំចេញនូវមុខទំនិញសំខាន់ៗ មួយចំនួនដូចជា ម្រេច ទឹកត្រី ស្វាយកែវរមៀត និងផលនេសាទ។ ក្នុងនោះសម្រាប់ផលិតផលម្រេច ដែលជាទំនិញសម្គាល់ភូមិសាស្រ្ត (GI) ខេត្តកែប បាននាំចេញទៅលក់នៅលើទីផ្សារបានចំនួន ១១.៧តោន ថយចុះ០.១៤តោនស្មើ ១.២ភាគរយ បើប្រៀបធៀបរយៈពេលដូចគ្នាក្នុងឆ្នាំ២០២៣។ នេះបើតាមការឱ្យដឹងពី លោក ឯម រតន៍មន្នី ប្រធានមន្ទីរពាណិជ្ជកម្មខេត្តកែប នាថ្ងៃទី១០ ខែសីហា ឆ្នាំ២០២៤។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមរបាយការណ៍ពីប្រធានមន្ទីរពាណិជ្ជកម្មខេត្តកែប បានឱ្យដឹងថា សម្រាប់តម្លៃម្រេចខ្មៅលក់បាន ១៥ដុល្លារ ក្នុងមួយគីឡូក្រាម និងម្រេចក្រហមលក់ក្នុងមួយគីឡូក្រាមបាន ២៥ដុល្លារ និងម្រេចស លក់ក្នុងមួយគីឡូក្រាមបាន ២៨ដុល្លារ ដែលទីផ្សារសំខាន់មានទ្វីបអាស៊ី និងអឺរ៉ុប។ លោកថា ចំពោះទិន្នន័យនេះ មន្ទីរបានធ្វើការកត់ត្រាទិន្នន័យម្រេច ដែលប្រើប្រាស់ម៉ាកសម្គាល់នៅក្នុងភូមិសាស្រ្តម្រេចកំពត (GI) ដែលបានលក់ចេញទៅតាមរយៈសមាគមលើកកម្ពស់ម្រេចកំពតប៉ុណ្ណោះ។ លោកបានបញ្ជាក់ថា តម្លៃមិនទាន់មានការប្រែប្រួលនៅឡើយនេះទេ តែបើស្ថានភាពទីផ្សារនៅតែបន្តតម្រូវឱ្យមានការប្រែប្រួលថ្លៃ ដូចនេះសមាគមនឹងពិភាក្សាដាក់ជូនមហាសន្និបាតសមាគម ពិនិត្យសម្រេច ទើបអនុវត្តទៅតាមសេចក្តីសម្រេចរបស់មហាសន្និបាត។

ចំណែក លោក ហេង ឆាយ នាយកប្រតិបត្តិនៃចម្ការ Aries Farm (អារីសហ្វាម) ខេត្តកែប ដែលមានទីតាំងស្ថិតនៅតំបន់ភ្នំវល្លិ៍នៃខេត្តកែប បានឱ្យដឹងថា ក្នុងឆមាស១ ឆ្នាំ២០២៤ ចម្ការរបស់លោក លក់ម្រេចបានចំនួន ៣តោនតែប៉ុណ្ណោះ មានការធ្លាក់ចុះបើប្រៀបធៀបនឹងរយៈពេលដូចគ្នាក្នុងឆ្នាំ២០២៣។ ក្នុងនោះ សម្រាប់តម្លៃម្រេចខ្មៅលក់ក្នុងមួយគីឡូក្រាមបាន ៤០ដុល្លារ នឹងតម្លៃម្រេចស លក់ក្នុងមួយគីឡូក្រាមបាន ៥០ដុល្លារ និងតម្លៃម្រេចក្រហមលក់ក្នុងមួយគីឡូក្រាមបាន ៥៥ដុល្លារ។

លោកថា ដោយកត្តាអូសបន្លាយ នៃភាពរាំងស្ងួត បានធ្វើឱ្យការប្រមូលទិន្នផលម្រេចមានការធ្លាក់ចុះខ្លាំង ដែលធ្វើឱ្យតម្លៃម្រេច និងអាចឡើងថ្លៃជាងនេះវិញបាន។ ទន្ទឹមនោះ លោកក៏មានម្រេចស្កុកទុកប្រហែលបាន ៣តោនផងដែរ៕

អត្ថបទ៖ សឹង រ៉ាត់