អគ្គស្នងការនគរបាលជាតិ ប្រកាសគាំទ្រគម្រោងអភិវឌ្ឍន៍តំបន់ត្រីកោណ CLV

ក្នុងនាមអគ្គស្នងការដ្ឋាននគរបាលជាតិ និងតំណាងឱ្យកងកម្លាំងនគរបាលជាតិ​ទាំងអស់ទូទាំងប្រទេសលោក ស ថេត បានប្រកាសគាំទ្រ​ទាំងស្រុង​លើគម្រោងកិច្ចសហប្រតិបត្តិការអភិវឌ្ឍន៍តំបន់ត្រីកោណ​ កម្ពុជា​ ឡាវ​ និងវៀតណាម​ ហៅកាត់ថា CLV DTA​ របស់រាជរដ្ឋាភិបាលកម្ពុជា​ ។

ការផ្ញើសារគាំទ្រនេះ ដោយចាត់ទុកថាគម្រោង CLV នឹងជួយផ្តល់អត្ថប្រយោជន៍ជាច្រើនដែលជួយលើកស្ទួយវិស័យសេដ្ឋកិច្ច​ វិស័យពាណិជ្ជកម្ម​ និងវិស័យទេសចរណ៍ រួមទាំងវិស័យផ្សេងៗជាច្រើនទៀត​ ជាពិសេសជួយសម្រួលដល់ជីវភាពបងប្អូនប្រជាពលរដ្ឋ ដែលរស់នៅខេត្តជាប់ព្រំដែនឱ្យកាន់តែមានភាពប្រសើរឡើយ។

ផ្អែកលើអត្ថប្រយោជន៍ទាំងនេះ​ អគ្គស្នងការដ្ឋាននគរបាលជាតិ អំពាវនាវឱ្យបងប្អូនប្រជាពលរដ្ឋ និងកងកម្លាំងក្រោមអគ្គស្នងការនគបាលជាតិទាំងអស់ ចូលរួមគាំទ្រដល់គម្រោង CLV DTA​ ហើយប្រឆាំងដាច់ខាតចំពោះការបង្ហោះព័ត៌មាន ឬចែកចាយខ្លឹមសារវីដេអូ ដែលមានលក្ខណៈញុះញង់ រើសអើងពូជសាសន៍ និងធ្វើឱ្យប៉ះពាល់ដល់សុខសន្តិភាព សណ្តាប់ធ្នាប់សង្គម និងសាមគ្គីភាពជាតិ ។

ជុំវិញគម្រោងនេះ សម្ដេចនាយករដ្ឋមន្រ្តី ហ៊ុន ម៉ាណែត ធ្លាប់មានប្រសាសន៍ថា ការអភិវឌ្ឍន៍តំបន់ត្រីកោណ CLV ៣ ប្រទេស រវាង កម្ពុជា ឡាវ និងវៀតណាម គឺជាការលើកកំណើនសេដ្ឋកិច្ចនៅតំបន់ខេត្តព្រំដែនពិតប្រាកដ។
ក្នុងនាមជាប្រមុខរាជរដ្ឋាភិបាល សម្ដេចធិបតី ធានាអះអាងជូនប្រជាពលរដ្ឋថា កិច្ចសហប្រតិបត្តិការតំបន់ត្រីកោណ នឹងមិនធ្វើឱ្យបាត់បង់ទឹកដី ឬអធិបតេយ្យភាពជាតិរបស់យើងទេ។

គួរជម្រាបថា កិច្ចសហប្រតិបត្តិការអភិវឌ្ឍន៍តំបន់ត្រីកោណ CLV ត្រូវបានបង្កើតឡើងតាំងពីឆ្នាំ ១៩៩៩ មក ដែលគិតមកដល់បច្ចុប្បន្ន ត្រីភាគីបានបើកកិច្ចប្រជុំចំនួន ១១ លើក ដើម្បីពិភាក្សាពីការ​តភ្ជាប់សេដ្ឋកិច្ច បង្កើនពាណិជ្ជកម្ម និងកសិ​ពាណិជ្ជ​​​​​​កម្មរវាងប្រទេសទាំងបី៕