សម្ដេចតេជោ សង្ឃឹមថា​នាយករដ្ឋមន្ត្រី នឹងជូនលិខិតអរគុណដល់អ្នកបរិច្ចាគចាប់ពី១រយរៀលឡើងទៅ

«ខ្ញុំសង្ឃឹមថានាយករដ្ឋមន្រី្តហ៊ុន ម៉ាណែត នឹងជូនលិខិតថ្លែងអំណរគុណជូនគ្រប់បងប្អូនដែលបានបរិច្ចាគរាប់តាំងពី១០០រៀលឡើងទៅដើម្បីបងប្អូនដែលបានចូលរួមទាំងរក្សាទុកសម្រាប់តកូនតចៅអំពីស្មារតីស្នេហាជាតិរបស់ឪពុកម្តាយជីដូនជីតា»។ នេះគឺជាសំណេររបស់សម្ដេចតេជោ ហ៊ុន សែន នៅលើប្រព័ន្ធតេឡេក្រាម នាយប់ថ្ងៃពុធនេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

សម្ដេចតេជោ បានសរសេរយ៉ាងដូច្នេះ គឺបន្ទាប់ពីសម្ដេចធិតបតី ហ៊ុន ម៉ាណែត បាននិងកំពុងចេញលិខិតថ្លែងអំណរគុណជូនដល់អ្នកបរិច្ចាគថវិកា ក្នុង «មូលនិធិកសាងហេដ្ឋារចនាសម្ព័ន្ធតាមព្រំដែន» ដោយផ្ដោតលើការកសាងផ្លូវក្រវាត់ព្រំដែន។

តាមរយៈសំណេរនាយប់ថ្ងៃទី២៨ ខែសីហា​ សម្ដេច ហ៊ុន សែន បានអះអាងថាសម្ដេចមានការភ្ញាក់ផ្អើលនិងសប្បាយរីករាយយ៉ាងខ្លាំងដោយបានទទួលដំណឹងថាមូលនិធិអភិវឌ្ឍន៍ហេដ្ឋារចនាសម្ព័ន្ធតាមព្រំដែនដោយផ្តោតលើផ្លូវថ្នល់កំពុងតែមានការចូលរួមពីសំណាក់ប្រជាជននៅតាមមូលដ្ឋាន។

សម្រាប់សម្ដេចតេជោ ការចូលរួមគាំទ្រមូលនិធិមួយនេះ ជាកាយវិការធំធេងក្នុងការស្រឡាញ់ទឹកដី ដែលរបងរក្សាអធិបតេយ្យជាតិដ៏មាំមួន។

សម្ដេចប្រធានព្រឹទ្ធសភា សង្កត់ធ្ងន់ដូច្នេះ៖«នេះជាចលនាជាតិដ៏មហិមាក្នុងការស្រឡាញ់ជាតិស្រឡាញ់ទឹកដីរបស់ប្រជាជនយើងដែលជាខឿនការពារជាតិដ៏រឹងមាំរបស់ប្រជាជនដែលខ្លាំងជាងអ្វីៗទាំងអស់»។

នៅក្នុងសំណេររបស់សម្ដេចតេជោ ក៏បានឱ្យដឹងថា ប្រជាជននៅភូមិត្រពាំងចកភូមិគ្រាំងគរ ភូមិកែស ភូមិគល់គមភូមិ អង្ករនាប ភូមិថ្មកែវ ភូមិត្រពាំងឬស្សីឃុំត្រាំកក់ ស្រុកត្រាំកក់ខេត្តតាកែវបានចូលជាថវិកាខ្លះ៣០០រៀល ៥០០រៀល១០០០រៀល ២០០០រៀល ៥០០០រៀល១០០០០រៀល ២០០០០រៀល។

សម្រាប់សម្ដេច ហ៊ុន សែន ថវិកាសំខាន់ហើយ តែអ្វីដែលសំខាន់ជាងថវិកាទៅទៀតេះ គឺទឹកចិត្តស្នេហាជាតិរបស់ប្រជាជនខ្មែរដែលម្ចាស់ប្រទេស។

ជាកាកត់សម្គាល់ «មូលនិធិកសាងហេដ្ឋារចនាសម្ព័ន្ធតាមព្រំដែន» ដោយផ្ដោតលើការកសាងផ្លូវក្រវាត់ព្រំដែន ដែលផ្ដួចផ្ដើមឡើងដោយសម្ដេចធិបតី នាយករដ្ឋមន្ត្រីកម្ពុជា កំពុងទទួលបានការចូលរួមយ៉ាងភ្លូកទឹកភ្លូកដីពីសំណាក់ ព្រះសង្ឈ  មន្ត្រីរាជការ កងកម្លាំងគ្រប់ប្រភេទ  និងប្រជាពលរដ្ឋខ្មែរគ្រប់ស្រទាប់វណ្ណៈ ទាំងរស់នៅក្នុងប្រទេស និងរស់នៅក្រៅប្រទេស ទៅតាមសទ្ធារៀងៗខ្លួន។

កាលពីថ្ងៃទី២៧ ខែសីហា សម្ដេចធិបតី ហ៊ុន ម៉ាណែត ដែលជាអ្នកផ្ដួចផ្ដើមបង្កើតមូលនិធិ បានចាត់ទុកការចូលរួមបរិច្ចាគថាជាកាយវិការចូលរួមដ៏ឧត្តុង្គឧត្តមថ្លៃថ្លា ដែលបានសបញ្ជាក់យ៉ាងច្បាស់អំពីធ្លុងមហាសាមគ្គី និងស្មារតីជាតិខ្មែរតែមួយប្រកបដោយមនសិកា​រស្នេហាជាតិ​ ក្នុងបុព្វហេតុការពារ និងអភិវឌ្ឍ​មាតុភូមិកម្ពុជា។

បន្ថែមពីសំណេរ ថ្លែងអំណរគុណតាមរយៈបណ្ដាញសង្គម នាយករដ្ឋមន្ត្រីដែលជាអ្នកបង្កើតមូលនិធិ គឺបាន និងកំពុងមមាញឹកចេញលិខិតថ្លែងអំណរគុណជូនចំពោះអ្នកដែលបានបរិច្ចាគថវិកា ក្នុងបុព្វហេតុការពារមាតុភូមិកម្ពុជា៕​

ដោយ៖ង៉ិល ណារ៉ាត់