ព័ត៌មានជាតិ

ថ្នាក់ដឹកនាំខេត្តតាកែវអញ្ជើញចុះសួរសុខទុក្ខ និងនាំយកគ្រឿងឧបភោគមួយចំនួនធំ ជូនកងកម្លាំងឈរជើងនៅតាមបន្ទាត់ព្រំដែន កម្ពុជា-វៀតណាម

បានផុស

៥ years មុន

នៅ

ថ្ងៃសៅរ៍ ៦ មីនា ២០២១

ដោយ

លោក អ៊ូច ភា អភិបាលនៃគណៈអភិបាលខេត្ត និងជាប្រធានគណបញ្ជាការឯកភាពខេត្តតាកែវ ព្រមទាំងមន្ត្រីចំណុះសាលាខេត្ត នៅព្រឹកថ្ងៃទី០៦ ខែមីនា ឆ្នាំ២០២១ បានអញ្ជើញចុះសាកសួរសុខទុក្ខ និងនាំយកសម្ភារៈគ្រឿងឧបភោគបរិភោគមួយចំនួនធំ ប្រគល់ជូនកងកម្លាំងឈរជើងនៅតាមបន្ទាត់ព្រំដែន ខេត្តតាកែវ ដែលពិធីនេះធ្វើឡើងនៅសាលាស្រុកអង្គរបូរី។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

មានមតិសំណេះសំណាលនាឱកាសនោះដែរ លោកអភិបាលខេត្ត ក៏បានធ្វើការកោតសរសើរចំពោះមន្ត្រីចត្តាឡីស័ក សមត្ថកិច្ច និងមន្ត្រីជំនាញពាក់ព័ន្ធទាំងអស់ ដែលបានអនុវត្តតួនាទី ក្នុងការការពារសន្តិសុខ សុវត្ថិភាព សណ្ដាប់ធ្នាប់នៅតាមព្រំដែន និងការពង្រឹងកិច្ចសហប្រតិបត្តិការល្អប្រសើរ ជាមួយភាគីវៀតណាម ក្នុងការសម្របសម្រួល លើការដឹកជញ្ជូន និងផ្លាស់ប្តូរទំនិញឆ្លងកាត់ព្រំដែន បញ្ចៀសបាននូវការកកស្ទះ ជាមួយការប្រកាន់ខ្ជាប់នូវការអនុវត្តតាមវិធានការក្រសួងសុខាភិបាលបានយ៉ាងល្អប្រសើរ។

លោក អ៊ូច ភា បានធ្វើការផ្ដាំផ្ញើដល់អាជ្ញាធរដែនដី កងកម្លាំង និងមន្ត្រីពាក់ព័ន្ធទាំងអស់ ត្រូវបន្តពង្រឹងការចេញល្បាតតាមភូមិសាស្ត្រខ្សែបន្ទាត់ព្រំដែន ដើម្បីបង្ការ ទប់ស្កាត់ការលួចឆ្លងដែនខុសច្បាប់ ហើយក្នុងករណីមានប្រជាពលរដ្ឋឆ្លងដែនចូលមកកម្ពុជា ត្រូវធ្វើចត្តាឡីស័កជាដាច់ខាត នៅទីតាំងដែលរដ្ឋបាលខេត្ត បានរៀបចំរួចជាស្រេច ដោយមិនត្រូវឲ្យជនណាម្នាក់ឆ្លងកាត់ព្រំដែនដោយមិនបានត្រួតពិនិត្យ និងមិនបានធ្វើចត្តាឡីស័កនោះទេ ជារួមគឺត្រូវតែបង្ខំឲ្យធ្វើចត្តាឡីស័កជាដាច់ខាត ដោយគ្មានការលើកលែងនោះឡើយ។ ជាមួយគ្នានេះដែរលោកអភិបាលខេត្ត ក៏អំពាវនាវដល់ប្រជាពលរដ្ឋទាំងអស់ ត្រូវបន្តប្រុងប្រយ័ត្ន និងការពារខ្លួនជានិច្ចពីជំងឺកូវីដ-១៩ ដោយត្រូវប្រកាន់ខ្ជាប់នូវអនាម័យឧស្សាហ៍លាងសម្អាតដៃ ជាមួយសាប៊ូ ជែល ឬអាល់កុលជាប្រចាំ ហើយសូមកុំធ្វើដំណើរឆ្លងដែន បើមិនមានការចាំបាច់។

សូមបញ្ជាក់ដែរថា សម្ភារៈដែលបានផ្ដល់ជូននាឱកាសនោះរួមមាន ត្រីខ២០កេះ ស្មើ២០០យួរ មី ៣៦០កេះ ទឹកបរិសុទ្ធ២០០កេះ និងទឹកស៊ីអ៊ីវ២០០យួរ៕

អត្ថបទ ៖ វីរៈ