អាជ្ញាធរខេត្តកោះកុង ចុះប្រមូលព័ត៌មានលើទីតាំងដីចម្ការឈើអាកាស្យារបស់រដ្ឋដែលធ្លាប់មានវិវាទ

អាជ្ញាធរ និងមន្ទីរជំនាញពាក់ព័ន្ធរបស់ខេត្តកោះកុង បានចុះប្រមូលទិន្នន័យព័ត៌មានលើទីតាំងដីចម្ការឈើអាកាស្យរដ្ឋដែលធ្លាប់មានវិវាទ នៅសង្កាត់ស្មាច់មានជ័យ ក្រុងខេមរភូមិន្ទ ដើម្បីកំណត់អត្តសញ្ញាណប្រជាពលរដ្ឋចូលកាន់កាប់ដីជាក់ស្តែង។

លោកស្រី អ៊ី នារីនេត អភិបាលរងខេត្តកោះកុង គូសបញ្ជាក់ថា ក្រោយមានគោលការណ៍សម្រេចរបស់លោកស្រីអភិបាលខេត្ត លោកស្រីបានដឹកនាំក្រុមការងារចុះពិនិត្យ និងស្រង់ស្ថិតិបច្ចុប្បន្នភាពរបស់ពលរដ្ឋដែលរស់នៅជាក់ស្តែងលើដីចម្ការឈើអាកាស្យាដែលស្ថិតក្រោមការគ្រប់គ្រងរបស់មន្ទីរកសិកម្ម រុក្ខាប្រមាញ់ និងនេសាទខេត្ត។

លោកអភិបាលខេត្តដដែល បន្តប្រាប់កម្ពុជាថ្មី រសៀលថ្ងៃទី៩ ខែកញ្ញា ឆ្នាំ២០២៤ថា បន្ទាប់ពីស្រង់ស្ថិតិទិន្នន័យការរស់នៅជាក់ស្តែងរបស់ពលរដ្ឋរួចរាល់ លោកស្រីនឹងបន្តធ្វើរបាយការណ៍លម្អិតជូនថ្នាក់ដឹកនាំពិនិត្យនិងសម្រេចតាមនីតិវិធី។

ដោយឡែកលោកស្រី អែម សុធារ៉ា អនុប្រធានទទួលបន្ទុករួមនៃមន្ទីរកសិកម្ម រុក្ខាប្រមាញ់ និងនេសាទខេត្តកោះកុង បានឱ្យដឹងស្របដៀងនឹងអភិបាលរងខេត្តដែរថា មន្ទីរគ្រាន់តែចង់ធ្វើបច្ចុប្បន្នភាពស្ថិតិពិតប្រាកដរបស់ពលរដ្ឋដែលចូលតាំងទីលំនៅដ្ឋានលើដីរបស់រដ្ឋប៉ុណ្ណោះទេ។ កន្លងទៅ មានប្រជាពលរដ្ឋ១៥៣គ្រួសារមានផ្ទះសម្បែងនៅដីចម្ការឈើអាកាស្យាតាមរយៈចូលមកចាប់ដីខុសច្បាប់តែម្តង។

លោកស្រី អែម សុធារ៉ា ក៏ពន្យល់ទៀតថា ពលរដ្ឋចាប់ដីតាមទំហំខ្លះ៥ម៉ែត្រគុណ២០ម៉ែត្រ ខ្លះទៀត១៥ម៉ែត្រគុណ២៣ម៉ែត្រ ក្រោមហេតុផលថាគ្មានដីរស់នៅ និងជឿជាក់តាមគេញុះញង់ដោយបំពានច្បាប់ទាំងស្រុង។

គេនៅចាំបានថា អំឡុងឆ្នាំ២០១៨ ឬឆ្នាំ២០១៩ បញ្ហាដីធ្លីនៅចម្ការឈើអាកាស្យានេះមានរឿងរ៉ាវរុំារ៉ៃយ៉ាងខ្លាំងបង្កការលំបាកដោះស្រាយរហូតដល់មានការចេញសាលដីកាការពារបស់តុលាការមិនអោយភាគីណាមួយចូលធ្វីអ្វីលើដីទំនាស់នោះឡើយ។ ហើយរហូតមិនដល់ពេលនេះ គេនៅមិនទាន់ដឹងថា ស្ថានភាពបញ្ហាខាងលើនេះវិវត្តន៍ដោះស្រាយបានកម្រិតណាទេ គ្រាពេលរដ្ឋអះអាងថាមានការទិញលក់ទទួលស្គាល់ដឹងឮថាពីអាជ្ញាធរមូលដ្ឋានទៀតផង៕

អត្តបទ៖សិរីវឌ្ឍនៈ