ព័ត៌មានជាតិ

កម្ពុជាកំពុងចរចា ចុះកិច្ចព្រមព្រៀងចំនួន ៤ ពង្រីកការនាំចេញអង្ករកម្ពុជា ទៅទីផ្សារប្រទេសក្នុងតំបន់

បានផុស

២ years មុន

នៅ

ថ្ងៃអង្គារ ១០ កញ្ញា ២០២៤

ដោយ

លោកស្រី ចម និម្មល រដ្ឋមន្ត្រីក្រសួងពាណិជ្ជកម្ម ក្នុងពិធីបើក “វេទិកាស្រូវអង្ករកម្ពុជា លើកទី៧ ឆ្នាំ២០២៤” នៅព្រឹកថ្ងៃទី១០ ខែកញ្ញា នេះ បានគូសបញ្ជាក់ថា បច្ចុប្បន្ននេះ ក្រសួងពាណិជ្ជកម្ម តាមរយៈក្រុមហ៊ុនហ្រ្គីនត្រេដ បាននិងកំពុងបន្តកិច្ចខិតខំប្រឹងប្រែងក្នុងការចរចាជាមួយបណ្តាប្រទេសក្នុងតំបន់លើការរៀបចំអនុស្សរណៈចំនួន ៤ ដើម្បីពង្រីកទីផ្សារអង្ករកម្ពុជា។

លោកស្រី ចម និម្មល រដ្ឋមន្ត្រីក្រសួងពាណិជ្ជកម្ម បានមានប្រសាសន៍ថា ក្រៅពីអនុស្សារណៈនៃការយោគយល់គ្នា ស្តីពីការធ្វើពាណិជ្ជកម្មអង្ករ ជាមួយសាជីវកម្ម COFCO នៃសាធារណៈរដ្ឋប្រជាមានិតចិន ក្នុងការនាំចេញអង្ករចំនួន ៥០០ ០០០ តោន ក្រសួងពាណិជ្ជកម្ម បាននិងកំពុងបន្តកិច្ចចរចាជាមួយបណ្តាប្រទេសក្នុងតំបន់លើការរៀបចំអនុស្សរណៈចំនួន ៤ បន្ថែមទៀតសំដៅជួយបង្កើនទីផ្សារអង្ករកម្ពុជា។

ក្នុងនោះរួមមានអនុស្សារណៈនៃការយោគយល់គ្នារវាង (១). កម្ពុជា និងទីភ្នាក់ងារចំណីអាហារសិង្ហបុរី (SFA) (២). កម្ពុជា និងសាជីវកម្មពាណិជ្ជកម្ម អន្តរជាតិហ្វីលីពីន (Philippines International Trading Corporation – PITC) (៣). កម្ពុជា និងឥណ្ឌូណេស៊ី ក្នុងការនាំចេញអង្ករពីកម្ពុជាទៅឥណ្ឌូនេស៊ី ក្នុងបរិមាណ ២៥ ម៉ឺនតោន ក្នុងរយៈពេល ៤ឆ្នាំ និង(៤). កម្ពុជា និង Guangdong- Hong Kong – Macao Great Bay Area (GBA)។

បើតាមរដ្ឋមន្រ្តីក្រសួងពាណិជ្ជកម្ម តាមរយៈការរៀបចំនេះ នឹងជួយជំរុញការផ្សព្វផ្សាយបន្ថែមដល់សាធារណជន និងធុរជនទាំងអស់ឱ្យបានយល់ដឹងកាន់តែច្បាស់ពីសក្ដានុពល និងកាលានុវត្តភាព ក្នុងវិស័យស្រូវអង្ករកម្ពុជា សំដៅទាក់ទាញវិនិយោគិន ចូលរួមបណ្តាក់ទុនក្នុងផលិតកម្ម លើកកម្ពស់តម្លៃបន្ថែមលើគុណភាពខ្សែច្រវាក់ផលិតកម្មអង្ករ និងម៉ាកច្បាស់លាស់សម្រាប់បម្រើទីផ្សារក្នុងស្រុក និងអន្តរជាតិ បន្ថែមនឹងជួយបង្កើតការងារ លើកស្ទួយកម្រិតជីវភាពរស់នៅរបស់ប្រជាពលរដ្ឋនៅតាមមូលដ្ឋាន ក៏ដូចជាលើកកម្ពស់ភាពប្រកួតប្រជែង និងជួយជំរុញដល់កំណើនសេដ្ឋកិច្ចជាតិប្រកបដោយចីរភាព និងបរិយាបន្ន៕