ព័ត៌មានជាតិ

បិទផ្អាកការចរាចរណ៍ទូកដតូច នៅចំណុចព្រែកតាឃ្លោក ឃុំកោះសូទិន

បានផុស

២ years មុន

នៅ

ថ្ងៃព្រហស្បតិ៍ ១៩ កញ្ញា ២០២៤

ដោយ

អភិបាលខេត្តកំពង់ចាម បិទផ្អាកការចរាចរណ៍ទូកដតូច នៅចំណុចព្រែកតាឃ្លោក ឃុំកោះសូទិន ខណៈកាលពីថ្ងៃទី ១៨ ខែកញ្ញា ឆ្នាំ ២០២៤ ការចម្លងទូកដនៅចំណុចនេះ ដាក់លើសចំណុះ ធ្វើឲ្យលិចទូក និងខូចខាតម៉ូតូ សម្ភារៈជាច្រើន តែមិនបណ្ដាលឲ្យមាននរណាម្នាក់រងគ្រោះថ្នាក់ឡើយ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ជាក់ស្ដែងនៅព្រឹកថ្ងៃទី ១៩ ខែកញ្ញា ឆ្នាំ ២០២៤ នេះ លោក អ៊ុន ចាន់ដា អភិបាល នៃគណៈអភិបាលខេត្តកំពង់ចាម បានដឹកនាំក្រុមការងារ មន្ទីរ/អង្គភាពជំនាញ អញ្ជើញចុះពិនិត្យស្ថានភាពទឹកជំនន់ទន្លេមេគង្គ ដែលកំពុងហក់ឡើងយ៉ាងគំហុក ស្ថិតនៅចំណុច “ព្រែកតាឃ្លោក ” ក្នុងភូមិទី ១០ ឃុំកោះសូទិន ស្រុកកោះសូទិន និងបានដាក់ចេញជាវិធានការបន្ទាន់ដល់អាជ្ញាធរមូលដ្ឋាន និងមន្ត្រីជំនាញ ដើម្បីសម្រួលការធ្វើចរាចរណ៍ទៅមករបស់ប្រជាពលរដ្ឋ ធានាឲ្យមានសុខសុវត្ថិភាព និងការទទួលខុសត្រូវខ្ពស់នៅលើការចម្លងទៅវិញទៅមកនារដូវទឹកឡើងនេះ។

យោងតាមរបាយការណ៍កម្ពស់ទឹកពីមន្ទីរធនធានទឹក និងឧតុនិយមខេត្តកំពង់ចាម បានបញ្ជាក់ថា នៅថ្ងៃទី ១៩ ខែកញ្ញា ឆ្នាំ ២០២៤ នេះ កម្ពស់ទឹកទន្លេមេគង្គបានឡើងដល់កម្ពស់ ១២.៩៦ ម៉ែត្រ បើធៀបថ្ងៃដដែល ឆ្នាំមុន កម្ពស់ទឹកទន្លេមេគង្គកំពង់ចាម មានកម្ពស់ ១២.៩៨ ម៉ែត្រ ហើយកម្រិតដែលត្រូវប្រកាសអាសន្នសម្រាប់ខេត្តកំពង់ចាម-ត្បូងឃ្មុំ គឺ កម្ពស់ ១៥.២០ សង់ទីម៉ែត្រ។

លោក អ៊ុម វិបុល ប្រធានមន្ទីរធនធានទឹក និងឧតុនិយមខេត្តកំពង់ចាម បានឲ្យដឹងដែរថា កម្ពស់ទឹកទន្លេឡើងនៅពេលនេះ បាន និងកំពុងហូរចូលទៅតំបន់វាលទំនាបហើយ ពោលបច្ចុប្បន្នចូលដល់ព្រែកចំនួន ២៧ កន្លែង ខណៈព្រែកទាំងអស់នៅខេត្តមាន ៤១ កន្លែង និងទឹកទន្លេតូច ក្នុងស្រុកកោះសូទិន បានហូរកាត់ដាច់ផ្លូវបេតុង ០៤ កន្លែង ដែលប្រជាពលរដ្ឋនៅតំបន់នោះ ត្រូវឆ្លងតាមទូកចម្លង ឬ កាណូតឆ្លងពីត្រើយម្ខាងទៅម្ខាងជំនួសវិញ៕

អត្ថបទ និង រូបភាព ៖ ឡេក ចាន់ពេជ្រ