សេវាច្រកចេញចូលតែមួយតាមប្រព័ន្ធអនឡាញ បាននិងកំពុងដាក់សាកល្បងនៅក្រុងស្រុកខណ្ឌ ចំនួន៥

រដ្ឋបាលក្រុង-ស្រុក-ខណ្ឌចំនួន៥ បានដាក់ឱ្យអនុវត្តសាកល្បងកម្មវិធីព័ត៌មានវិទ្យាសម្រាប់ពាក្យស្នើសុំ និងផ្ដល់សេវារដ្ឋបាលតាមប្រព័ន្ធអនឡាញ។ ក្រុង-ស្រុក-ខណ្ឌ ទាំងនេះ រួមមាន រដ្ឋបាលក្រុងបាត់ដំបង ស្រុកមោងឫស្សី ស្រុកបាណន់ ខណ្ឌទួលគោក និងរដ្ឋបាលក្រុងសិរីសោភ័ណ។ នេះតាមការឱ្យដឹងដោយអ្នកនាំពាក្យរងក្រសួងមហាផ្ទៃ។

ដំណើរការសាកល្បងសេវាច្រកចេញចូលតែមួយតាមប្រព័ន្ធអនឡាញនេះ គឺស្របតាមយុទ្ធសាស្រ្តបញ្ចកោណ ដំណាក់កាលទី១​ របស់រាជរដ្ឋាភិបាល ក្រោមការដឹកនាំរបស់សម្ដេចធិបតី ហ៊ុន ម៉ាណែត ដោយបានកំណត់យកអាទិភាពគន្លឹះ៥ គឺមនុស្ស ផ្លូវ ទឹក ភ្លើង និងបច្ចេកវិទ្យា។

លោក ទូច សុខៈ អ្នកនាំពាក្យរងក្រសួងមហាផ្ទៃ បានឱ្យដឹងថា ប្រភេទសេវាដែលបាននិងកំពុងអនុវត្តសាកល្បងតាមបណ្ដាក្រុង ស្រុក ខណ្ឌទាំងនោះ រួមមាន ១) ការងារនីត្យានុកូលកម្មមានចំនួន៣សេវា (អត្តសញ្ញាណបណ្ណ សៀវភៅស្នាក់នៅនិងសៀវភៅគ្រួសារ) ២) ការងារអត្រានុកូលដ្ឋានចំនួន៣សេវា (សេចក្តីចម្លងឬបញ្ជាក់សំបុត្រកំណើត សេចក្ដីចម្លងឬបញ្ជាក់សំបុត្រអាពាហ៍ពិពាហ៍ និងសេចក្ដីចម្លងឬបញ្ជាក់សំបុត្រមរណភាព) និង៣) វិស័យទេសចរណ៍ចំនួន៣ សេវា (ការស្នើសុំបើកថ្មី ស្នើសុំបន្តសុពលភាពនិងស្នើសុំប្តូរម្ចាស់ចំពោះអាជីវកម្មផ្ទះសំណាក់ចាប់ពី៨បន្ទប់ចុះក្រោម)។

ផ្អែកតាមខ្លឹមសារនៃសេចក្ដីជូនដំណឹងផ្សេងៗគ្នានោះ គឺនីតិវិធីនៃការផ្តល់សេវាតាមប្រព័ន្ធអនឡាញខាងលើនេះ នឹងប្រព្រឹត្តទៅតាមដំណាក់កាលនីមួយៗ រួមមាន ១-ការទទួលពិនិត្យនិងវាយតម្លៃលើសំណុំឯកសារស្នើសុំសេវា ២-ការបង់កម្រៃសេវារដ្ឋបាល(ក្នុងករណីតម្រូវបង់) ៣-ការពិនិត្យ និងផ្តល់យោបល់បច្ចេកទេស ៤-ការពិនិត្យនិងការសម្រេច និង៥-ការផ្តល់លទ្ធផលសម្រេច។ ដំណាក់កាលចុងក្រោយ គឺមានន័យថា ប្រជាពលរដ្ឋដែលបានស្នើសុំសេវានឹងត្រូវទទួលយកសេវានោះដោយផ្ទាល់ បន្ទាប់ពីបានអនុវត្តនីវិធីតាមប្រព័ន្ធអនឡាញ។

ជាការកត់សម្គាល់ រាល់ឯកសារដែលស្នើសុំសេវាតាមប្រព័ន្ធអនឡាញត្រូវថតឱ្យបានច្បាស់ ឬផ្ញើជាFile PDF តាមរយៈគេហទំព័រ https://onlinedmk.owso.gov.kh/។ ទន្ទឹមគ្នានេះ ប្រជាពលរដ្ឋនៅតែអាចបន្តស្នើសុំសេវាដូចគ្នានេះនៅការិយាល័យច្រកចេញចូលតែមួយក្រុងស្រុកខណ្ឌជាធម្មតា ទាំងសេវាដែលដាក់ឱ្យដំណើរការសាកល្បងតាមប្រព័ន្ធ អនឡាញ និងសេវាជាប្រក្រតីផ្សេងទៀត ដោយនៅទីនោះ មានក្រុមមន្រ្តីចាំទទួលស្វាគមន៍ និងប្រឹក្សាយោបល់ប្រកបដោយក្ដីរាក់ទាក់បំផុត។

អ្នកនាំពាក្យរងក្រសួងមហាផ្ទៃ បានបន្ថែមថា ការដាក់ឱ្យដំណើរការសាកល្បងនូវសេវាច្រកចេញចូលតែមួយក្រុង ស្រុក ខណ្ឌ តាមប្រព័ន្ធអនឡាញនេះស្ដែងឡើងស្របតាមគោលការណ៍ណែនាំ និងទិសដៅអាទិភាពការងារ ដែលដាក់ចេញដោយលោក ស សុខា ឧបនាយករដ្ឋមន្រ្តី រដ្ឋមន្រ្តីក្រសួងមហាផ្ទៃ។ ទិសដៅអាទិភាព គឺការខិតខំជំរុញការធ្វើទំនើបកម្មសេវាមួយចំនួនពីបែបប្រពៃណី ឬការជួបផ្ទាល់មកជាការរៀបចំតាមអនឡាញជាមុន ដើម្បីផ្ដល់ភាពងាយស្រួលជូនប្រជាពលរដ្ឋ ស្របតាមទស្សនៈ «ធ្វើអ្វីៗដើម្បីផ្ដល់ភាពកក់ក្ដៅជូនប្រជាពលរដ្ឋ»៕