ក្រសួងកិច្ចការនារី និង អ.គ.ហ ត្រៀមទស្សនកិច្ចសិក្សា ស្តីពីថវិកាឆ្លើយតបនឹងយេនឌ័រ នៅហ្វីលីពីន នាពេលខាងមុខ

ក្រសួងកិច្ចការនារី និងអគ្គលេខាធិការដ្ឋានគណៈកម្មាធិការដឹកនាំការងារកែទម្រង់ការគ្រប់គ្រងហិរញ្ញវត្ថុសាធារណៈ(អ.គ.ហ) បានរៀបចំកិច្ចប្រជុំត្រៀម សម្រាប់កម្មវិធីទស្សនកិច្ចសិក្សា និងផ្លាស់ប្តូរមេរៀនបទពិសោធន៍ ស្តីពីថវិកាឆ្លើយតបនឹងយេនឌ័រ (Gender Responsive Budgeting) នៅប្រទេសហ្វីលីពីន ដែលនឹងប្រព្រឹត្តទៅនាពេលដ៏ខ្លីខាងមុខ។

កិច្ចប្រជុំនេះធ្វើឡើង នារសៀលថ្ងៃទី២៧ ខែកញ្ញា ឆ្នាំ២០២៤ ដឹកនាំដោយ លោកស្រី អ៊ឹង កន្ថាផាវី រដ្ឋមន្ត្រីក្រសួងកិច្ចការនារី ដើម្បីត្រៀមសម្រាប់ទស្សនកិច្ចសិក្សា និងផ្លាស់ប្តូរមេរៀនបទពិសោធន៍ស្តីពីថវិកាឆ្លើយតបនឹងយេនឌ័រ នៅប្រទេសហ្វីលីពីន ដែលនឹងប្រព្រឹត្តទៅនាខែតុលា ឆ្នាំ២០២៤។ កម្មវិធីនេះ គឺជាកិច្ចការមួយ នៅក្នុងក្របខ័ណ្ឌនៃកិច្ចសហការរវាងក្រសួងកិច្ចការនារី និងអគ្គលេខាធិការដ្ឋានកែទម្រង់ការគ្រប់គ្រងហិរញ្ញវត្ថុសាធារណៈ (#PFM #GSC) ក្នុងការសិក្សាស្វែងយល់ និងប្រមូលធាតុចូលបន្ថែម ពីបណ្តាប្រទេសនិងដៃគូពាក់ព័ន្ធ ដើម្បីឈានទៅអនុវត្តន៍កម្មវិធីថវិកាឆ្លើយតបនឹងយេនឌ័រ (#GRB) នៅកម្ពុជា- ដែលជាអភិក្រមអាទិភាព នៃការងារបញ្ជ្រាបយេនឌ័រនៅកម្ពុជា ក្នុងដំណាក់កាលអភិក្រមបរិវត្តកម្មយេនឌ័រ (#GenderTransformative)។

កិច្ចប្រជុំត្រៀមនេះ មានការចូលរួមពីគណៈប្រតិភូកម្ពុជា មកពីក្រសួងកិច្ចការនារី អគ្គលេខាធិការដ្ឋានគណៈកម្មាធិការដឹកនាំការងារកែទម្រង់ការគ្រប់គ្រងហិរញ្ញវត្ថុសាធារណៈ (អ.គ.ហ) ក្រសួងសេដ្ឋកិច្ចនិងហិរញ្ញវត្ថុ ក្រសួងស្ថាប័នពាក់ព័ន្ធ និងមន្រ្តីកម្មវិធីអភិវឌ្ឍសហប្រជាជាតិប្រចាំកម្ពុជា៕