ពលរដ្ឋត្រៀមខ្លួនជាស្រេច ដើម្បីជិះរថយន្តក្រុងឥតគិតថ្លៃរបស់រាជរដ្ឋាភិបាលក្នុងឱកាសបុណ្យភ្ជុំបិណ្ឌ

ពលរដ្ឋសាទរយ៉ាងក្លៀវក្លាបំផុតចំពោះការរាជរដ្ឋាភិបាលដែលបានគិតគូរផ្តល់រថយន្តក្រុងសាធារណៈជាង៦០០គ្រឿង សម្រាប់បម្រើដល់ការដឹកជញ្ចូនឥតគិតថ្លៃទៅកាន់ស្រុកកំណើតរយៈពេល៦ថ្ងៃ ក្នុងឱកាសបុណ្យភ្ជុំបិណ្ឌនេះ។

លោក ឡយ ស៊ាងអាង ប្រធានគណៈកម្មការផ្សារអូរឬស្សី សម្តែងក្តីសាទរ និងរីករាយចំពោះការគិតគូររបស់រាជរដ្ឋាភិបាលជូនដល់អាជីវករ កម្មករ ក៏ដូចជាប្រជាពលរដ្ឋទូទៅទាំងអស់ អាចធ្វើដំណើរដោយមិនគិតប្រាក់កាស។ លោកបន្ថែមថា ការគិតគូរនេះគឺជាអំណោយ និងទឹកចិត្តដ៏ប្រពៃថ្លៃថ្លាបំផុតដែលរដ្ឋាភិបាល តាំងពីអាណត្តិសម្តេចតេជោ បន្តមកដល់សម្តេចធិបតី គឺតែងតែនៅជិតជាមួយសុខទុក្ខរបស់ពលរដ្ឋនៅទូទាំងប្រទេស។ បន្ថែមទៀតនោះលោកប្រធានផ្សារជាមួយកម្លាំងសន្តិសុខផ្សារបានណែនាំ និងផ្សព្វផ្សាយសេចក្ដីជូនដំណឹងពីការធ្វើដំណើរដោយរថយន្តរបស់រដ្ឋាភិបាលដល់អាជីវករ កម្មក បន្ថែមទៀត ដល់អ្នកដែលមិនទាន់ទទួលបានព័ត៌មាន ថាចាប់ផ្ដើមជិះទៅតាមបណ្ដាខេត្ត ចាប់ពីថ្ងៃទី២៩ ខែកញ្ញា ឆ្នាំ២០២៤ រហូតដល់ថ្ងៃទី០៤ ខែតុលា ឆ្នាំ២០២៤ ចប់បុណ្យភ្ជុំបិណ្ឌ។

ប្រជាពលរដ្ឋ សម្តែងក្តីរំភើបរីករាយបំផុត ចំពោះការផ្តល់ឱ្យរបស់សម្តេចធិបតី ព្រោះវាបានចូលរួមសម្រាលការចំណាយប្រាក់កាសក្នុងការធ្វើដំណើរទៅស្រុកកំណើត ពិសេសអ្នកដែលមានស្រុកកំណើតនៅបណ្តាខេត្តឆ្ងាយៗ និងថ្លែងអំណរអរគុណដល់រដ្ឋាភិបាល គិតគូរប្រយោជន៍របស់ប្រជាពលរដ្ឋ តាំងពីសម្តេចតេជោ ហ៊ុន សែន រហូតដល់សម្តេចធិបតី ហ៊ុន ម៉ាណែត នាយករដ្ឋមន្ត្រី ដែលផ្ដល់រថយន្តក្រុងជិះទៅលេងស្រុកកំណើតដោយមិនគិតថ្លៃ។

សូមបញ្ជាក់ថា រដ្ឋបាលរាជធានីភ្នំពេញ បានរៀបចំរថយន្តក្រុងសាធារណៈចំនួន៦៥៣គ្រឿង សម្រាប់បម្រើដល់ការដឹកជញ្ចូនឥតគិតថ្លៃនៅទូទាំងប្រទេស ក្នុងរយៈពេល០៦ថ្ងៃ គិតចាប់ពីថ្ងៃទី២៩ ខែកញ្ញា ស្អែកនេះ ដល់ថ្ងៃទី៤ ខែតុលា ឆ្នាំ២០២៤ ។

រថយន្តទាំង៦៥៣គ្រឿង បែកចែកចេញជា៣ផ្នែក ដោយ១០០គ្រឿងប្រើប្រាស់សម្រាប់ការដឹកជញ្ជូនក្នុងរាជធានីភ្នំពេញ ៤៩៧គ្រឿង ប្រើសម្រាប់ការដឹកជញ្ចូនទៅតាមបណ្តាខេត្តទាំងអស់ ដោយមិនរាប់បញ្ចូលខេត្តនៅភូមិភាគឦសាន និង៥៣គ្រឿងទៀត ប្រើសម្រាប់ការដឹកជញ្ចូនទៅខេត្តនៅភូមិភាគឦសាន មានមណ្ឌលគីរី រតនះគីរី ក្រចេះ និងស្ទឹងត្រែង៕

អត្ថបទ៖ សុភា