ព័ត៌មានជាតិ

អភិបាលខេត្តកោះកុង ប្រាប់ដល់បេក្ខជនប្រឡងបាក់ឌុប ត្រូវប្រឹងប្រែងឲ្យអស់ពីសមត្ថភាព កុំភិតភ័យ

បានផុស

២ years មុន

នៅ

ថ្ងៃអង្គារ ៨ តុលា ២០២៤

ដោយ

លោកស្រីអភិបាលខេត្តកោះកុង បានប្រាប់ដល់ក្រុមបេក្ខជនប្រឡងបាក់ឌុបទាំងអស់ ត្រូវប្រឹងប្រែងបំពេញលំហាត់លើសន្លឹកកិច្ចការឲ្យអស់ពីសមត្ថភាពដែលខ្លួនមាន ហើយកុំភិតភ័យចំពោះការប្រឡងនេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការបំផុសស្មារតីដល់បេក្ខជនប្រឡងសញ្ញាបត្រមធ្យមសិក្សាទុតិយភូមិ ឬ បាក់ឌុប របស់លោកស្រី មិថុនា ភូថង អភិបាលខេត្តកោះកុង នាពេលនេះ ធ្វើឡើងអំឡុងពេលលោកស្រីអញ្ជើញចូលរួមបើកហិបវិញ្ញាសាប្រឡងសម័យ ៨ តុលា ២០២៤ នៅមណ្ឌលវិទ្យាល័យចំណេះទូទៅ និងបច្ចេកទេសតេជោ សែន កោះកុង។

លោកស្រីអភិបាលខេត្ត បានបន្ថែមទៀតថា ការភិតភ័យអាចធ្វើឲ្យបេក្ខជនប្រឡងបាត់បង់ឱកាសបំពេញលំហាត់លើសន្លឹកកិច្ចការរបស់ខ្លួន ដូច្នេះសូមធ្វើអារម្មណ៍ធម្មតាៗ ដោយយកចំណេះដឹងដែលធ្លាប់សិក្សាជាមួយលោកគ្រូអ្នកគ្រូមកបញ្ចេញអស់ពីសមត្ថភាពនៅពេលនេះ ដើម្បីឈានដល់សម្រេចលទ្ធផលយ៉ាងត្រចះត្រចង់ បន្ទាប់ពីការប្រឡងបញ្ចប់។

មិនត្រឹមតែប៉ុណ្ណោះទេ លោកស្រី មិថុនា ភូថង ក៏ណែនាំបេក្ខជនប្រឡង ត្រូវថែរក្សាសុខភាពអំឡុងដំណើរការប្រឡងផងដែរ ករណីមានបញ្ហាណាមួយចាំបាច់ផ្តល់មកកាន់ប្រធានមណ្ឌល និងអាជ្ញាធរសមត្ថកិច្ច ដើម្បីដោះស្រាយទាន់ពេលវេលា។ រដ្ឋបាលខេត្តកោះកុង ក៏បានផ្តល់ទីកន្លែងស្នាក់នៅបេក្ខជនប្រឡង និងអាណាព្យាបាលសិស្សណាដែលខ្វះខាតផងដែរ។

ឆ្នាំ ២០២៤ នេះ ខេត្តកោះកុង មានបេក្ខជនប្រឡងសញ្ញាបត្រមធ្យមសិក្សាទុតិយភូមិ ឬ បាក់ឌុប សរុបចំនួន ១.១៤១ នាក់/ស្រី ៦១៦ នាក់ និងបែងចែកជាមណ្ឌលប្រឡងចំនួន ៣ មណ្ឌល ស្មើនឹង ៤៧ បន្ទប់។ ឆ្នាំនេះ ក៏មិនខុសពីឆ្នាំមុនៗ ទេ លោកស្រី មិថុនា ភូថង ប្រកាសផ្តល់ថវិកាលើកទឹកចិត្តបន្តដល់បេក្ខជនប្រឡង ករណីបេក្ខជនណាម្នាក់ជាប់និទ្ទេស A នឹងទទួលបានថវិកាចំនួន ៤ លានរៀល៕

អត្ថបទ ៖ សិរីវឌ្ឍនៈ