អាជ្ញាធរខេត្តកំពង់ស្ពឺព្រមានបិទអាជីវកម្ម និងដកហូតអាជ្ញាប័ណ្ណ ករណីមិនអនុវត្តតាមសេចក្តីណែនាំទប់ស្កាត់ជំងឺកូវីដ១៩

អាជ្ញាធរខេត្តកំពង់ស្ពឺបានព្រមានធ្ងន់ៗចំពោះម្ចាស់អាជីវកម្ម ខារ៉ាអូខេ ក្លឹបកំសាន្ត និង ភោជនីយដ្ឋានគ្រប់ប្រភេទ ដែលមិនស្តាប់តាមការណែនាំរបស់រដ្ឋបាលខេត្តកំពង់ស្ពឺ អាជ្ញាធរនឹងមានវិធានការតាមផ្លូវច្បាប់ដូចជា បិទអាជីវកម្ម ដកអាជ្ញាប័ណ្ណ នឹងឈានដល់ការកសាងសំណុំរឿងបញ្ជូនទៅកាន់តុលាការដើម្បីចាត់ការតាមផ្លូវច្បាប់។

ការរឹតបន្តឹង និងព្រមានធ្ងន់ៗដល់ម្ចាស់អាជីវកម្ម ការ៉ាអូខេ ក្លឹបកំសាន្ត ហាងផឹកស៊ីនេះ គឺធ្វើឡើងដើម្បីរួមគ្នាទប់ស្កាត់ការរីករាលដាលវីរុសកូវីដ-១៩ចូលសហគមន៍តែម្តង ។

ជាក់ស្តែង នៅយប់រំលងអាធ្រាត្រឈានចូលថ្ងៃទី១២ ខែមីនា ឆ្នាំ២០២១ ដោយអនុវត្តតាមសេចក្តីណែនាំរបស់រាជរដ្ឋាភិបាលកម្ពុជា លោក សរ សុពុត្រា អភិបាលរង​ខេត្តកំពង់ស្ពឺ បានដឹកនាំកម្លាំងគណៈបញ្ជាការឯកភាព ចុះត្រួតពិនិត្យតាមបណ្ដា បារ ខារ៉ាអូខេ និងក្លឹបកំសាន្តនានាទូទាំងខេត្ត ដើម្បីចូលរួមទប់ស្កាត់ការរីករាលដាលជំងឺកូវីដ-១៩ នៅតាមសហគមន៍ ។ 

ការត្រួតពិនិត្យតាម បារ ការ៉ាអូខេ ក្លឹបរាត្រី និងហាងផឹកស៊ីនេះ ត្រូវបានធ្វើឡើងតាមការចង្អុលបង្ហាញរបស់លោក វ៉ី សំណាង អភិបាលនៃគណៈអភិបាលខេត្តកំពង់ស្ពឺ នៃគណៈបញ្ជាការឯកភាពខេត្ត។

ក្នុងនាមគណៈបញ្ជាការឯកភាពខេត្ត លោក សរ សុពត្រា បានព្រមានថា ក្នុងករណីអស់លោក លោកស្រី ដែលជាម្ចាស់អាជីវកម្ម ក្លឹបកំសាន្ត ការ៉ាអូខេ ហាងផឹកស៊ី​ នៅតែរំលោភបំពានមិនអនុវត្តតាមសេចក្តីណែនាំរបស់រដ្ឋបាលខេត្ត រដ្ឋបាលខេត្តនឹងអនុវត្តនូវវិធានការមួយចំនួន រួមមាន​៖ ការបិទអាជីវកម្ម ការដកហូតអាជ្ញាប័ណ្ណ និងកសាងសំណុំរឿងបញ្ជូនទៅកាន់សាលាដំបូងខេត្តដើម្បីអនុវត្តតាមច្បាប់ ។