កម្លាំងរដ្ឋបាលជលផលខេត្តកំពង់ចាម បង្ក្រាបបទល្មើសនេសាទ ១ករណី ក្នុងស្រុកបាធាយ

កម្លាំងមន្ត្រីរដ្ឋបាលជលផលខេត្តកំពង់ចាម នៅថ្ងៃទី១០ ខែធ្នូ ឆ្នាំ២០២៤ បានចេញប្រតិបត្តិការបង្ក្រាបបទល្មើសនេសាទមួយករណី នៅចំណុចតាមដងទន្លេសាប ស្ថិតក្នុងភូមិអូរម៉ាល់ ឃុំបាធាយ ស្រុកបាធាយ ខេត្តកំពង់ចាម។

មន្ត្រីរដ្ឋបាលជលផល បានឱ្យដឹងថា ឧបករណ៍នេសាទខុសច្បាប់ជាច្រើនត្រូវបានកម្លាំងរដ្ឋបាលជលផលចម្រុះចុះបង្ក្រាប ដោយប្រតិបត្តិការនេះ ខណ្ឌរដ្ឋបាលជលផលកំពង់ចាម សហការជាមួយអធិការដ្ឋានរដ្ឋបាលជលផលមេគង្គ អធិការដ្ឋានរដ្ឋបាលជលផលចតុមុខ អាជ្ញាធរស្រុកបាធាយ កម្លាំងកងរាជអាវុធហត្ថស្រុកបាធាយ និងកម្លាំងប៉ុស្តិ៍នគរបាលរដ្ឋបាលបាធាយ។ ព្រមទាំងមានការសម្របសម្រួលពីលោក វង្ស ប៊ុនវិសុទ្ធ ព្រះរាជអាជ្ញានៃអយ្យការអមសាលាដំបូងខេត្តកំពង់ចាម ដឹកនាំដោយលោក ភួង ទីណា និងលោក លី ស្រ៊ី នាយខណ្ឌស្ដីទីជលផលខេត្ត បានចុះប្រតិបត្តិការត្រួតពិនិត្យ និងបង្រ្កាបបទល្មើសជលផល បានចំនួន ១ករណី និងបានរឹបអូវត្ថុតាងមួយចំនួន រួមមាន ឧករណ៍លបប្រឹស ១០០ចំនួន ៥៥គ្រឿង កានចំនួន ៤៨កាន។

មន្ត្រីដដែលបានបញ្ជាក់ថា ឧបករណ៍នេសាទខុសច្បាប់ដែលបង្ក្រាបបាន ត្រូវបានយកទៅរក្សាទុកនៅខណ្ឌរដ្ឋបាលជលផលខេត្តកំពង់ចាម ដើម្បីសាជ្រាវរកជនល្មើសយកមកផ្ដន្ទាទោសតាមច្បាប់៕