ព័ត៌មានជាតិ

កាស៊ីណូធំៗចំនួន៣នៅស្រុកកោះធំ មានអ្នកឆ្លងកូវីដ១៩ជិត១៤០នាក់

បានផុស

៥ years មុន

នៅ

ថ្ងៃអង្គារ ១៦ មីនា ២០២១

ដោយ

កាស៊ីណូធំៗចំនួន៣នៅស្រុកកោះធំខេត្តកណ្តាល មានអ្នកឆ្លងកូវីដ១៩ក្នុងព្រឹត្តិការណ៍សហគមន៍២០កម្ភៈចំនួន១៣៦នាក់ក្នុងចំណោមអ្នកឆ្លងទូទាំងខេត្តសរុបចំនួន១៧៤នាក់។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ថ្លែងក្នុងកិច្ចប្រជុំបន្ទាន់មួយនៅព្រឹកថ្ងៃទី១៦មីនានេះ លោកគង់ សោភ័ណ្ឌ អភិបាលខេត្តកណ្ដាលបានមានប្រសាសន៍ថា នៅទូទាំងស្រុកកោះធំមានអ្នកវិជ្ជមានចំនួន១៣៦នាក់ក្នុងនោះមាននៅកាស៊ីណូរបស់ក្រុមហ៊ុនព្រីនចំនួន ១០២ នាក់ កាស៊ីណូយ៉ុងយ័ន ៣២នាក់ និងកាស៊ីណូឃីងហ្វា ចំនួន ០២ នាក់។

លោកអភិបាលខេត្ត បានបន្ថែមថា«បើទោះជាមានការកើនឡើងនៃអ្នកផ្ទុកមេរោគកូវីត-១៩ នៅស្រុកកោះធំ តែអាជ្ញាធរខេត្ត និងស្រុក បានធ្វើការគ្រប់គ្រងសភាពការណ៍បានយ៉ាងល្អប្រសើរ ព្រោះថាអ្នកដែលរកឃើញវិជ្ជមានមេរោគកូវីដ-១៩ គឺជាអ្នកដែលកំពុងធ្វើចត្តាឡីស័កនៅក្នុងកាស៊ីណូ និងមិនបានមានប្រាស្រ័យទាក់ទងជាមួយអ្នកខាងក្រៅឡើយ»។

លោកអភិបាលខេត្តកណ្ដាល បានស្នើដល់កាស៊ីណូទាំង៦នៅស្រុកកោះធំត្រូវអនុវត្តឲ្យបាន នៅពេលកំពុងធ្វើចត្តឡីស័កដោយ មិនត្រូវឱ្យពួកគាត់ចេញពីបន្ទប់ពេលកំពុងធ្វើចត្តាឡីស័កឡើយ ព្រោះថាកន្លងមកការកើនឡើងនៃអ្នកមានផ្ទុកមេរោគកូវីដ-១៩ នៅក្នុងស្រុកកោះធំគឺ បណ្ដាលមកពីពួកគាត់ពេលកំពុងធ្វើចត្តាឡីស័ក នឹងបានធ្វើការចល័តចេញពីក្នុងបន្ទប់នៅក្នុងអគារតែមួយ។

គួរបញ្ជាក់ថា គិតត្រឹមព្រឹកថ្ងៃទី១៦ ខែមីនា ឆ្នាំ២០២១នេះខេត្តកណ្ដាលមានអ្នកពាក់ព័ន្ធនឹងព្រឹត្តិការណ៍សហគមន៍២០ កុម្ភៈសរុបចំនួន ១៤ ៣១៩នាក់យកសំណាកបាន ១៣៧៤៩នាក់ក្នុងនោះមានករណីវិជ្ជមានចំនួន ១៧៤នាក់ និងករណីជាសះស្បើយចំនួន ៣នាក់៕

ដោយ ៖ សំអឿន