សមត្ថកិច្ច​ចេញបទបញ្ជា និងចុះណែនាំអ្នកលក់ អ្នកលេងផាវ កាំជ្រួច នាឱកាសចូលឆ្នាំប្រពៃណីចិនខាងមុខ

បន្ទាយមានជ័យ ៖ នាឱកាសចូលឆ្នាំប្រពៃណីចិនជិតខិតមកដល់ ស្នងការនគរបាលខេត្តបន្ទាយមានជ័យបានចេញបទបញ្ជាយ៉ាង​តឹងរ៉ឹង​ដល់បណ្ដាអធិការ ក្រុង ស្រុកទាំង៩ ក្នុងខេត្តបន្ទាយមានជ័យ និងចុះណែនាំ អ្នកលួចនាំចូលផាវគ្រប់ប្រភេទ  អ្នកលក់ និងអ្នកលេង ដើម្បីជៀសវាងមានហានភ័យអ្វីមួយកើតឡើងដល់មហាជន។

លោកឧត្ដមសេនីយទោ សិទ្ធិ ឡោះបានបញ្ជាក់ថា បណ្ដាអធិការ ក្រុង ស្រុកទាំង៩ ត្រូវតែអនុវត្តនូវវិធានការ​នេះ​ឱ្យបានខ្ជាប់ខ្ជួន​ ពិសេសអ្នកលក់ ជាតិផ្ទុះ  ថាវគ្រប់ប្រភេទ នៅតាមទីផ្សារ និងអ្នកលក់នៅតាមផ្ទះត្រូវបង្ក្រាបឱ្យអស់ បើជនណានៅតែប្រព្រឹត្តត្រូវធ្វើតំណត់ហេតុបញ្ជូនទៅតុលាការចាត់ការទៅតាមផ្លូវច្បាប់។

លោកឧត្ដមសេនីយទោ សិទ្ធិ ឡោះបានបញ្ជាក់ឱ្យដឹងបន្តទៀតថា ការ​ដាក់បទបញ្ជា​យ៉ាង​តឹងរ៉ឹង​នេះ​ដើម្បីធានាក្នុងការការពារសន្តិសុខសុវត្ថិភាពនិងសណ្ដាប់ធ្នាប់ ជូន​ប្រជាពលរដ្ឋនៅក្នុងឱកាសបុណ្យប្រពៃណីចិន ដែលប្រព្រឹត្តទៅ  នៅ​ថ្ងៃ​ទី២៨-២៩-៣០ ខែមករា ឆ្នាំ ២០២៥ ខាងមុខនេះ។

លោកបន្តថា មន្ត្រីនគរបាលជំនាញ​ត្រូវចុះធ្វើការផ្សព្វផ្សាយដល់ប្រជាពលរដ្ឋ មិនអនុញ្ញាត​ឱ្យ​លេង​ផាវ ក្នុង​ឱកាស​ចូល​ឆ្នាំចិន នៅតាមទីសាធារណៈ តាម​សហគមន៍ ដែលនាំ​ឱ្យបាត់បង់សណ្ដាប់ធ្នាប់ និង​មាន​ការ​រំខាន​ដល់​អ្នក​ដទៃ​ពិសេស​ដល់​ឪពុកម្ដាយ ឬ អាណាព្យាបាល​ដែល​មាន​កូន​តូច​ងាយ​រងគ្រោះខ្លាំងណាស់។

លោកឧត្ដមសេនីយទោ សិទ្ធិ ឡោះបានបញ្ជាក់​ឱ្យ​ដឹង​បន្ត​ទៀត​ថា មន្ត្រី​នគរបាលជំនាញ ត្រូវធ្វើការផ្សព្វផ្សាយអប់រំ​ឱ្យ​បាន​ស៊ីជម្រៅដល់ប្រជាពលរដ្ឋគ្រប់ស្រទាប់​វណ្ណៈ ឱ្យ​យល់ដឹងអំពីទង្វើខុសច្បាប់​ពី​ការ​តាំង​លក់​ ការ​នាំ​ចូល​ ការចែកចាយផាវ កាំជ្រួច​គ្រប់ប្រភេទ ទទួល​បាន​សេចក្តី​ណែនាំខាងលើនេះ អស់លោក​ប្រធានការិយាល័យជំនាញ និង​លោកអធិការក្រុងស្រុកទាំង ៩ ត្រូវយកចិត្តទុកដាក់ អនុវត្ត​តាមសេចក្តី​ណែនាំ​នេះ​ឈរ​លើ​ស្មារតីទទួលខុសត្រូវខ្ពស់ផង។

លោក​បាន​បញ្ជាក់​ឱ្យដឹងបន្តទៀតថា ផាវ​ជា​គ្រឿង​ផ្ទុះ​ដ៏សាហាវ​មួយ​អាច​សម្លាប់​មនុស្សបានយ៉ាងងាយដូច្នេះគួរតែប្រជាពលរដ្ឋក្នុងខេត្តបន្ទាយមានជ័យ ពិសេសក្មេងៗគួរ​ជៀសវាង​កុំ​លេង​វា​ឱ្យ​សោះ​ក្នុង​ឱកាសចូលឆ្នាំចិន ខាង​មុខ​នេះ។ លោកក៏បានធ្វើការណែនាំចំនួន៧ចំណុច​ឱ្យ​កងកម្លាំងមានសមត្ថកិច្ចចុះអនុវត្តបង្ក្រាបរួមមាន ៖

១-ហាមដាច់ខាត-មិនឱ្យមានការដុតផាវ កាំជ្រួច ឬបង្កសម្លេងផ្ទុះគ្រប់ប្រភេទក្នុងឱកាសពិធីបុណ្យចូលឆ្នាំចិននេះ មិនឱ្យមានការលេងល្បែងស៊ីសងគ្រប់ប្រភេទ

២-ត្រូវប្រុងប្រយ័ត្នក្នុងការអុជទៀនធូប ក្រដាសសែន ភ្លើងចង្ក្រាន ចរន្តអគ្គិសនី ដែលអាច បង្កឱ្យមានគ្រោះអគ្គិភ័យកើតឡើងជាយថាហេតុ

៣-អាជ្ញាធរមានសមត្ថកិច្ចគ្រប់ថ្នាក់ត្រូវចាត់វិធានការយ៉ាងម៉ឺងម៉ាត់បំផុត កុំឱ្យមានការ នាំចូលផាវ កាំជ្រួច ជាតិផ្ទុះគ្រប់ប្រភេទតាមច្រកនិងត្រូវត្រួតពិនិត្យដកហូតវត្ថុទាំងនេះ ដែលមានតាំងលក់នៅគ្រប់ទីកន្លែងក្នុងខេត្តបន្ទាយមានជ័យ

៤-មន្ទីរធម្មការ និងសាសនាខេត្តត្រូវអញ្ជើញបណ្ដាសមាគមចិន និងវៀតណាម ដើម្បីផ្សព្វផ្សាយនូវខ្លឹមសារខាងលើឱ្យបានទូលំទូលាយ។

៥-ត្រូវផ្សព្វផ្សាយណែនាំដល់ប្រជាពលរដ្ឋក្នុងមូលដ្ឋានឱ្យអនុវត្តតាមការណែនាំនេះឱ្យមានប្រសិទ្ធភាព។

៦-ត្រូវចេញបទបញ្ជាឱ្យម៉ឺងម៉ាត់ដល់កម្លាំងរបស់ខ្លួនដើម្បីអនុវត្តឱ្យមានប្រសិទ្ធភាព។

៧-ជនណាបំពានលើសេចក្ដីណែនាំនេះឬប្រព្រឹត្តល្មើសបង្កឱ្យមានចលាចលក្នុងសង្គម បាត់សណ្តាប់ធ្នាប់ សន្តិសុខ សុវត្ថិភាព និងរបៀបរៀបរយសាធារណៈត្រូវទទួលទោសតាមច្បាប់ជាធរមាន៕

ដោយ ៖ វ៉ាន់ ណាង