អ្នកនាំពាក្យ ជំរុញឱ្យមន្ទីរព័ត៌មានខេត្តកណ្ដាល ឆ្លើយតបឱ្យរហ័សរាល់ព័ត៌មានមិនពិត

លោក ទេព អស្នារិទ្ធ អនុរដ្ឋលេខាធិការ និងជាអ្នកនាំពាក្យក្រសួងព័ត៌មាន ជំរុញដល់មន្ទីរព័ត៌មានខេត្តកណ្តាល ត្រូវពិនិត្យតាមដានរាល់ព័ត៌មានមិនពិត ព្រមទាំងទប់ស្កាត់ និងឆ្លើយតបឱ្យបានទាន់ពេលវេលារាល់ព័ត៌មានទាំងអស់ដែលបានផ្សព្វផ្សាយតាមបណ្ដាញសង្គម ដែលធ្វើឱ្យប៉ះពាល់ស្ថិរភាព សណ្ដាប់ធ្នាប់ អសន្តិសុខក្នុងខេត្ត ក៏ដូចជានៅទូទាំងប្រទេស។

ការជំរុញបែបនេះ ក្នុងឱកាសដែលលោកអញ្ជើញដឹកនាំកិច្ចប្រជុំតម្រង់ទិសកិច្ចការងារព័ត៌មាន និងសាធារណមតិ នៅមន្ទីរព័ត៌មានខេត្តកណ្តាល នារសៀលថ្ងៃទី១០ ខែមករា ឆ្នាំ២០២៥។

លោក ទេព អស្នារិទ្ធ លើកឡើងថា មន្ទីរព័ត៌មានខេត្ត គឺមានតួនាទីក្នុងការផលិត និងផ្សព្វផ្សាយពីគោលនយោបាយ សមិទ្ធផល និងសកម្មភាពនានារបស់រាជរដ្ឋាភិបាល និងរដ្ឋបាលឯកភាពខេត្ត ដើម្បីឱ្យប្រជាពលរដ្ឋនៅគ្រប់ទីសទីបានដឹង ព្រមទាំងបានពាំនាំក្តីកង្វល់ សំណូមពរ បញ្ហាប្រឈមនានារបស់ប្រជាពលរដ្ឋជូនដល់រាជរដ្ឋាភិបាល និងរដ្ឋបាលខេត្តដោះស្រាយ។ ទន្ទឹមនឹងនេះ មន្ទីរ បានដើរតួនាទីសំខាន់ក្នុងការសម្របសម្រួលលើកិច្ចការផ្សព្វផ្សាយព័ត៌មាន និងសាធារណៈមតិ ក្នុងគោលបំណងសម្របសម្រួល និងដោះស្រាយបញ្ហាសាធារណមតិ សំដៅលើកកម្ពស់កិន្យានុភាព និងឧត្តមភាពសង្គមជាតិ។

លោកអនុរដ្ឋលេខាធិការ បន្ថែមថា ការងារសាធារណមតិ គឺជាមធ្យោបាយដ៏មានប្រសិទ្ធភាពក្នុងការផ្សារភ្ជាប់ទំនាក់ទំនងរវាងប្រជាពលរដ្ឋជាមួយអាជ្ញាធរក្នុងខេត្តគ្រប់ជាន់ថ្នាក់ សំដៅលើកកម្ពស់យន្តការដោះស្រាយនូវរាល់បញ្ហា និងឆ្លើយតបទាន់ពេលវេលា ដើម្បីជម្រះក្ដីបារម្ភរបស់ប្រជាពលរដ្ឋ រួមចំណែកលើកស្ទួយការអភិវឌ្ឍសហគមន៍នៅទូទាំងខេត្ត ស្របតាមគោលនយោបាយ និងការអនុវត្តយុទ្ធសាស្ត្របញ្ចកោណ របស់រាជរដ្ឋាភិបាល នីតិកាលទី៧។

ក្នុងន័យនេះ អនុរដ្ឋលេខាធិការ បានជំរុញដល់ថ្នាក់ដឹកនាំ មន្ត្រីរាជការ នៃមន្ទីរព័ត៌មានខេត្តកណ្តាល ត្រូវដឹកនាំ គ្រប់គ្រងការតាមដាន និងផ្ទៀងផ្ទាត់ព័ត៌មាន ដែលបានចែករំលែក និងចែកចាយតាមបណ្តាញសង្គម និងតាមមធ្យោបាយផ្សេងៗ ដែលមានចរិតញុះញង់ គ្មានប្រភពច្បាស់លាស់ និងគ្មានវិជ្ជាជីវៈ ដែលបង្កផលប៉ះពាល់ អវិជ្ជមានដល់សន្តិសុខជាតិ និងសណ្តាប់ធ្នាប់ ដែលអាចឈានដល់វិបត្តិសង្គមផ្សេងៗ។ មន្ទីរព័ត៌មាន ត្រូវបន្តសហការ សម្របសម្រួលជាមួយអាជ្ញាធរ មន្ទីរ និងអង្គភាពជំនាញក្នុងខេត្ត ដើម្បីចាត់វិធានការឆ្លើយតបជាបន្ទាន់ និងអាចមានវិធានផ្លូវច្បាប់ចំពោះរាល់ព័ត៌មានបំពុលសង្គម និងបំភ័ន្ត សាធារណមតិ៕