ព័ត៌មានជាតិ

មន្ទីរសាធារណការ ស្ដារ និងជួសជុលពង្រីកផ្លូវក្រាលកៅស៊ូមួយខ្សែក្នុងស្រុកថ្មគោល សម្រួលការដឹកជញ្ជូនកសិផលពលរដ្ឋចូលទីផ្សារ

បានផុស

១ year មុន

នៅ

ថ្ងៃសុក្រ ១៧ មករា ២០២៥

ដោយ

នៅដើមឆ្នាំ២០២៥ នេះ មន្ទីរសាធារណការខេត្តបាត់ដំបង បានអនុវត្តជាបន្តបន្ទាប់ ស្តារ និងជួសជុលពង្រីកផ្លូវមួយខ្សែដែលស្ថិតនៅគោលដៅក្នុងឃុំជ្រៃ ក្នុងស្រុកថ្មគោល នៃខេត្តបាត់ដំបង ឆ្លើយតបតាមតម្រូវការរបស់ប្រជាពលរដ្ឋសម្រាប់ប្រើប្រាស់ជាប្រយោជន៍ក្នុងការដំណើរដើម្បីរកចំណូលទ្រទ្រង់សេដ្ឋកិច្ចប្រចាំថ្ងៃក្នុងគ្រួសារ។

ប្រជាពលរដ្ឋក្នុងឃុំ ក៏ដូចជាមតិមហាជន បានយល់ឃើញថា ផ្លូវដែលមន្ទីរសាធារណការខេត្ត ដែលបានប្រឹងប្រែងស្តារជួសជុលនាពេលនេះ គឺពិតជាមានសារៈសំខាន់ សម្រាប់ពលរដ្ឋក្នុងស្រុកថ្មគោល ដែលបង្កលក្ខណៈងាយស្រួលក្នុងការធ្វើដំណើរ និងដឹកជញ្ជូនរាល់កសិផលចូលទីផ្សារក្នុងក្រុង ដើម្បីរកចំណូលទ្រទ្រង់សេដ្ឋកិច្ចគ្រួសាររស់នៅប្រចាំថ្ងៃ ខណៈស្រុកថ្មគោលជាគោលដៅផ្នែកកសិកម្មដ៏មានសក្តានុពលមួយក្នុងចំណោមស្រុកគោលដៅនានា នៃខេត្តបាត់ដំបង។

លោក ព្រួញ រិទ្ធិថា ប្រធានមន្ទីរសាធារណការខេត្ត បានឲ្យ កម្ពុជាថ្មី ដឹងថា ផ្លូវមួយខ្សែនៅក្នុងឃុំជ្រៃនៃស្រុកថ្មគោលនេះ មានសារៈសំខាន់ណាស់សម្រាប់បម្រើដល់ការធ្វើដំណើរ និងបង្កលក្ខណៈងាយស្រួលក្នុងការដឹកជញ្ជូនកសិផលរបស់ប្រជាកសិករឲ្យបានធំទូលាយ ខណៈលោកថា ផ្លូវមួយខ្សែនេះ ក៏បានតភ្ជាប់ជាមួយនិងផ្លូវ ៦០(ផ្លូវក្រវ៉ាន់ក្រុង)នៅដំណាក់កាលបន្ទប់។

លោកថា ការស្តារ និងពង្រីកផ្លូវមួយខ្សែនេះ ធ្វើឡើងបន្តពីគម្រោងចាស់ បានចាប់ផ្តើមពីទល់មុខផ្សារឃុំជ្រៃរហូត ដែលមានប្រវែង ១ គីឡូម៉ែត្រកន្លះ (១,៥០០ម៉ែត្រ) ខណៈទទឹងផ្លូវកៅស៊ូបានពង្រីកដល់ទៅ ១៩ម៉ែត្រ និងពង្រីកកៅស៊ូ ១ម៉ែត្រទាំងសងខាងផ្លូវទៀតសរុបផ្លូវមួយខ្សែនេះ គឺមានទទឹងដល់ទៅ ២១ម៉ែត្រ ហើយក្នុងនោះប្រព័ន្ធលូក៏បានពង្រីកបានប្រវែង ១២០០ម៉ែត្រផងដែរ នៅផ្នែកខាងស្តាំនៃផ្លូវ៕

អត្ថបទ៖ សៅ សារិទ្ធ