រដ្ឋបាលខេត្តមណ្ឌលគិរី បើកសន្និបាតបូកសរុបលទ្ធផលការងារ និងលើកទិសដៅបន្តដើម្បីការងារកាន់តែល្អប្រសើរ

រដ្ឋបាលខេត្តមណ្ឌលគិរី រៀបចំពិធីបើកសន្និបាតបូកសរុបលទ្ធផលការងារឆ្នាំ២០២៤ និងលើកទិសដៅឆ្នាំ២០២៥ ដើម្បីធានាកាន់ឱ្យតែល្អប្រសើរនូវយុទ្ធសាស្ត្របញ្ចកោណ ដំណាក់កាលទី១ របស់រាជរដ្ឋាភិបាល នីតិកាលទី៧ នៃរដ្ឋសភា។ ការបូកសរុបលទ្ធផលនេះ ធ្វើឡើងនាព្រឹកថ្ងៃ២២ ខែមករា ឆ្នាំ២០២៥ នៅសាលប្រជុំសាលាខេត្តមណ្ឌលគិរី ក្រោមអធិបតីភាព លោក ម៉ែន ង៉ុយ ប្រធានក្រុមប្រឹក្សា និង លោក ថង សាវុន អភិបាលខេត្តមណ្ឌលគិរី។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្នុងឱកាសនោះ លោក ថង សាវុន បានថ្លែងនូវការកោតសរសើរ និងវាយតម្លៃខ្ពស់ចំពោះកិច្ចខិតខំប្រឹងប្រែង សហការរៀបចំឱ្យមានអង្គសន្និបាតឡើងនាពេលនេះ ដែលមានរយៈពេល ២ថ្ងៃ ចាប់ពីថ្ងៃទី២២-២៣ ខែមករា ឆ្នាំ២០២៥ ក្នុងគោលបំណង ដើម្បីធ្វើការបូកសរុបលទ្ធផលការងារដែលបានអនុវត្តកន្លងមក ជាពិសេសធ្វើការត្រួតពិនិត្យឡើងវិញ និងធ្វើការឆ្លុះបញ្ចាំងនូវលទ្ធផលការងារ ដែលបានអនុវត្តនៅក្នុង ឆ្នាំ២០២៤។

លោកថា កន្លងមកបានធ្វើការត្រួតពិនិត្យលើចំណុចខ្លាំង ចំណុចខ្សោយ បញ្ហាប្រឈម សំណូមពរ ឬសំណើ ដំណោះស្រាយផ្សេងៗ និងលើកទិសដៅការងារបន្តរួមគ្នាអនុវត្តនៅក្នុងឆ្នាំ២០២៥ សំដៅរួមសហការគ្នាក្នុងការអនុវត្តឱ្យបានសម្រេចនូវការងារដែលនៅសេសសល់ និងបន្តសហការអនុវត្តការងារថ្មីៗថែមទៀត។ ដើម្បីជាត្រីវិស័យក្នុងការអនុវត្តការងារឱ្យសម្រេចបានជោគជ័យទៅតាមផែនការ ដែលបានគ្រោងទុក និងចូលរួមចំណែកអនុវត្តឱ្យបានកាន់តែល្អប្រសើរនូវយុទ្ធសាស្រ្តបញ្ចកោណ ដំណាក់កាលទី១ របស់រាជរដ្ឋាភិបាល នីតិកាលទី៧ នៃរដ្ឋសភា។

ក្រៅពីរបាយការណ៍បូកសរុបលទ្ធផលការងារឆ្នាំ២០២៤ និងទិសដៅការងារឆ្នាំ២០២៥ របស់រដ្ឋបាលខេត្ត ក៏នៅមានការធ្វើរបាយការណ៍បូកសរុបលទ្ធផល នៃការអនុវត្តគោលនយោបាយភូមិ ឃុំ សង្កាត់ មានវសុវត្ថិភាព ការប្រឡងប្រណាំងការអនុវត្តគោលនយោបាយភូមិ ឃុំ សង្កាត់ មានសុវត្ថិភាព និងមានការធ្វើបទអន្តរាគមន៍បណ្តាមន្ទីរ អង្គភាពមួយចំនួន រួមទាំងអាជ្ញាធរក្រុង ស្រុក ឃុំ សង្កាត់ផងដែរ៕

អត្ថបទ៖ រៀម សុខហេង