អាជ្ញាធរខណ្ឌប្ញស្សីកែវឱ្យសិប្បកម្មកែច្នៃប្រេងខ្មៅមួយកន្លែង រក្សាអនាម័យ ចៀសវាងបង្កក្លិនស្អុយដល់អ្នកជិតខាង

អាជ្ញាធរខណ្ឌឫស្សីកែវ ប្រាប់ឱ្យសិប្បកម្មកែច្នៃប្រេងខ្មៅមួយកន្លែង ស្ថិតនៅក្នុងច្រាំងចំរេះទី២ បញ្ឈប់ការស្លរខ្លាញ់គោ និងខ្លាញ់ត្រី ដែលបង្កឱ្យមានក្លិនមិនល្អដល់អ្នកជិតខាង ដោយត្រូវរក្សាអនាម័យឱ្យបានស្អាត។

ដោយមានការអនុញ្ញាតពីលោក ជិន ប៊ុនធឿន អភិបាលខណ្ឌប្ញស្សីកែវ នាព្រឹកថ្ងៃទី០៣ ខែកុម្ភៈ ឆ្នាំ២០២៥ លោក ឌន ដាវុឌ នាយករងរដ្ឋបាលខណ្ឌ បានដឹកនាំអនុប្រធាន និងមន្ត្រីការិយាល័យសាធារណការ ដឹកជញ្ជូន អនាម័យ បរិស្ថាន និងសណ្តាប់ធ្នាប់សាធារណៈខណ្ឌ សហការជាមួយមន្ត្រីសង្កាត់ច្រាំងចំរេះទី២ ចុះពិនិត្យការបំពុលបរិស្ថាន ពីទីតាំងសិប្បកម្មកែច្នៃប្រេងខ្មៅ ស្ថិតនៅភូមិខ១ សង្កាត់ច្រាំងចំរេះទី២ ខណ្ឌប្ញស្សីកែវ។

ក្រោយការចុះពិនិត្យនៅទីតាំងនេះផ្ទាល់ ក្រុមការងារ បានរកឃើញថា ទីតាំងកំពុងដំណើការធម្មតា ខណៈម្ចាស់សិប្បកម្មបានទទួលស្គាល់ថា សិប្បកម្មមានការស្លរខ្លាញ់គោម្តងម្កាល ជាហេតុធ្វើឱ្យមានក្លិនតិចតួច។ ប៉ុន្តែ ម្ចាស់សិប្បកម្ម បានសន្យាថា ឈប់ស្លរខ្លាញ់គោ និងខ្លាញ់ត្រី ទៀតហើយ។

បន្ថែមពីការសន្យារបស់ម្ចាស់សិប្បកម្ម ក្រុមការងារខណ្ឌ ក៏បានតម្រូវឱ្យម្ចាស់ទីតាំងធ្វើដំបូលប្រក់ជិត ចៀសវាងបង្កឱ្យមានក្លិនប៉ះពាល់ដល់អ្នករស់នៅជិតខាង ហើយម្ចាស់ទីតាំងត្រូវធ្វើការសម្អាតសិប្បកម្មកែច្នៃប្រេងខ្មៅនេះឱ្យបានស្អាតជាប្រចាំផងដែរ៕

ដោយ៖ ធឿន វ៉ាន់សុង