មន្ទីរពេទ្យបង្អែកខេត្តរតនគិរី អំពាវនាវឱ្យមានការបរិច្ចាគឈាមឱ្យបានច្រើន ខណៈមន្ទីរពេទ្យមិនមានឈាមស្តុកទុកច្រើនទេ

នៅមន្ទីរពេទ្យបង្អែកខេត្តរតនគិរី មួយរយៈចុងក្រោយនេះ មានអ្នកជំងឺ ឈឺជាបន្តបន្ទាប់គ្នា ដែលជាមូលហេតុ ធ្វើឱ្យមន្ទីរពេទ្យ ពុំមានឈាមគ្រប់គ្រានសម្រាប់សង្គ្រោះអាយុជីវិតរបស់អ្នកជំងឺ ។ បច្ចុប្បន្នប្រជាជនរស់នៅខេត្តរតនគិរី មានជំងឺច្រើនករណី ដែលត្រូវការឈាម ដើម្បីស្រោចស្រង់អាយុជីវិតនិងព្យាបាល ។

លោក ចាន់ តុលា វេជ្ជបណ្ឌិតជំនាញវះកាត់ និងផ្តល់ឈាម នៅមន្ទីរពេទ្យបង្អែកខេត្តរតនគិរី បានមានប្រសាសន៍ថា រឿងដែលសំខាន់នៅពេលនេះ គឺមានស្ត្រីមុនឆ្លងទន្លេ និងក្រោយសម្រាលទារក ដែលត្រូវវះកាត់ជាបន្ទាន់ ហើយខេត្តរតនគិរី ក៏មានប្រជាជន មានជំងឺ និងសង្គ្រោះបន្ទាន់ ក្នុងមួយថ្ងៃៗច្រើនដែរ។

លោកបន្តថា ការសង្គ្រោះតាមរយៈផ្តល់ឈាមនេះ ប្រសិនបើមិនបានទាន់ពេលវេលានោះទេ គឺអាចបណ្តាលឱ្យអ្នកជំងឺបាត់បង់ជីវិតបាន។ ហេតុនេះ លោក សំណូមពរសប្បុរសជនដែលមានសុខភាពល្អ ជួយបរិច្ចាគឈាមបន្ទាន់ផងចំពោះអ្នកជងឺពេលនេះកំពុងសង្រ្គោះបន្ទាន់។ សម្រាប់មណ្ឌលផ្ដល់ឈាម នៅក្នុងមន្ទីរពេទ្យមិនមានស្តុកកប្រភេទ A+/O+ B+ ច្រើននោះទេ។

សព្វថ្ងៃនេះមានប្រជាជន និងសិស្សនិស្សិត បាននាំគ្នាបរិច្ចាគឈាមជាបន្តបន្ទាប់ដែរ ប៉ុន្តែទោះជាយ៉ាងនេះក្តី ក៏មិនមានគ្រប់គ្រាន់ សម្រាប់ស្តុកទុក និងជួយផ្តល់ឈាម គ្រប់គ្រាន់ជួយអ្នកជំងឺនៅឡើយនោះទេ ។

សូមរម្លឹកឡើងវិញថា មន្ទីរពេទ្យបង្អែកខេត្តរតនគិរី បាននិងកំពុងទទួលការបរិច្ចាគឈាមនេះ មិនមានពេលកំណត់ពេលឈប់ទទួល យកពីសប្បុរសជន ដែលមានបំណងជួយសង្គ្រោះជីវិតថ្មី ចង់ចូលរួមជួយសង្គមជាតិ សង្គ្រោះអាយុជីវិតមនុស្ស ។ សម្រាប់សប្បុរសជនដែលមានបំណង ចង់ចូលរួមផ្តល់ឈាមជួយទៅ ជនជាតិដើមភាគតិច ដែលមានជំងឺ និងសម្រាកព្យាបាល នៅមន្ទីរពេទ្យនេះ អាចទៅបរិច្ចាគដោយផ្ទាល់បាន ស្ថិតនៅមន្ទើរពេទ្យបង្អែកខេត្តរតនគិរី តែមួយកន្លែងគត់ មិនមានទទួលបរិច្ចាគនៅកន្លែងផ្សេងឡើយ ។ ចំពោះអ្នកផ្តល់ឈាមទៅជនរងគ្រោះ សម្រាប់បុរសភេទ ត្រូវមានសុខភាពល្អ ចំណែកឯនារីវិញ ការផ្តល់នេះ អាចផ្តល់បានអំឡុងពេលមិនទាន់មករដូវ៕

ដោយ៖ ខៀវ ចាប