សម្តេចតេជោ ស្នើឱ្យបន្តពង្រឹងជ្រើសរើសមន្រ្តីក្របខណ្ឌរដ្ឋប្រកបដោយតម្លាភាព

ថ្លែងចេញពីវេទិកាសាធារណៈ នៅថ្ងៃទី ១១​ខែកុម្ភៈនេះ សម្តេចតេជោ ហ៊ុន សែន ប្រធានព្រឹទ្ធសភា បានស្នើឱ្យបន្តពង្រឹងការជ្រើសរើសមន្រ្តីក្របខណ្ឌរដ្ឋប្រកបដោយតម្លាភាព ដើម្បីពង្រឹងប្រសិទ្ធភាពការងារ និងការចំណាយរបស់រដ្ឋាភិបាល។

អញ្ជើញជាអធិបតីភាពក្នុងពិធីសម្ពោធអគារសិក្សា និងសមិទ្ធផលនានាបរិវេណវត្តព្រះឥន្ទសាមគ្គីធម៌ នៅខេត្តកណ្តាល សម្តេចតេជោ ហ៊ុន សែន មានប្រសាសន៍ថា រដ្ឋាភិបាលកំពុងធ្វើកំណែទម្រង់ស៊ីជម្រៅ​ ទៅលើការទទួលយកមន្រ្តីក្របខណ្ឌ ការបណ្តុះបណ្តាលគ្រូ និងគ្រូពេទ្យ តាមរយៈការប្រឡង។ ក្នុងន័យនេះ​សម្តេច ជំរុញឱ្យបន្តពង្រឹងការជ្រើសមន្រ្តីក្របខណ្ឌបែបនេះ ដើម្បីពង្រឹងប្រសិទ្ធភាពការងារ។

សម្តេចបានថ្លែងថា៖«កន្លងទៅគ្រាន់តែប្រឡងគ្រូ ប៉ុន្មានរយនាក់ ត្រូវរើសទូទាំងប្រទេសមកប្រឡង ដូច្នេះ ខ្ញុំករុណាគិតថា គួរតែអនុវត្តទៅតាមប្រព័ន្ធដូចគ្នា។ បើមិនអញ្ចឹងទេ ម្នាក់ទីកន្លែងមួយដែលងាយស្រួលបានក្របខណ្ឌពិសេស ធ្វើឱ្យបាត់បង់ប្រសិទ្ធភាពរបស់រដ្ឋ និងអយុត្តិធម៌សម្រាប់អ្នកដែលប្រឡងមិនជាប់»។

សម្តេចបានគូសបញ្ជាក់ផងដែរថា បញ្ហានេះ ក្រសួងអប់រំ ក្រសួងសុខាភិបាល និងក្រសួងមុខងារសាធារណៈ ត្រូវគិតគូរឱ្យបានហ្មត់ចត់ ខណៈបញ្ហាគ្រូពេទ្យ និងគ្រូបង្រៀនត្រូវបានផ្តល់អាទិភាពក្នុងការជ្រើសរើសមន្រ្តី។ សម្តេចបន្តថា៖«ត្រូវពិនិត្យឱ្យបានដិតដល់ពីក្រសួងអប់រំ  ពីសំណាក់ក្រសួងសុខាភិបាល និងក្រសួងមុខងារសាធារណៈ ព្រោះខ្ញុំករុណា មិនអាចឆ្លើយដូចមុនថាបាននោះទេ។  ព្រោះខ្ញុំតាំងពីពាក់កណ្តាលអាណត្តិមុន គឺរឹតបន្តឹងការរើសក្របខណ្ឌ។ ជួនកាលចូលនិវត្តន៍ពីរនាក់ ឱ្យរើសតែម្នាក់»។

បើតាមសម្តេចតេជោ ការជ្រើសរើសមន្រ្តីក្របខណ្ឌ ត្រូវតែពិនិត្យអំពីគុណសម្បត្តិ និងលក្ខណៈគ្រប់គ្រាន់ បើគ្រាន់តែមកជ្រកដើម្បីទទួលបានក្របខណ្ឌ គឺជារឿងអយុត្តិធម៌ចំពោះបញ្ហាដទៃទៀត។

«ព្រោះកាលណាបញ្ចូលក្របខណ្ឌគេភ្លាម ត្រូវគិតចាប់ពីថ្ងៃចាប់ផ្តើមរហូតដល់ថ្ងៃគេស្លាប់ ចឹងត្រូវមានតុល្យភាពទៅលើបញ្ហាថវិកា​ ត្រូវវិភាគជូនតាមវិស័យណា។ គ្រប់តែកន្លែងហ្នឹង មានមន្រ្តីជាប់កិច្ចសន្យា ប៉ុន្តែមន្រ្តីជាប់កិច្ចសន្យាមិនត្រូវបានទទួលជាស្វ័យប្រវត្តិនូវក្របខណ្ឌនោះទេ» ។

បើតាមសម្តេចតេជោ គ្រូពេទ្យមន្រ្តីកិច្ចសន្យា ធ្លាប់ត្រូវបានបញ្ចូលឱ្យចូលក្របខណ្ឌលក្ខណៈទ្រង់ទ្រាយធំអំឡុងរាតត្បាតនៃជំងឺកូវីដ១៩ គឺដើម្បីប្រយុទ្ធជាមួយកូវីដ។ ប៉ុន្តែបច្ចុប្បន្ននេះ ត្រូវតែអនុវត្តទៅតាមគោលការណ៍របស់រដ្ឋាភិបាល។ សម្តេចបន្តថា៖«ខ្ញុំករុណា គ្រាន់តែផ្តល់យោបល់ទៅដល់ក្រសួង ប៉ុន្តែមិនមានសិទ្ធិដើម្បីសម្រេច លូកលាន់ ព្រោះនេះទាក់ទងការគ្រប់គ្រងថវិកា»៕