លោក កែវ រ៉េមី ៖ អ្នកស្រឡាញ់ភេទដូចគ្នានៅកម្ពុជាកើនឡើង ហើយពួកគេក៏ហ៊ានបង្ហាញជាសាធារណៈជាងមុន

លោក កែវ រ៉េមី ទេសរដ្ឋមន្ត្រី ប្រធានគណៈកម្មាធិការសិទ្ធិមនុស្សកម្ពុជា (គ.ស.ម.ក.) បានលើកឡើងថា អ្នកស្រឡាញ់ភេទដូចគ្នានៅកម្ពុជាមានការកើនឡើង ហើយពួកគេក៏មានភាពក្លាហានក្នុងការបង្ហាញចាសាធារណៈ និងរស់នៅជាមួយគ្នាដោយមិនមានការហាមឃាត់ឡើយ។ នេះបើតាមទំព័រហ្វេសប៊ុករបស់ គណៈកម្មាធិការសិទ្ធិមនុស្សកម្ពុជា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការលើកឡើងនេះ ធ្វើឡើងនៅថ្ងៃទី១៣ ខែកុម្ភៈ ឆ្នាំ២០២៥ ក្នុងកម្មវិធីកិច្ចសន្ទនាអំពីការគាំទ្រ និងការលើកកម្ពស់ក្ដីស្រឡាញ់ចម្រុះរបស់សហគមន៍អ្នកស្រឡាញ់ភេទដូចគ្នា ដែលសហការរៀបចំដោយអង្គការសហគមន៍ឥន្ទធនូកម្ពុជា (ROCK) ក្រុមអ្នកស្ម័គ្រចិត្ត និងបណ្ដាញអង្គការសង្គមស៊ីវិលធ្វើការលើសិទ្ធិអ្នកស្រឡាញ់ភេទដូចគ្នា។ កម្មវិធីនេះ មានគោលបំណងបង្ហាញការបន្តគាំទ្រ និងលើកកម្ពស់ភាពចម្រុះនៃសេចក្តីស្រឡាញ់ប្រកបដោយសមភាព បរិយាបន្ន និងភាពសុខដុម ព្រមទាំងដើម្បីរួមចំណែកជំរុញការការពារសិទ្ធិអ្នកស្រឡាញ់ភេទដូចគ្នានៅក្នុងប្រទេសកម្ពុជា។

តាមប្រភពខាងលើ លោក កែវ រ៉េមី បានលើកឡើងថា៖ “នៅក្នុងប្រទេសកម្ពុជា ស្ថានភាពអ្នកស្រឡាញ់ភេទដូចគ្នាមានវឌ្ឍនភាពគួរឱ្យកត់សម្គាល់ ដូចជា ពួកគាត់កាន់តែមានភាពក្លាហានហ៊ានបង្ហាញអត្តសញ្ញាណពិតរបស់ខ្លួនជាសាធារណៈ មានការរៀបអាពាហ៍ពិពាហ៍តាមបែបប្រពៃណីក្នុងទម្រង់ផ្សេងៗដោយសេរី និងមានការរួមរស់នៅជាមួយគ្នាជាដៃគូជីវិតដោយគ្មានការហាមឃាត់ ជាដើម”។ លោកទេសរដ្ឋមន្ត្រី លើកឡើងពីវឌ្ឍនភាពនេះកើនឡើង ស្របពេលដែល ស្ថានភាពសិទ្ធិអ្នកស្រឡាញ់ភេទដូចគ្នានៅលើពិភពលោក ដែលមានប្រទេសខ្លះហាក់កំពុងដើរថយក្រោយ តែក៏មានប្រទេសខ្លះកំពុងរីកចម្រើនទៅមុខផងដែរ។

ប្រធានគណៈកម្មាធិការសិទ្ធិមនុស្សកម្ពុជា បញ្ជាក់ទៀតថា កម្ពុជា ត្រូវការពេលវេលាបន្ថែម ក្នុងការបញ្ជ្រាបការយល់ដឹងពីសិទ្ធិអ្នកស្រឡាញ់ភេទដូចគ្នាគ្រប់មជ្ឈដ្ឋាន ដើម្បីឱ្យមានការទទួលស្គាល់តាមផ្លូវច្បាប់ និងទទួលស្គាល់អាពាហ៍ពិពាហ៍របស់អ្នកស្រឡាញ់ភេទដូចគ្នានៅកម្ពុជាផងដែរ។

ក្នុងឱកាសនេះ លោក កែវ រ៉េមី បានស្នើដល់សាធារណជន កុំឱ្យមានការរើសអើង ឬប្រើអំពើហឹង្សាលើអ្នកស្រឡាញ់ភេទដូចគ្នា ព្រោះពួកគេគ្រាន់តែចង់បាននូវក្ដីស្រឡាញ់ និងភាពកក់ក្ដៅប៉ុណ្ណោះ។ ចំណែក អ្នកស្រឡាញ់ភេទដូចគ្នាវិញ លោកក៏សំណូមពរ ត្រូវធ្វើជាពលរដ្ឋល្អក្នុងសង្គម ដើម្បីទទួលបានការទទួលស្គាល់ និងការឱ្យតម្លៃពីសាធារណជនទូទៅ ហើយអាចនាំឱ្យគោលដៅរបស់ខ្លួនសម្រេចនៅថ្ងៃណាមួយ៕