ជប៉ុនផ្តល់ជំនួយជាង២០ម៉ឺនដុល្លារ ដល់រដ្ឋបាលរាជធានី ដើម្បីធ្វើឱ្យប្រសើរឡើងនូវសមត្ថភាពពន្លត់អគ្គិភ័យ

រដ្ឋាភិបាលជប៉ុនតាមរយៈស្ថានទូតជប៉ុនប្រចាំនៅព្រះរាជាណាចក្រកម្ពុជាបានផ្តល់ជំនួយឥតសំណងចំនួន២ដែលជាគម្រោងទ្រង់ទ្រាយតូច សន្តិសុខមនុស្សជាតិ ដែលមានទឹកប្រាក់ប្រមាណជាង២០ម៉ឺនដុល្លារអាមេរិកជូនរដ្ឋបាលរាជធានី ដើម្បីធ្វើឱ្យប្រសើរឡើងនូវសមត្ថភាពក្នុងការពន្លត់អគ្គិភ័យ។

ពិធីចុះហត្ថលេខាលើកិច្ចសន្យាផ្តល់ជំនួយឥតសំណងរវាងស្ថានទូតជប៉ុន និងរដ្ឋបាលរាជធានីភ្នំពេញនេះបានធ្វើឡើងនៅរសៀលថ្ងៃទី១៩ ខែកុម្ភៈ ឆ្នាំ២០២៥នេះ នៅស្ថានទូតជប៉ុនប្រចាំនៅព្រះរាជាណាចក្រកម្ពុជា ក្រោមវត្តមាន លោក អ៊ូអិណុ អាត់ស៊ូស៊ី (UENO Atsushi)    ឯកអគ្គរាជទូតវិសាមញ្ញ និងពេញសមត្ថភាពរបស់ប្រទេសជប៉ុនប្រចាំព្រះរាជាណាចក្រកម្ពុជា និងលោក ឃួង ស្រេង អភិបាលនៃគណៈអភិបាលរាជធានីភ្នំពេញ។

កម្មវិធីចុះ ហត្ថលេខាលើកិច្ចសន្យាផ្តល់ជំនួយឥតសំណងរបស់រដ្ឋាភិបាលជប៉ុន សម្រាប់គម្រោងទ្រង់ទ្រាយតូចសន្តិសុខមនុស្សជាតិ (គូសាណូណិ) ធ្វើឡើងលើគម្រោងចំនួនពីរក្នុងនោះរួមមាន៖ ១. “គម្រោងធ្វើលទ្ធកម្មរថយន្តបាញ់ផ្សែងរបស់ជប៉ុន នៅរាជធានីភ្នំពេញ” ក្នុងថវិកាគម្រោងចំនួន ៨៣ ៦៧២ដុល្លាអាមេរិក។ រថយន្តនេះមានមុខងារនឹងជួយឱ្យក្រុមការងារពន្លត់អគ្គិភ័យមានលទ្ធភាពបាញ់ផ្សែងចេញពីអគារមានឧប្បត្តិហេតុអគ្គិភ័យ និងបង្កលក្ខណៈងាយស្រួលដល់ប្រតិបត្តិការ សង្រ្គោះ។ ២. “គម្រោងធ្វើលទ្ធកម្មរថយន្តពន្លត់អគិ្គភ័យ និងរថយន្តសង្រ្គោះបន្ទាន់ដែលប្រើប្រាស់រួច ក្នុង    រាជធានីភ្នំពេញ” ក្នុងថវិកាគម្រោងចំនួន ១៥៤.៣៧៦ដុល្លាអាមេរិក។ គម្រោងនេះនឹងផ្តល់ជូននូវរថយន្តសង្រ្គោះបន្ទាន់ចំនួន ០១គ្រឿង ជាប្រភេទពន្លត់អគ្គិភ័យ និងរថយន្តពន្លត់អគ្គិភ័យបំពាក់ជណ្តើរកម្ពស់ ៤០ម៉ែត្រចំនួន ០១គ្រឿង។

ឯកអគ្គរាជទូតជប៉ុនប្រចាំកម្ពុជា រំពឹងថាគម្រោងទី១ ដែលមានរថយន្តបាញ់ខ្យល់ ដែលបំពាក់ដោយកង្ហារធំ និងឧបករណ៍បាញ់ខ្យល់ នឹងជួយការពារអាយុជីវិត និងទ្រព្យសម្បត្តិរបស់ ប្រជាជនប្រមាណ ២លាន៨សែននាក់ ក្នុងរាជធានីភ្នំពេញ ដោយការបាញ់ខ្យល់ចេញយ៉ាងសកម្មពី អគារដែលមានអគ្គិភ័យ។ រថយន្តនេះដើមឡើយត្រូវបានប្រើប្រាស់ដោយទីភ្នាក់ងារគ្រប់គ្រងអគ្គិភ័យ និងគ្រោះមហន្តរាយ នៃក្រសួងកិច្ចការផ្ទៃក្នុង និងទូរគមនាគមន៍ជប៉ុន។ ចំណែកគម្រោងទី២ ជា រថយន្ត២គ្រឿងនេះ លោកទូតរំពឹងថា នឹងជួយ ឱ្យក្រុមពន្លត់អគ្គិភ័យដោះស្រាយបញ្ហាអគ្គិភ័យ និងធ្វើការជួយសង្គ្រោះក្នុងករណីមានអគ្គិភ័យនៅក្នុង អគារកម្ពស់១១ជាន់ ឬស្ថានភាពលំបាកផ្សេងៗទៀតបាន។ រថយន្តទាំងនេះ នឹងបង្កើនសមត្ថភាព បច្ចេកទេសរបស់កងកម្លាំងនគរបាលពន្លត់អគ្គិភ័យរាជធានីភ្នំពេញ។

ក្នុងឱកាសនេះ លោកឃួង ស្រេង អភិបាលនៃគណៈអភិបាលរាជធានីភ្នំពេញ បានថ្លែងអំណរគុណយ៉ាងជ្រាលជ្រៅជូនរដ្ឋាភិបាល និងប្រជាជនជប៉ុន តាមរយៈស្ថានទូតជប៉ុន ដែលបានផ្តល់ជំនួយឧបត្ថម្ភជា ថវិកា សម្ភារ និងបច្ចេកទេសក្នុងដំណើរការស្តារ កសាង និងអភិវឌ្ឍន៍រាជធានីភ្នំពេញជារៀងរហូតមក ជាពិសេសគម្រោងដែលបានចុះហត្ថលេខានាពេលនេះ គឺមិនត្រឹមតែបានគាំទ្រដល់ការធ្វើឱ្យប្រសើរឡើងនូវសមត្ថភាពពន្លត់អគ្គិភ័យប៉ុណ្ណោះទេ ប៉ុន្តែថែមទាំងបានរួមចំណែកយ៉ាងសំខាន់ក្នុងការរឹតចំណងមិត្តភាព សាមគ្គីភាព និងកិច្ចសហប្រតិបត្តិការល្អរវាងប្រទេសទាំងពីរ “កម្ពុជា-ជប៉ុន” ឱ្យកាន់តែរឹងមាំ និងស្ថិតស្ថេរគង់វង្សជានិច្ចនិរន្តន៍។

ជាមួយគ្នានេះដែរ លោកអភិបាលរាជធានីភ្នំពេញ បានបង្ហាញក្តីសង្ឈឹមយ៉ាងមុតមាំថា តាមរយៈការផ្តល់ជំនួយបច្ចេកទេស និងរថយន្តពន្លត់អគ្គិភ័យនាពេលនេះ គឺជាតម្រូវការចាំបាច់ចំពោះមុខ និងទាន់ពេលវេលា ដើម្បី ធានាដល់ប្រសិទ្ធភាពនៃការអន្តរាគមន៍ពន្លត់អគ្គិភ័យក្នុងរាជធានីភ្នំពេញកាន់តែប្រសើរឡើង៕អត្ថបទ÷ស្រីរ័ត្ន 

អត្ថបទ÷ស្រីរ័ត្ន