ក្រសួងយុត្តិធម៌សិក្សាជំរុញអនុវត្តន៍ទោសការងារសហគមន៍ដើម្បីកាត់បន្ថយភាពចង្អៀតពន្ធនាគារ

ក្រសួងយុត្ដិធម៌កំពុងរៀបចំពន្លឿនការដាក់អនុវត្តសាកល្បងទោសការងារសហគមន៍ ស្របពេលដែលពន្ធនាគារកម្ពុជាត្រូវបានមើលឃើញថាមានភាពចង្អៀតណែន។

ការពិនិត្យពន្លឿនដើម្បីដាក់អនុវត្តន៍ទោសការងារសហគមន៍នេះត្រូវបានធ្វើឡើងក្នុងកិច្ចប្រជុំមួយដឹកនាំដោយឧបនាយករដ្ឋមន្ត្រីយុត្តិធម៌លោក កើត រិទ្ធ កាលពីព្រឹកថ្ងៃទី២០ ខែកុម្ភៈ ឆ្នាំ២០២៥។

អ្នកនាំពាក្យក្រសួងយុត្តិធម៌លោក សេង ឌីណា ប្រាប់កម្ពុជាថ្មីថាទោសការងារសហគមន៍ត្រូវបានអនុញ្ញាតដោយក្រមព្រហ្មទណ្ឌដែលបានដាក់ឱ្យប្រើប្រាស់តាំងពីឆ្នាំ២០០៩មកម្លេះ តែដោយសារបញ្ហាមួយចំនួនដូចជា សាធារណជនមិនទាន់យល់ និងខ្វះដែគូរទទួលយកទណ្ឌិតទៅធ្វើការងារសហគមន៍ទើបការអនុវត្តន៍ទោសនេះត្រូវបានអូសបន្លាយមកដល់ពេលនេះ។

លោកបានសរសេរឆ្លើយទៅនឹងសំណួររបស់កម្ពុជាថ្មីតាមសារអេឡិចត្រូនិកតេឡេក្រាមថា៖ «ក្រុមការងារក្រសួងយុត្តិធម៌ ដោយសហការជាមួយភាគីពាក់ព័ន្ធ កំពុងខិតខំព្យាយាម ដោយយកចិត្តទុកដាក់ ដើម្បីធ្វើយ៉ាងណាអាចដាក់ឱ្យអនុវត្តទោសការងារសហគមន៍នេះឱ្យបានឆាប់តាមដែលអាចធ្វើទៅបាន ជាពិសេស ដើម្បីអាចនឹងជួយដោះស្រាយភាពចង្អៀតណែនក្នុងពន្ធនាគារ»។

លោក សេង ឌីណា បញ្ជាក់ថាទោសការងារសហគមន៍នេះគឺអនុវត្តន៍បានតែចំពោះបទល្មើសស្រាលៗតែប៉ុណ្ណោះ ដែលអាចជួយឱ្យទណ្ឌិតក្នុងការធ្វើសមាហរណកម្មចូលទៅក្នុងសង្គមជាតិផង និងជួយដោះស្រាយភាពចង្អៀតណែននៅក្នុងពន្ធនាគារផងដែរ។

កាលពីថ្ងៃទី១៨ ខែកុម្ភៈ អង្គការលីកាដូទើបចេញរបាយការណ៍មួយស្ដីពីការចង្អៀតណែនក្នុងពន្ធនាគារកម្ពុជាដែលធ្វើឱ្យពន្ធនាគារមួយចំនួនដាក់អ្នកជាប់ឃុំលើសសមត្ថភាពដល់ទៅ២០០ភាគរយ ខណៈប្រទេសកម្ពុជាត្រូវបាន World Prison Brief ចាត់ចូលជាប្រទេសលំដាប់ទី២ដែលមានភាពចង្អៀតណែនពន្ធនាគារក្នុងពិភពលោក។

នាយក​ប្រតិ​បត្តិ​អង្គការ​លីកាដូលោក អំ សំអាត បានឱ្យដឹងថាភាពចង្អៀតណែនក្នុងពន្ធនាគារមិនទាន់មានការថយចុះនោះទេ ដែលជាការព្រួយបារម្ភមួយ ខណៈលោកស្វាគមន៍ចំពោះការជំរុញពន្លឿនការអនុវត្តន៍ទោសការងារសហគមន៍ពីសំណាក់ក្រសួងយុត្តិធម៌។

លោកថា៖ «យើងស្វាគមន៍ចំពោះយន្តការ ឬក៏នីតិវិធីក្នុងការកាត់ទោសការងារសហគមន៍នេះព្រោះថានេះជាចំណុចមួយដែលអង្គការលីកាដូចង់បាន»។

គិតត្រឹមឆ្នាំ២០២៤ ពន្ធនាគារកម្ពុជាដាក់ឃុំឃាំងអ្នកទោសមានចំនួនជាង៥ម៉ឺននាក់ដែលជាចំនួនច្រើនបំផុតក្នុងប្រវត្តិសាស្ត្រកម្ពុជា ខណៈអគ្គនាយកដ្ឋានពន្ធនាគារមានគម្រោងសាងសង់ពន្ធនាគារបន្ថែម ឬច្នៃបន្ទប់ពន្ធនាគារឱ្យធំជាងមុខដើមដោះស្រាយបញ្ហាប្រឈម ហើយវិធានការផ្ទេរអ្នកទោសពីពន្ធនាគារមួយទៅពន្ធនាគារមួយទៀតក៏ត្រូវធ្វើឡើងជាបន្តបន្ទាប់ផងដែរ៕

អត្ថបទដោយ ហ៊ុន សិរីវឌ្ឍន៍