​ដំណើរការ​សាងសង់សណ្ឋាគារផ្កាយ ៥ និង មជ្ឈមណ្ឌលពាណិជ្ជកម្មតម្លៃ ៥៧៤ លានដុល្លារ នៅខេត្ត​ព្រះសីហនុ បន្តវឌ្ឍនភាព​​ទៅមុខ​

គម្រោងអភិឌ្ឍ​​តំបន់ពាណិជ្ជកម្ម​ និ​ងសណ្ឋាគារផ្កាយ ៥ នៅ​ខេត្តព្រះសីហនុ (Peninsula Bay) កំពុង​វឌ្ឍនភាព​ឆ្ពោះទៅមុខ​ទៅតាម​ផែនការ​ដែលគ្រោង​បញ្ចប់​នៅ​ឆ្នាំ ២០២៨។

កាលពី​ថ្ងៃទី ៣ ខែ មីនា ឆ្នាំ ២០២៥ ក្រុមការងារជំរុញការវិនិយោគក្នុងខេត្តព្រះសីហនុ ដែល​ដឹកនាំដោយ​លោក ហ៊ាន សាហ៊ីប ទីប្រឹក្សាសម្តេចធិបតីនាយករដ្ឋមន្រ្តី និងជាប្រធានក្រុមការងារជំរុញការវិនិយោគក្នុងខេត្តព្រះសីហនុ និង លោក ម៉ាង ស៊ីណេត អភិបាលនៃគណៈអភិបាលខេត្តព្រះសីហនុ បានចុះពិនិត្យគម្រោង ផឹនីនស្យ៊ូឡឺ បេ (Peninsula Bay) និង តំបន់សេដ្ឋកិច្ចពិសេសក្រុងព្រះសីហនុ ក្នុងគោលបំណងបន្តផ្តល់ការយកចិត្តទុកដាក់ខ្ពស់លើការថែទាំវិនិយោគក្នុងវិស័យ​ទេសចរណ៍ អចលនទ្រព្យ និង ឧស្សាហកម្ម ស្របតាមកម្មវិធីពិសេសជំរុញការវិនិយោគក្នុងខេត្តព្រះសីហនុ ដែលជាគំនិតផ្តួចផ្តើមដ៏ប្រពៃរបស់ សម្តេចធិបតីនាយករដ្ឋមន្រ្តី។

បើតាម​មន្រ្តី​ក្រុមការងារជំរុញការវិនិយោគក្នុងខេត្តព្រះសីហនុ ការចុះពិនិត្យនេះគឺជាសកម្មភាពមួយនៃភារកិច្ចស្នូលរបស់ក្រុមការងារ បន្ទាប់ពីការពិនិត្យផ្តល់ការលើកទឹកចិត្តពិសេស ជូនវិនិយោគិន និង ធុរជន ដែលស្នើសុំ និង អនុវត្តគម្រោងក្នុងឆ្នាំ ២០២៤ និង ឆ្នាំ ២០២៥ ក្នុងគោលដៅតាមដាន និង ជំរុញការអនុវត្តគម្រោង និង ស្តាប់សំណូមពរ និង បញ្ហាប្រឈមនានា ពីអ្នកអនុវត្ត និង វិនិយោគិន។

គម្រោង Peninsula Bay របស់ក្រុមហ៊ុន PENINSULA BAY INVESTMENT គឺជាគម្រោង​វិនិយោគ​ចម្រុះ​ដែលមាន​ការ​សាងសង់សណ្ឋាគារផ្កាយ ៥ និង មជ្ឈមណ្ឌលពាណិជ្ជកម្ម មានទីតាំង​ស្ថិតនៅភូមិ ៤ សង្កាត់លេខ ៤ ក្រុងព្រះសីហនុ ខេត្តព្រះសីហនុ តាមបណ្តោយទីលានសម្តេចតេជោ មានទុនវិនិយោគ​ប្រមាណ ៥៧៤ លានដុល្លារអាមេរិក ដែល​បានចាប់ផ្តើមសាងសង់ក្នុងឆ្នាំ ២០២៤ និង​គ្រោង​បញ្ចប់នៅឆ្នាំ ២០២៨។

ទីតាំងគម្រោងមានទំហំ ១៥៨ ៦៣៣ ម៉ែត្រការ៉េ សម្រាប់បម្រើដល់ការសាងសង់សណ្ឋាគារផ្កាយ ៥ ចំនួន ២ ៨៧០ បន្ទប់, សួនទឹកកម្សាន្ត និង សាលប្រជុំខ្នាតធំ, ផ្សារទំនើប, អគារពាណិជ្ជកម្មចំនួន ៥ កម្ពស់ ៣២ ជាន់ និង អគារស្នាក់នៅរួម ចំនួន ៤ អគារ កម្ពស់ ៣២ ជាន់។

គម្រោងទាំងមូលកំពុង​មានសកម្មភាពសាងសង់សស្រាក់សស្រាំ លឿន និង អាចបញ្ចប់តាមការគ្រោងទុក។ នេះ​បើតាម​មន្រ្តី​ក្រុមការងារជំរុញការវិនិយោគក្នុងខេត្តព្រះសីហនុ។

ជាមួយនេះ ក្រុមហ៊ុនកំពុងរៀបចំផែនការពង្រីកការសាងសង់ហេដ្ឋារចនាសម្ព័ន្ធនៅជុំវិញទីតាំងគម្រោងបន្ថែមទៀត ខណៈ​ដែលម្ចាស់គម្រោងមានទំនុកចិត្តខ្ពស់លើរាជរដ្ឋាភិបាល ដែលបានផ្តល់ការគាំទ្រ និង ការសម្របសម្រួល និង ជួយ​ដោះស្រាយបញ្ហាប្រឈមបានឆាប់រហ័ស និង មានប្រសិទ្ធភាព ជាពិសេសការដាក់ចេញកម្មវិធីពិសេសជំរុញការវិនិយោគ​ក្នុងខេត្តព្រះសីហនុ៕