ប្រធានរដ្ឋសភាជំរុញស្ត្រីកុំឱ្យមានការច្រណែនគ្នា និងត្រូវគាំទ្រគ្នាទៅវិញទៅមក

ប្រធានរដ្ឋសភា សម្ដេចសភាធិការធិបតី ឃួន សុដារី បានជំរុញដល់ស្ត្រីគ្រប់រូបត្រូវតែគាំទ្រគ្នាទៅវិញទៅមក ដោយចាត់ទុកថាភាពជោគជ័យរបស់ស្ត្រីណាម្នាក់គឺជាជោគជ័យរបស់ស្ត្រីគ្រប់គ្នា។

សម្ដេចប្រធានរដ្ឋសភាថ្លែងក្នុងពេលពិធីសំណេះសំណាលជាមួយសមាជិការដ្ឋសភា  ថ្នាក់ដឹកនាំ និងមន្ត្រីរាជការជានារី នៃអគ្គលេខាធិការដ្ឋានរដ្ឋសភា នៅរសៀលថ្ងៃទី៣ ខែមីនាឆ្នាំ២០២៥ នៅវិមានរដ្ឋសភា បែបនេះដោយចង់បង្ហាញពីភាពរឹងមាំ និងសាមគ្គីភាពរបស់ស្ត្រីក្នុងវិស័យការងារដែលមិនគួរមានការច្រណែនគ្នានោះទេពេលឃើញស្ត្រីណាម្នាក់បានកាន់តំណែងតំណែងតួនាទីខ្ពស់នោះ។

សម្ដេចថា៖ «ស្ត្រីត្រូវគាំទ្រគ្នាឯង! តែបើយើងមិនគាំទ្រគ្នាឯងទេ ប្រុសៗគេមើលងាយយើងហើយ។ [..] ហើយត្រូវទទួលស្គាល់ថាជោគជ័យរបស់ស្ត្រីគឺជាជោគជ័យរបស់យើងដែរ»។

ជាមួយគ្នានេះសម្ដេចបានជំរុញ​ដល់ស្ត្រីគ្រប់រូបត្រូវបង្កើនចំណេះដឹងតាមរយៈការសិក្សាពេញមួយជីវិត និងត្រូវតាមឱ្យទាន់នូវបច្ចេកវិទ្យាឌីជីថលបច្ចុប្បន្នផងដែរ។

របាយការណ៍ពីកម្លាំងពលកម្មកម្ពុជាឆ្នាំ២០១៩ របស់ក្រសួងផែនការឱ្យដឹងថាពលរដ្ឋប្រមាណ៨លាននាក់កំពុងធ្វើការតាមស្ថាប័នរដ្ឋនិងឯកជននានាក្នុងនោះ៤៧,៨%គឺជាស្ត្រី។

រដ្ឋមន្ត្រីក្រសួងកិច្ចការនារីលោកស្រី អ៊ឹង កន្ថាផាវី បានលើកឡើងនៅថ្ងៃទី៤ ខែមីនានេះដែរថាស្ថានភាពស្ដ្រីនៅកម្ពុជាបច្ចុប្បន្នមានសេរីភាពទូលំទូលាយនៅក្នុងសកម្មភាពសេដ្ឋកិច្ច និងមានកម្លាំងពលកម្មជាស្ត្រីខ្ពស់ជាងគេក្នុងតំបន់ ដែលជាកត្តាវិជ្ជមាននៃគោលនយោបាយរបស់រដ្ឋ។

បើតាមលោកស្រីរដ្ឋមន្ត្រី ការដាក់ចេញកម្មវិធីពិសេសនិងវិធានការនានាដើម្បីលើកកម្ពស់តួនាទីស្ត្រីនៅថ្នាក់ជាតិនិងក្រោមជាតិបានធ្វើឱ្យបច្ចុប្បន្នមានមន្ត្រីរាជការជាស្ត្រីដល់៤២% ហើយស្ត្រីក្នុងការដឹកនាំបច្ចេកទេស និងនយោបាយក៏ត្រូវបានបង្កើនជាបន្តបន្ទាប់ផងដែរ៕

អត្ថបទដោយ ហ៊ុន សិរីវឌ្ឍន៍