ជិត១០០ឆ្នាំនៃការស្វែងរកទីបំផុតព្រះសិរពុទ្ធបដិមាមួយរកឃើញដងខ្លួនវិញហើយ

កំណាយដំណាក់កាលទី២ នៅប្រាសាទតាព្រហ្មបានរកឃើញនូវដងខ្លួនបដិមាមួយនាពេលថ្មីៗនេះ ដែលត្រូវគ្នានឹងព្រះសិរដែលបានរកឃើញកាលពីសម័យអណានិគមបារាំងក្នុងឆ្នាំ១៩២៧ គិតរហូតមកដល់ពេលនេះគឺប្រើពេល៩៨ឆ្នាំ។

យោងតាមការចុះផ្សាយរបស់អាជ្ញាធរជាតិអប្សរានៅរសៀលថ្ងៃទី១០ ខែមីនា ទើបតែបានបង្ហាញនូវការរកឃើញរបស់ខ្លួនកាលពីថ្ងៃទី២ ខែកុម្ភៈ កន្លងទៅនូវដងខ្លួនពុទ្ធបដិមាមួយនេះ។ តាមការបញ្ជាក់គឺក្រោយពេលដែលយកទៅផ្ដុំជាមួយនឹងបំណែកដៃ និងប្រអប់ជើង ដែលរកឃើញកាលពីខែកក្កដា ឆ្នាំ២០២៤គឺត្រូវគ្នា១០០% ហើយអ្វីដែលកាន់តែភ្ញាក់ផ្អើលនិងរំភើបនោះបំណែកដងខ្លួននេះត្រូវគ្នាជាមួយព្រះសិរដែលមានចុះបញ្ជីលេខ DCA.6883-N139 រកឃើញនៅគោបុរៈខាងកើតទី៤នៃប្រាសាទតាព្រហ្ម ក្នុងឆ្នាំ១៩២៧ បច្ចុប្បន្នរក្សាទុកនៅអភិរក្សដ្ឋានអង្គរ។

អាជ្ញាធរអប្សរាបញ្ជាក់ថា៖ «ដូចនេះផ្នែកផ្សេងៗនៃពុទ្ធបដិមាខាងលើដែលបាក់បែក ត្រូវបានផ្គុំឡើងវិញស្ទើរតែពេញលេញទម្រង់ដើម។ ចំពោះផ្នែកដែលបាត់បង់ដែលស្វែងរកមិនទាន់ឃើញ គឺបាត់ព្រះសហ្តស្តាំតែប៉ុណ្ណោះ»។

សូមបញ្ជាក់ថា កិច្ចការកំណាយនេះធ្វើឡើងក្នុងគោលបំណងរៀបចំវត្ថុសិល្បៈក្នុងបរិវេណប្រាសាទតាព្រហ្ម ដោយសារតែមានរូបចម្លាក់ជាច្រើនបាននៅរាយប៉ាយតាមកំពែងឬក៏នៅក្នុងរោងទង៕

អត្ថបទដោយ ហ៊ុន​ សិរីវឌ្ឍន៍