ព័ត៌មានជាតិ

មន្ត្រីជាន់ខ្ពស់ការងារ ជំរុញក្រុមការងារដោះស្រាយបញ្ហាប្រឈម និងឆ្លើយតបចម្ងល់ពលរដ្ឋឱ្យទាន់ពេលវេលា មានប្រសិទ្ធភាពខ្ពស់

បានផុស

៣ សប្តាហ៍ មុន

នៅ

ថ្ងៃពុធ ១២ មីនា ២០២៥

ដោយ

មន្ត្រីជាន់ខ្ពស់ក្រសួងការងារ និងបណ្តុះបណ្តាលវិជ្ជាជីវៈ បានជំរុញ និងលើកទឹកចិត្តដល់ក្រុមការងារដោះស្រាយបញ្ហាប្រឈម និងឆ្លើយតបចម្ងល់របស់ប្រជាពលរដ្ឋ ពិសេសកម្មករ-និយោជិតឱ្យបានទាន់ពេលវេលា និងមានប្រសិទ្ធភាពខ្ពស់។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ថ្លែងបើកកិច្ចប្រជុំបូកសរុបលទ្ធផលការងារសម្រេចបានប្រចាំខែកុម្ភៈ និងលើកទិសដៅការងារអនុវត្តបន្តសម្រាប់ខែមីនា ក្រុមការងារឆ្លើយតប និងផ្ដល់ព័ត៌មានពាក់ព័ន្ធនឹងសេវាសាធារណៈរបស់ក្រសួងការងារ និងបណ្ដុះបណ្ដាលវិជ្ជាជីវៈ នៅសាលប្រជុំនាយកដ្ឋាន ស.អ ស្នាក់ការកណ្ដាល ប.ស.ស. រាជធានីភ្នំពេញ កាលពីរសៀលថ្ងៃទី ១១ មីនា លោក កត្តា អ៊ន រដ្ឋលេខាធិការ និងជាប្រធានក្រុមការងារឆ្លើយតប និងផ្ដល់ព័ត៌មានពាក់ព័ន្ធនឹងសេវាសាធារណៈ របស់ក្រសួងការងារ និងបណ្ដុះបណ្ដាលវិជ្ជាជីវៈ បានលើកទឹកចិត្តដល់មន្ត្រី បុគ្គលិក នៃក្រុមការងារ បន្តអនុវត្តតួនាទីភារកិច្ចរបស់ខ្លួនធ្វើយ៉ាងណាដោះស្រាយរាល់បញ្ហាប្រឈមក្នុងការឆ្លើយតបចម្ងល់របស់ប្រជាពលរដ្ឋ ជាពិសេសកម្មករ-និយោជិត ឱ្យទាន់ពេលវេលា និងមានប្រសិទ្ធភាពខ្ពស់ ទាក់ទងនឹងវិស័យការងារ សន្ដិសុខសង្គម និងបណ្ដុះបណ្ដាលវិជ្ជាជីវៈ ឱ្យបានរហ័ស ច្បាស់លាស់ និងក្រមសីលធម៌ប្រកបដោយភាពទន់ភ្លន់ និងភាពអត់ធ្មត់ជាសំខាន់។

ជាមួយគ្នានេះដែរ លោកប្រធានក្រុមការងារ បានជំរុញឱ្យមានការរៀបចំសិក្ខាសាលាដើម្បីចែករំលែកបទពិសោធ ចំណេះដឹងថ្មីៗ ពីអង្គភាពក្រោមឱវាទក្រសួងការងារ និងបណ្ដុះបណ្ដាលវិជ្ជាជីវៈ ដល់ក្រុមប្រតិបត្តិការផ្ដល់ព័ត៌មាន ដើម្បីទទួលបានចំណេះដឹងថ្មីៗ ដែលអាចបំពេញបន្ថែមនូវចំណុចខ្វះខាត។

គួរបញ្ជាក់ថា ក្រសួងការងារ និងបណ្តុះបណ្តាលវិជ្ជាជីវៈ បានបង្កើតប្រព័ន្ធទំនាក់ទំនងទូរស័ព្ទផ្តល់ព័ត៌មានចំនួនពីរខ្សែ គឺ ១២៩៧ និង ១២៨៦ ដើម្បីឱ្យសាធារណជន ពិសេសកម្មករ-និយោជិតមានចម្ងល់ពាក់ព័ន្ធទៅនឹងការងារ ប.ស.ស.និងក្រសួងការងារ អាចទូរស័ព្ទមកកាន់លេខខាងលើក្រុមការងារឆ្លើយតប និងផ្ដល់ព័ត៌មានពាក់ព័ន្ធនឹងសេវាសាធារណៈ រង់ចាំឆ្លើយតបគ្រប់ពេលវេលា៕

អត្ថបទ ៖ សំអឿន