ភ្ញៀវ​ទស្សនាផ្សោត​ខេត្តក្រចេះ ​ភាគច្រើន​ជា​បរទេស ខណៈសហគមន៍ពឹង​​ចំណូល​ពី​ទេសចរណ៍​គ្មានផ្សែង

សត្វផ្សោតទឹកសាបទន្លេមេគង្គ ត្រូវបានគេចាត់ទុកថា ជារតនសម្បត្តិជាតិមានជីវិតរបស់កម្ពុជា និង​ស្ថិតក្នុងចំណោម សត្វផ្សោតទឹកសាបកម្របំផុត ដែលនៅសេសសល់លើពិភពលោក។

សត្វផ្សោតនៅខេត្តក្រចេះ គឺជាផ្នែកមួយដ៏សំខាន់ក្នុងការបង្កើនប្រាក់ចំណូលដល់ប្រជាសហគមន៍ តាមរយៈវិស័យទេសចរណ៍​យ៉ាងសំបូរបែប ដូចជា បង្កើនការងារដល់ប្រជាពលរដ្ឋក្នុងការកែច្នៃវត្ថុអនុស្សាវរីយ៍ ការលក់ដូរវត្ថុអនុស្សាវរីយ៍ បម្រើសេវាជិៈទូកទស្សនាសត្វផ្សោត និងសេវាកម្មម្ហូបអាហារជាដើម។

លោក ស្រី ស៊ីថា មន្ត្រីនគរបាលទេសចរណ៍និងជាមន្ត្រីគ្រប់គ្រង់ក្រុមទូកទេសចរណ៍នៅអន្លង់ផ្សោតបានឲ្យកម្ពុជាថ្មីដឹងថា ភ្ញៀវទេសចរ​បាន​ទស្សនា​ជា​ហូហែរ​ទោះតិច ឬច្រើន គឺមានជាប្រចាំថ្ងៃ ជាពិសេស ភ្ញៀវបរទេស។ ជាទូទៅ ក្រុមទូកទេសចរណ៍ ដឹកជូនភ្ញៀវទស្សនាសត្វផ្សោត ចន្លោះពី ១០ ជើង ទៅ ២០ជើង ក្នុង១ថ្ងៃ អាស្រ័យទៅតាមចំនួនភ្ញៀវជាក់ស្ដែង ទាំងពេលព្រឹកនិងពេលល្ងាច។

លោកបន្តថា ភ្ញៀវទេសចរភាគច្រើនចំណាយពេល ១ ម៉ោងក្នុងការទស្សនាសត្វផ្សោត ប៉ុន្តែប្រសិនបើភ្ញៀវទស្សនាមិនទាន់​អស់ចិត្ត ក្រុមទូកទេសចរណ៍ក៏មិនអាចនាំភ្ញៀវចូលខាងវិញដែរ គឺដឹកបន្តរហូតមើលឃើញផ្សោតឬភ្ញៀវអស់ចិត្តទើបអាចចូលខាងបាន។ ប៉ុន្តែនារដូវប្រាំងភ្ញៀវចំណាយពេលយ៉ាងយូរត្រឹមមួយម៉ោង គឺចូលខាងវិញហើយ មិនដូចរដូវវស្សាទេ។ ខែប្រាំងសត្វផ្សោតនៅជិតឆាប់បង្ហាញខ្លួន។ ចំណែកខែវស្សាវិញ សត្វផ្សោតបំលាស់ទីពីមួយកន្លែងទៅមួយកន្លែងទៅឆ្ងាយតាមរកចំណី និងបញ្ហាអាកាសធាតុខ្យល់ខ្លាំង គឺអាចប្រើពេលយូរក្នុងការទស្សនា។

ជាក់ស្ដែងនៅថ្ងៃទី១៣ ខែមិនា ឆ្នាំ២០២៥នេះ ក្រុមទូកទេសចរណ៍​ដឹកជូនភ្ញៀវចេញបានចំនួនជិត ២០ជើងដែរ ហើយភាគច្រើនជាជនជាតិបារាំង។

លោក ប្រាក់ វិកុល មន្ត្រីនៃមន្ទីរទេសចរណ៍ខេត្តក្រចេះ បានឲ្យកម្ពុជាថ្មីដឹងដែរថា ស្ថានភាពភ្ញៀវទេសចរមកទស្សនានៅរមណីយដ្ឋានអន្លង់ផ្សោតសព្វថ្ងៃ មានការកើនឡើងបន្តបន្ទាប់ ចាប់តាំងពីខែមករា ដល់ខែមិនា ឆ្នាំ២០២៥ បើធៀបទៅនឹងបណ្តាឆ្នាំមុនកើតជំងឺកូវិដ សង្កេតឃើញថា មានការកើនឡើងគួរឲ្យកត់​សម្គាល់ ដោយភ្ញៀវភាគច្រើនជាជនជាតិបរទេស។

ទន្ទឹមនឹងកំណើនភ្ញៀវទេសចរមានការកើនឡើងនោះ វត្តមានសត្វផ្សោត គឺជាកត្តាស្នួលនៃឧស្សាហ៍កម្មគ្មានផ្សែងសម្រាប់ខេត្តភាគឦសាន្តមួយនេះ។ មិនត្រឹមតែប៉ុណ្ណោះ ថែមទាំងបានបង្ហាញឲ្យឃើញអំពីគុណភាពធនធានជលផល ក្នុងនោះរាប់បញ្ចូលទាំងជីវៈចម្រុះ ប្រព័ន្ធបរិស្ថានធម្មជាតិ ដែលផ្តល់នូវសេវាកម្មអេកូឡូស៊ី ក្នុងការទ្រទ្រង់ជីវិតរបស់មនុស្ស និងជីវភាពរបស់សហគមន៍មូលដ្ឋាន។

កាលពីពេលថ្មីៗនេះ ក្រុមការងារស្រាវជ្រាវ នៃរដ្ឋបាលជលផល និង អង្គការ WWF បានប្រទះឃើញ កូនផ្សោតទើបកើតថ្មី១ក្បាលទៀត នៅអន្លង់កាំពី ស្ថិននៅភូមិកាំពី ឃុំសំបុក ស្រុ កចិត្របុរី ខេត្តក្រចេះ ដែលជាកូនផ្សោតទី៥ បានកើតនៅដើមឆ្នាំ២០២៥៕

អត្ថបទ៖ ប្រុញ វិធិន