ព័ត៌មានជាតិ

អាជ្ញាធរខណ្ឌមានជ័យ បន្តចុះរៀបចំសណ្ដាប់ធ្នាប់តាមបណ្ដោយផ្លូវ ២១៧ បញ្ចៀសការកកស្ទះចរាចរណ៍

បានផុស

១ year មុន

នៅ

ថ្ងៃពុធ ១៩ មីនា ២០២៥

ដោយ

ដើម្បីកាត់បន្ថយការកកស្ទះ និងសម្រួលការធ្វើដំណើរដល់ប្រជាពលរដ្ឋនៅលើផ្លូវ ២១៧ ត្រង់មុខវត្តស្ទឹងមានជ័យ រហូតដល់មុខផ្សារស្ទឹងមានជ័យថ្មី អាជ្ញាធរខណ្ឌស្ទឹងមានជ័យ បានធ្វើការអប់រំណែនាំអាជីវករដែលលក់ដូរលើផ្លូវ ជាហេតុធ្វើឲ្យផ្លូវមានស្ថានភាពតូចចង្អៀត កកស្ទះចរាចរណ៍ បើនៅតែបន្តអាជ្ញាធរអនុវត្តវិធានការក្ដៅ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ជាក់ស្ដែងនៅត្រង់ចំណុចផ្លូវ ២១៧ ក្នុងសង្កាត់ស្ទឹងមានជ័យ ១ ខណ្ឌមានជ័យ រាជធានីភ្នំពេញ មុខវត្តស្ទឹងមានជ័យ រហូតដល់មុខផ្សារស្ទឹងមានជ័យថ្មី ដោយសង្កេតឃើញថាមានប្រជាពលរដ្ឋមួយចំនួនដាក់លក់ដូរនៅលើផ្លូវសាធារណៈ ដូចជា ពោតស្ងោរ មឹកអាំង និងម្ហូបអាហារផ្សេងៗ ទៀត ធ្វើឲ្យមានការកកស្ទះពិបាកធ្វើដំណើរ។

ក្នុងនោះ លោក ឌី សុខែម និង លោក ទៀវ សំអឿន អភិបាលរងខណ្ឌមានជ័យ និង លោក ជា សារ៉េត ចៅសង្កាត់ស្ទឹងមានជ័យទី ១ បានដឹកនាំកម្លាំងគណៈបញ្ជាការឯកភាពខណ្ឌ និង សង្កាត់ ចុះធ្វើការពិនិត្យមើលការលក់ដូរប្រជាពលរដ្ឋលើផ្លូវ ២១៧ និង អប់រំណែនាំអ្នកប្រកបអាជីវកម្មលក់ដូរចំណីអាហារមានការដាក់លក់លើផ្លូវសាធារណៈឲ្យខិតចូលទៅលក់នៅលើចិញ្ចើមផ្លូវវិញ ជៀសវាងមានការតាំងលក់លើផ្លូវ។

ជាមួយគ្នានេះ អាជ្ញាធរខណ្ឌមានជ័យ ក៏បានសំណូមពរទៅដល់ប្រជាពលរដ្ឋ សូមមេត្តាលក់ដូរឲ្យមានសណ្ដាប់ធ្នាប់ ជៀសវាងការដាក់តាំងលក់នៅលើផ្លូវសាធារណៈដែលអាចធ្វើឲ្យមានការកកស្ទះចរាចរណ៍ និង កើតមានគ្រោះថ្នាក់ជាយថាហេតុ៕

អត្ថបទ ៖ ម៉េង