នាយករដ្ឋមន្ត្រីរម្លឹកពីយប់រំភើបមួយក្នុងពេលឃោសនាបោះឆ្នោតឆ្នាំ២០១៣

នាយករដ្ឋមន្ត្រីកម្ពុជា សម្ដេចធិបតី ហ៊ុន ម៉ាណែត បានលើកពីរឿងមួយដែលកើតឡើងចំពោះសម្ដេចជារឿងដ៏រំភើបមួយក្នុងយុទ្ធនាការឃោសនាបោះឆ្នោតឆ្នាំ២០១៣ ដែលបានបង្ហាញនូវពាក្យថាអំពើល្អតែងតែទទួលបានក្ដីស្រលាញ់ពីពលរដ្ឋ។

ថ្លែងក្នុងពិធីសម្ពោធអគារសិក្សា និងសមិទ្ធផលនៅវិទ្យាល័យ ហ៊ុន សែន សេរីភាពក្រុងតាខ្មៅ ខេត្តកណ្ដាល ព្រឹកថ្ងៃទី២១ ខែមីនា ឆ្នាំ២០២៥ សម្ដេចធិបតី ហ៊ុន ម៉ាណែត បានរម្លឹកទៅកាន់យប់មួយក្នុងឆ្នាំ២០១៣ ពេលសម្ដេចនិងក្រុមការងារធ្វើដំណើរចេញពីខេត្តត្បូងឃ្មុំឆ្ពោះទៅស្រុកកងមាស ខេត្តកំពង់ចាម ពេលនោះឡានសម្ដេចបានរអិលធ្លាក់ផ្លូវដែលកំពុងជួសជុល កល់ទ្រូងឡើងផ្លូវវិញមិនរួច និងត្រូវបានអ្នកភូមិជិតនោះចេញមកជួយទាំងភូមិ ដែលសម្ដេចថានេះជារឿងដ៏រំភើបមួយសម្រាប់សម្ដេច។

សម្ដេចថា៖ «ផ្លូវហ្នឹងកំពុងតែធ្វើទើបតែពង្រីកហើយមិនទាន់ចាក់កៅស៊ូ អ៉ីចឹងរអិលធ្លាក់! ហើយគ្នាខ្ញុំប៉ុន្មាននាក់អត់មានឧបករណ៍ទាញ។ ពូម្នាក់ចេញពីភូមិមកអើតឃើញខ្ញុំ! គាត់ថាអើស! ឯកឧត្តម ហ៊ុន ម៉ាណែត ហើយគាត់រត់បាត់។ ខ្ញុំថាយ៉ាងមិចអញ្ចេស! ម៉ែអ្អើយប្រហែល១០នាទីក្រោយមកប្រជាជនប្រហែល១ភូមិចេញមកជួយរុញឡាន។ ពេលហ្នឹងហើយដែលខ្ញុំថា មានតែអំពើល្អទេដែលមានការការពារនិងជួយពីប្រជាជន»។

សម្ដេចថាពេលនោះសម្ដេចរំភើបជាខ្លាំងដែលបានឃើញនូវក្ដីស្រលាញ់ពីពលរដ្ឋចំពោះសម្ដេច។ សម្ដេចបន្ថែមថា ការកសាងអំពើល្អនឹងធ្វើឱ្យយើងទទួលបាននូវអំពើល្អត្រលប់មកវិញ ព្រមទាំងជំរុញឱ្យពលរដ្ឋខិតខំកសាងអំពើល្អក្នុងសង្គម សហគមន៍ និងសាលារៀនដូចគ្នា៕

អត្ថបទដោយ ហ៊ុន សិរីវឌ្ឍន៍