បន្ទាន់! អ្នកធ្លាប់ចេញចូល១០ទីតាំងនេះនៅខេត្តព្រះសីហនុ សូមពិនិត្យសុខភាព ឬទៅធ្វើតេស្ដរកមេរោគកូវីដ-១៩

រដ្ឋបាលខេត្តព្រះសីហនុ នៅរសៀលថ្ងៃនេះ បានអំពាវនាវដល់ប្រជាពលរដ្ឋ និសាធារណជនទាំងអស់ ដែលធ្លាប់មានការពាក់ព័ន្ធជាមួយ១០ទីតាំង សូមទៅពិនិត្យសុខភាព(អាការៈប្រែប្រួល) ពិនិត្យកម្តៅផ្ទាល់ខ្លួនជាប្រចាំ និងត្រូវសម្រាកនៅផ្ទះដាច់តែឯង ថែរក្សាអនាម័យខ្លួនជានិច្ច ក្នុងករណីមានការសង្ស័យត្រូវទៅយកសំណាកនៅវេទិកា ៧មករា ឬករណីសុខភាពប្រែប្រួលខុស ប្រក្រតីដូចជាឡើងកម្ដៅលើសពី ៣៧អង្សាសេ ក្អកកណ្តាស់ ឈឺបំពង់ក មានកំហាក។ល។ ត្រូវប្រញាប់ទំនាក់ទំនងទៅក្រុមឆ្លើយតបបន្ទាន់ នៃមន្ទីរសុខាភិបាលខេត្ត ឬមន្ទីរពេទ្យបង្អែកខេត្តតាមរយៈទូរសព្ទ 012 888 737 ឬ 016 526 520។

ក្រុមការងារជំនាញរបស់រដ្ឋបាលខេត្តព្រះសីហនុ កាលពីថ្ងៃទី២២ ខែមីនានេះ បានតាមដានសម្ភាសជាមួយអ្នកជំងឺកូវីដ-១៩ ដោយពួកគាត់ធ្លាប់បានចេញចូល និងមានការជាប់ពាក់ព័ន្ធទីតាំងចំនួន១០កន្លែងតាមពេលវេលាដូចមានចែងក្នុងសេចក្ដីជូនដំណឹងខាងក្រោម៖

គួរបញ្ជាក់ផងដែរថា គិតដល់ថ្ងៃនេះ ខេត្តព្រះសីហនុបានរកឃើញអ្នកជំងឺកូវីដ១៩ ចំនួន ២៣៤នាក់ហើយ។ ជាមួយគ្នានេះក្រសួងសុខាភិបាលបានប្រកាសនៅព្រឹកមិញនេះថា អ្នកជំងឺកូវីដ-១៩ ចំនួន៨នាក់ នៅខេត្តព្រះសីហនុ បានជាសះស្បើយ ក្នុងនោះមាន ជនជាតិខ្មែរ១នាក់ ជនជាតិចិន៦នាក់ និងជនជាតិវៀតណាម១នាក់៕

អត្ថបទ៖ ច័ន្ទ វីរៈ